**باكوغو
ازاي مصحتش من النوم لغايت دلوقتي؟ ما هو انا اكيد بحلم، اكيد الجنان ده مش حقيقي، بصيت لميدوريا جنبي اللي كان نايم زي الأطفال، اكيد من التمرين بتاع امبارح، حقيقي نفسي اعرف هو بيعمل كل ده ليه؟ ساعات فعلا بشفق عليه، بتخيله في اللحظة اللي هيعرف فيها ان كل المجهود ده راح هدر.
طب هنرجع ازاي دلوقتي؟ فعلا لازم نعمل المهمة دي؟ طب نعرفها ازاي؟
لقيت فجأة صوت همهمة جاية من جمبي، بصيت على ميدوريا لقيت وشه منزعج و هو نايم و بيهمس بحاجة انا مش سامعها، استنتجت انه مجرد كابوس، لحد ما فتح عينه.
بدأ يحط ايده علي صدره و يقبض عليه جامد، الأول بدأ يتأوه،و بعد كدة بدأ يصرخ بصوت عالي، من الواضح انه كان من الألم،
باكوغو بزعيق:
-مالك بتصرخ كدة ليه؟!!
ميدوريا بصريخ هستيري:
-ا..الحقني..الحقني انا بموت!
بدأت اقلق، هو ممكن يموت بجد؟ فجأة لقيت البنت الغريبة داخلة علينا و بتجري علي ميدوريا بتلاقي وشه ازرق من قلة النفس، بتبصلي و بتسألني فيه ايه، بس انا مش عارف ارد، حاسس ان حواسي اتشلت، مش عارف ليه!
بصت للشكل اللي اترسم علي ايده، اللي كان فيه تلات نقط و فجأة جريت علي برة، و كل ده و ميدوريا لسة عمال يصرخ و يتوجع، جريت وراها برة و قولتلها في عصبية:
-فيه ايه بالظبط!
مردتش عليا و حابت سائل لونه بنفسجي و جريت تاني علي جوة، و قالت لميدوريا في صوت ساحر خلاني انا شخصيا اقف باصصلها:
-اهدى، ثق فيا هتبقى كويس.
و مسكت ايده و قالتله:
-اشرب
بدأ فعلا ميدوريا ينفذ اوامرها ، فجأة صوته بدأ يوطى لغايت ما سكت خالص، بصلها لثانية، و بعد كدة فقد الوعي.
اتنفست الصعداء، معرفش ليه كنت قلقان ، بس اللي اعرفه ان انا دلوقتي قادر افكر.
بصيت للغريبة و قولتلها:
-ممكن بقي تفهميني ايه اللي حصل؟
قالتلي متجاهلة سؤالي:
-صاحبك معندوش قدرة صح؟
-اولا هو مش صاحبي، ثانيا لا معندوش.
بصتله بعين فيها شفقة و قالت:
-يبقي هيتعب هنا.
-انتي تعرفي منين موضوع القدرات ده؟ و بعدين انا بردو مفهمتش ايه اللي حصل؟!
-فريقكوا من تلات اعضاء علي حسب الشكل اللي علي ايديكوا بيقول، العهد القديم بينص علي انه لما عضو من الفريق يختفي، بقيت الأعضاء يتقتلوا، علشان محدش فيهم يرجع يقول للعالم التاني انه اختفى هناك.
بصيتلها و انا بحاول استوعب و قلت:
-طب اشمعنا انا محصليش حاجة؟
-علشان انت عندك قدرة، القدرات بتحمي اصحابها، انما هو علشان معندوش قدرة فمفيش حاجة تحميه، انا اديته مهدأ من أعشاب بنعملها هنا في نورديانا، مفعولها بيستمر يومين او تلاتة بالكتير، لازم تلاقي العضو التالت قبل ما يخلصوا،و الا موعدكش اني هعرف انقذه تاني.
بصيت لميدوريا و هو نايم و علامات الاجهاد باينة علي وشه، لازم الاقي العضو التالت، انا مقدرش اتصرف هنا لوحدي.
'''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
**ماري
صحيت تاني يوم، لا مينفعش اقول صحيت، لأني منمتش اصلا.
قومت من علي السرير و خرجت الصالة، لقيت كاي نايم علي الكنبة، حسيت بالذنب اني اضطريته يعمل كدة، بس انا فعلا معنديش اي حل تاني.
دخلت الحمام، لما خرحت كان كاي صحي، كان شكله مهموم، بس اول ما شافني فجأة ملامحه اتغيرت و ابتسملي ابتسامه بريئة و قال:
-صباح الخير، نمتي كويس؟
كان نفسي اردله الابتسامة بس حقيقي مكنتش قادرة، قلتله:
-لا منمتش اصلا.
ابتسملي علشان يطمني و قال:
-معلش، بكرة تتعودي علي البلد هنا، القرية هنا ناس طيبين اوي، و كلنا نعرف بعض ، هتحبيهم طول فترة قعادك هنا.
سكت شوية و بعدين قال:
-هقوم احضرلك الفطار.
مقدرتش اعارض، انا مكلتش من امبارح
قام من علي الكنبة و دخل المطبخ، و بعدين طلع بطبق فيه عيش شكله غريب، مدور و صغير، طلع باتنين منه، و طبق تاني فيه جبنة عليها زيت لونه احمر، و قالي:
-اتفضلي
حطهم علي الأرض و قعد، فقعدت انا كمان، اداني الرغيف و قالي بخجل:
-انا آسف اني معنديش اكل احسن من كدة او...معنديش ترابيزة تاكلي عليها بس...
قاطعته و قلت بصدق:
-مش مشكلة، حقيقي مش مشكلة، كفاية اللي عملته علشاني.
ابتسملي و بدأ ياكل فبدأت اكل انا كمان.
فجأة سمعنا صوت صريخ جامد فخرجنا بسرعة نشوف فيه ايه
ببص لقيت رجالة بيجروا ست من شعرها و هي ماسكة و عايزين يدخلوها اوضة تحت الأرض، لقيت كاي بيقولي:
-الكارديل
-ايه؟
-الكارديل، طقس اهل القرية بيعملوه هنا، لما ست بتولد توأم بيختاروا اللي شكله اقوى و ياخدوا التاني يحرقوه مع امه.
-عيني وسعت و صرخت:
-ايه؟!!!
-فيه اسطورة بتقول ان ولادة التوأم دي لعنة، و لما اي ست بتولد توأم بتبقي ملعونة هي و ابنها، و علشان يخلصوا من اللعنة بيعملوا طقس الكارديل، بيحرقوا الأم مع ابنها في اوضة تحت الأرض، و بعديها بيوم يحتفلوا و يعملوا وليمة بيحضر فيها القرية كلها و الملك نفسه، احتفالا بتخلصهم من اللعنة.
كنت سامعة و مش قادرة اتكلم من الصدمة، ايه السادية دي؟
شدني كاي من ايدي لجوة البيت و قفل الباب ، كل ده و انا قاعدة افكر انقذها ازاي ، للأسف مكنش قدامي حل غير ده
قفلت عيني و ركزت و ركزت و ركزت، لغايت ما عرفت انقذها.
قلت لكاي:
-انا انقذتها!
-ازاي؟
-تعرف القدرات؟
-اكيد! كل النبلاء عندهم قدرات.
-قدرتي هي اني اعرف اخرج المياه من تحت الأرض، استخدمتها عليها، هي اكيد دلوقتي في امان، اتمنى!
بص كاي في الأرض و سكت، اكنه بيفكر في حاجة.
-فيه حاجة؟
بصلها و قالها:
-ل..لا مفيش حاجة
'''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''
**باكوغو
بدأت اتمشي في الشوارع مع ميليسا علشان ندور علي الفرد التالت، نشوف اي حاجة مميزة، لبسه، شكله، اي حاجة تفهمنا انه هو، و في وسط ما احنا ماشيين شوفنا راجل بيضرب ولد صغير ضرب مبرح، و الولد بيعيط و يترجاه انه يسيبه، و الراجل مستمر في الضرب بدون رحمة، لغايت ما الولد ابتدي ينزف، و انا واقف متسمر مش عارف اتصرف ازاي في عالم انا معرفش عنه حاجة!
فجأة لقيت الولد بطل عياط و بدأ يغمض عينه، لغايت ما لقيته وقع في الأرض و فاقد لوعيه.
لغايت هنا مقدرتش اسكت خاصة ان الراجل كان لسة بيضربه!جريت عليه بسرعة و ميليسا بتحاول توقفني بس انا مش سامعها اصلا و زقيت الراجل بقوة بعيد عن الولد اللي كان علي وشك انه يموت في ايده، و قلت بعصبية:
-في ايه! عملك ايه علشان تعمل كل ده يعني!
قال بغضب و هو لسة بيحاول يكمل ضربه:
-كل يوم الاقي حاجة ناقصة من بضاعتي! كل يوم الاقي رغيف عيش ناقص و النهاردة شوفته و هو بيسرقه و مش هسيبه غير اما يديني تمنهم!
زقيته بعصبية اكتر و قولتله:
-هتموت طفل علشان كام رغيف عيش! انت اكيد مش طبيعي!
بعد مفاوضات عديدة وافق الراجل انه يسيبه مقابل اننا ندفعله فلوس الاكل اللي خده.
روحنا علي البيت بسرعة و انا شايل الولد علشان ميليسا تداوي الجروح و النزيف يقف.
محدش فينا كان عارف ان الطفل ده ليه حكاية هتنقلنا لحتة تانية خالص!
