عشقك ♥️ حلالي💍*كاملة*

❣saison 12❣

نهار جديد احداث غير عادة 🥰...
نادت بطلتنا اليوم تخدم صباح و عشية عندها ليبر .. قامت بروتينها لبسة جوب دروات في نوار مع تريكوا مفخفخ في باج و خيمار نوار و باسكات بيضا دات صاكها و تلفونها ... كي جات خارجة من بيت نودت مرام وصاتها كي تلبس و تكمل تنودها توجد روجها و تروح تحوس على خدمة .. مهم تقهوات مع محمد و سلمى في جو عائلتي .. خرجت من دار ستنات كوس تابع للمطعم طلعت فيه تلاقات مع سلوى
الهام: صباح خير
سلوى بتشناف : ااام مين يجي لخير معاك
الهام سمعتها اما لعبتها مسمعتش :واش قلتي
سلوى: والوا 😒
مدارتش عليها الهام دورت راسها تشوف طريق حتى وصلوا للمطعم هبطت لبست قشها و بدات خدمتها ..

عند اسلام ..
هابط في دروج لابس سروال نوار مع كولغولي بيض و فاست دجين في نوار و بسكات بيضاء
سلم على جداتوا ستقهوى معاها و راح هو و ايوب مع بعض ..

دخل للشركة خدمة كانت فوق راسهم ..سكريتارا تملي عليه مواعد و كلش ..
عطالها اوك باه تخرج و و بدا يخدم خدمتوا غير وصلت عشرة خرج من بيروا و راح عند ايوب قالوا رايح للحي شعبي و يفوت على ديار جدد ..
خلى ايوب يخدم في بلاصتوا عندوا ثقة كبيرة فيه .. راح للحي فات على بطيمة الهام تبسم تفكر نهار داوسوا و كي طاحت و طلعها قلبوا يدق مفهمش واش بيه كمل طلع بالطونوبيل للانشاء سقسى اذا كاش ميحتاجوا قالولوا نحاو هذي جيهة كل و باقي ثلاث تستيفات توالى برك ..

بقا تما وحد زوج سوايع ولا ركب طونوبيلتوا ناوي يروح يفطر فات على مطعم صغير وين يبان مع مطاعم لي يروحلهم تفكر طفولتوا كي كان يخرج من ابتدائي و يجي هنا يوري لباباه نقاطي لي يديه وواش تقولوا معلمة و يفرح بيه اما كي شاف صاحبوا يمسح طوابل حقد عليه هو سبابوا حبس لوطوتوا الجنب متردد يدخلوا .. تشجع و دخلوا .. غير شافوا مول محل يبس بلاصتوا وااات اسلام راهوا هنا شاف هيئة نتاعوا لبسة غير غالية و طونوبيل لي خرج منها دراهمها تشري حانوت ديالوا و داروا و ياربي ..
تلبك معرفش واش يقول حتى نطق اسلام : واش صفا عمي حسين نسيتني ياك انا اسلام تعقل طفل لي رميتوا و محبيتش تستقبلوا لدارك ااه قصدي لي حرمتوا من دار باباه و يماه و ديتها انت زعما تكون خو بابا ربي يرحموا طلعت اكبر خاين عشرة كلمة عمي متليقش بيك .. ربي يوكيلك مي درك حمد لله راني بدراهمي و قرايتي و خدمتي .. صبرت و ربي عطالي و جازاني..و نزيدلك تالية سيمانة هذي منقبلكش هنا اخر اسبوع تلم روحك و طير منا عندك يومين في يدك ..
حسين : و علاه قاع لي عندك و طامع بداري
اسلام: نسيت ملي دار لي ساكن فيها دار بابا و من حقي ..
حسين : هاهاهاي ضحكتني و مش في خاطري طير منا تشوف ولد حرام هنا يوقف كلاموا عليا ..

على كلمتوا راح ليه حكموا من كول و يجبد فيه: مننصحكش ترجع تحكي هكذا لي تحكي عليه هو ولد خوك .. بابا ربي يرحموا اشرف منك اموان هو تعب و وصل مش كيفك خاين تحسب مش عارف ملي انت ورى حادث لي صرى لوالديا و لا مي نوعدك نرشيك في حباسي على يتم لي يتمتهولي طمعة في دار و حانوت مامبا مش تاعك و حرمتني منه و بزيادة رميت طفل صغير برى .. مي ربي يمهل و لا يهمل دك تشوف ربي يخلص و عيني تشوف راح تلقاني واقف عليها نهار موتك .. ذنوب بابا يرجعوا فيك كل ..