/// شموخ ///
بقلمي (( رونق السلطاني ))
✨✨✨✨✨✨✨
أشتاق إليك في كل لحظة حنين
مع كل نبضة صدق باسمك
أشتاق اليك عندما أقرأ عن الحب
أشتاق إليك كلّما مرّ بخاطري
ذكرك واسمٌ يشبه اسمك
أشتاق إليك لأنّني أحببتك
وأحببت كلّ شي فيك وكل شيء منك
صخبّك وجنونك وروحك أحبك
الانسان عباره عن كتلة مشاعر بكلمة حلو يتأثر ويفرح وبكلمة قاسيه يزعل وينقهر ويضل يوم كامل زعلان بداخله
حلو الاهتمام من اقرب الناس لقلبك الي هم اهلك وعزوتك وروحك من الدنيا
الاهتمام يولد المحبه القويه ويشعرك براحه وسعاده طول الوقت
وخاصتاً الاهتمام من الام الي تهتم بأولادها وتفديهم بروحها
اهتمام الاخ الي يحسسك انت فعلاً اخ وحزام ظهر ومتخاف من اي شي يصادفك لان تعرف وراك سند وظهر قوي
ماشفت هالأهتمام والخوف الا بعيون غالي جان جثير خايف وقلق وهالشي واضح على وجهه مثل الاب الخايفه على بنته يذكرني بأبوي الله يرحمه جنت وكحه واضل العب واكمز وجثير اتعور
اتذكر مره تكاونت ويه ابن جيرانه رائد ضربته بالحجاره وطبيت اركض وكعت وتعورت ركبتي انشخطت وطلع دم كمت ابجي امي جتي كتلتني ... شعندج تتكاونين ويه والويلاد وكحه عوبه وجرت اذني حيل
ابوي ما رضى دفع امي وصيح عليها ... عليش تكتليها شوفي شبيها بالاول سكتيها افهمي منها عود اضربي وخري عنها بعد انشفت تضربيها لضربج اخذني حضني ورفع ثوبي شو بنيتي وين تعورتي
شاف رجلي ضل يمسح عليها هساع ابوسها واطيب تعالي خلي امسح الدم
طلع جفيه بيضه من جيبه ومسح الدم كال ... شبيج منهو وياج
يابه هذا رائد كلما اطلع العب يسب عليا ويكولي تخوفين جهالنا بعيونج سود تخوف ضربته بالحجاره وطبيت للبيت وسديت الباب وازحلكت بالمي
- عفيه بنتي صيري سبعه وهذا رائد هساع اروح على ابوه اخلي يكتله يغارون منج عبنج احلا البنوات
بعدني ابجي من رجلي تحركني طلع فلوس بعدها جديده من جيبه ويطكطك بيها من ششفتها مسحت دموعي
ضحك ... اهااا يا ملعونه طبتي بعد متوجعج
هزيت راسي اي طابت بعد متوجع هسه اطلع اغور بيها رائد عبن جديده اطكطك وهو فلوسه مشكوكه وملزوكه بلزاك شفاف ويجذب علينا يكول جديده
