حكاوي بالعامية

اسكربت ٦

بداية التزامي كنت مُنتظرة إن ماما تفرح بيَّ وتشجعني لما تلاقيني بختار لبس واسع وطولت حجابي، لكن للأسف كانت دائمًا بتسخر مني وتكسرني بكلامها، إلتزمت وأنا في سنة تانية اعدادي كان عندي حوالي ١٤ سنة، السبب في إلتزامي واحدة أجنبية كانت كافرة واسلمت وهي عندها ٣٢ سنة بعد ما جربت كل ملذات الحياة المحرمة، مخدرات وزنا وسرقة وأعمال غير أخلاقية بتحكي كل حاجة حصلت في حياتها قبل الإسلام وكإنها بتحكي عن واحدة تانية بتقول لما اسلمت بقت تحس  إن كل حاجة حواليها بتحبها حتى الجمادات، بتقول إن رضا ربنا عنها اللي بتلمسه في كل أمور حياتها هو اللي مخليها تحس ان كل حاجة بتحبها، وبتحكي إنها كانت خلاص قربت تدخل في سكة الإدمان وكان عندها جار مسلم من دولة المغرب، مرة لاقها مغمي عليها في اسانسير العمارة خبط على جارته وخلاها تساعدها وتفوقها ولما فاقت كان بيكلمها وهو باصص في الارض استغربت من شخصيته كان بيخلي أخته تسأل عنها كل يوم وتزورها ولما شاف إن فيه ناس مريبة بتدخل بيتها بطل يبعت أخته عندها وأهداها كتاب عن الإسلام وتفسير المصحف بالانجليزي، بتقول إنها كانت مرة يائسة من حياتها ومخنوقة وكانت بتفكر تنتحر وهي بتدور على أي وسيلة تقتل نفسها بيها لاقت الهدية اللي جارها كان جايبها له بتفتح تفسير المصحف بالصدفة فتحته على سورة النساء عنيها جات على تفسير آية "وَلَا تَقْتُلُوا أَنفُسَكُمْ ۚ إِنَّ اللَّهَ كَانَ بِكُمْ رَحِيمًا" بتحكي إن الوقت كان متأخر بعد نص الليل بكتير راحت واخده الكتاب ورايحة تخبط على جارها وهي مش عارفة هتقول له إيه؟!

أول ما فتح لها الباب لاقت نفسها بتعيط وبتقول له حدثني عن اللَّه!

وبعد شهرين من إسلامها كان الشاب المغربي ده زوجها، لما بدأت تحكي عن لبساها وحجابها كانت بتتكلم بمنتهى الفخر، وقالت إن نسبة كبيرة من نساء الغرب مجرد سلعة بيروج لها زي المخدرات، بتقول إنها لما اسلمت وغطت جسدها بالكامل بقت تحس إنها شفافة لدرجة لما الناس كانوا بيتكلموا معاها كانوا بيقولوا لها احنا مش حاسين اننا بنتكلم مع مرأة، روحك النقية طاغية في حديثك.

لما اتفرجت على البنت دي وسمعت كلامها عن الإسلام تأثرت جدًا وفضلت اعيط وحسيت إنها مسلمة أفضل مني برغم إني اتولدت مسلمة وهي اسلمت بعد ما عاشت في الكفر اكتر من تلاتين سنة، حسيت وقتها إن حياتي لازم تتغير، بدأت بنفسي بقيت أحافظ على الصلاة في ميعادها، أول ما أسمع الاذان اتوضأ وأفرش المصلية واستقبل القبلة وأصلي وقبل ما أصلي كنت بقول يارب اجعلني من المسلمين معرفش ليه كنت بقول كده بس كان الدعاء ده طول الوقت على لساني، في الاول لما بدأت التزم أختي كانت بتسخر مني وتستهزأ بيَّ وتقولي بركاتك يا ستنا الشيخة، كنت بتعصب منها واقعد ابكي لوحدي، وكل ما كنت احس اني هكسل أو أضيع صلاتي ألاقي نفسي بفتكر البنت الاجنبية اللي اسلمت وأكرر نفس الدعاء يارب اجعلني من المسلمين