الحب هو أجمل شعور ممكن نعيشه في حياتنا، ربنا عز وجل لما خلقنا كان عالم احنا هنفكر ازاي وهنحس بإيه!
محرمش علينا الحب لكن وضع لنا حدود نلتزم بيها عشان الحب ده يكون سبب إننا نتغير للأحسن، مش يكون سبب في كسر قلوبنا ووجعها، أنا وبلال اتعرفنا من سنتين، عرفته بالصدفة كنت عند جدتي وكان خالي أيمن عنده ضيف، جدتي قالت لي خدي الحاجة الساقعة دي دخليها عند خالك جوا عشان عنده ضيف، دخلت كانوا بيذاكروا عشان تحضير الدكتوراه، خالي أخد مني الضيافة وعرّفنا على بعض.
دي اسراء بنت أختي يا بلال و دا أستاذ بلال يا اسراء صاحبي.
سلمت وخرجت تاني أقعد مع جدتي، كان عندي امتحانات أنا كمان ثانوي عام واخر سنة!
حياتي كانت عادية جدًا وكنت بروح عند جدتي دائمًا وقابلت أستاذ بلال هناك كذا مرة لما عرف إني ثانوية عامة قعد يسألني عن حاجات في اللغة العربية عندي في الدراسة ويسألني اسئلة صعبة وخالي بقى قاعد كاتم ضحكته بالعافية لاقيته بيقول له إيه يا بلال إنتَ هتتشطر على البنت اللي حيلتنا! روحي يا اسراء كملي مذاكرة يا حبيبتي ومتركزيش مع بلال هيخليكِ تكرهي العربي.
انتهت فترة الامتحانات وكنت مستنية النتيجة تظهر، بالليل كنت فاتحة الفيسبوك بكلم صحابي لاقيت بلال صاحب خالي أيمن باعت لي رسالة بيقول لي ألف مبروك على النجاح!
استغربت هو عرف منين! والنتيجة أصلًا لسه مطلعتش ولا نزلت على الموقع!
قال لي هو جابها من الكنترول وكتب لي الارقام كلها الفرحة مكانتش سيعاني وكنت مبسوطة بنجاحي، بس مستغربة هو ليه تخطى خالي أيمن وكلمني أنا على طول!
الموضوع عدى ومحصلش حاجة، بعدها لاقيته بيكلمني مرة تانية وبيقول لي عايزة تروحي كلية إيه؟ وبتفكري في إيه!
وبدأنا نتكلم كل يوم ويحكي لي عن الكليات ونظامها وإيه الانسب وأعمل إيه في الرغبات والتنسيق، بصراحة خوفي بقى قليل أوي وأرتاحت أكتر لما لاقيت حد بيوجهني للصح خصوصًا إني كنت خايفة ومش عارفة اخد قرار، لما نتيجة التنسيق طلعت وجالي كلية صيدلة فرحت أوي وأول حد جه في بالي عشان أقول له كان استاذ بلال، كتبت له رسالة اقول له على اللي حصل لسه جاية ابعتها لاقيته باعت رسالة يقول فيها إن هو كمان نجح وأنا أول حد يعرف، فضلت متنحة شوية!
هو كاتب إني أول حد يعرف بنجاحه! وأنا روحت أقول له أول واحد على نجاحي برضو! استغربت!
رديت عليه واتكلمنا ولاقيته فرحان جدًا بنجاحي وفرحان بالكلية وقال لي صيدلة كويسة جدًا ربنا يوفقك بس خدي بالك، إنتِ كده كده بتلبسي لبس محتشم وبتحافظي على نفسك لكن قلبك هتحافظي عليه ازاي؟
خدي بالك من قلبك وحافظي عليه، الرجال كلهم ذئاب ولكن بعضهم لم تحن له الفرصة ليظهر استذئابه، فعشان نحافظ على قلبنا لازم ناخد بالنا من تصرفاتنا وأفعالنا، خاصة انك داخلة علي مرحلة صعبة في القصة دي، حفظ قلبنا أهم كمان من حفظ جسمنا، قلبك ده تبروزيه، وخليها ترن في ودانك كل يوم، جسمك بإكتمال ستره الأمر انتهى لكن قلبك ملوش حواجز لو لم تضعي له الحواجز إنتِ، الدنيا باظت فَـ حافظي على قلبك ربنا يسترها عليكِ.
أنت تقرأ
حكاوي بالعامية
Короткий рассказحكاوي بالعامية ممكن نقول انها اسكربتات بس فيها فكرة شوية بمعنى أنها من أرض الواقع شوية مش خيال زي باقي الاسكربتات و حكاوي بالعامية هي للكاتبة أسماء شميس و لو دخلتم على الفيس هشتاج #حكاوي_بالعامية. هتلاقهوها موجودة.. و صدقوني حلوة جدا و هتتبسطوا لم...
