حكاوي بالعامية

اسكربت ١٩

- مفيش راجل بيحب بنت عشان شخصيتها بس.

-- طب ما أنا عارفة.

- امممم طب عارفة إننا كرجالة اخر حاجة بنفكر فيها لما نرتبط هي شخصية البنت!

-- لا مش للدرجة دي؟! أكيد بتهزر!

- لا واللّٰه مش بهزر، دي حقيقة أنا كراجل أول حاجة بتلفت نظري في البنت شكلها ومواصفاتها، يعني أنا بيكون عندي مواصفات معينة لشكل الزوجة اللي حابب ارتبط بيها، دي أول حاجة بتشدني، بعدين درجة القبول بعدين المستوى الاجتماعي والعلمي بعدين بقى شخصيتها واهتمامتها والبلا بلا ده كله، عارفة لو هي متوفر فيها كل الحاجات دي لكن شكلًا معجبتنيش ؛ فكرة الارتباط بتتلغي تمامًا من دماغي.

-- يا سلام!!!!! يعني لو لاقيت بنت محترمة ومتدينة وعلى خُلق عالي ومخلصة دراسة وبتشتغل وأهلها كويسين وهي إلى حد ما مظهرها مقبول مش هترتبط بيها عشان شكلًا مش عجباك؟!

- ايوه مش هرتبط بيها.

-- لا بتهزر !

- لا بجد، من حقي على فكرة.

-- حقك! امممم آها طبعًا حقك، بس فيه حاجة أنا مش فاهماها إنتَ بتقول إن لازم البنت تكون عاجبة اللي هيرتبط بيها وتكون جميلة واللي فهمته من كلامك انها لازم تكون جميلة جدًا يعني عشان يرتبط بيها أنا شايفة إنك انسان سطحي بصراحة وتافهه أسفة يعني، ازاي بقى بنلاقي نماذج كتيرة جدًا لرجالة ارتبطوا بستات عكسهم نهائي يعني مثلًا بيكون شكله جميل جدًا جدًا ووسيم وتلاقي زوجته شكلًا مش حلوة نهائي بالنسبة لمواصفات الجمال العامة لكن أخلاقها جميلة ومحترمة وشخصيتها كويسة وعندها كرير.

- كرير إيه لا فكك من الهبل ده، مين قال لك إني تافهه عشان عايز اتزوج واحدة حلوة! دي مش تفاههة دا حقي على فكرة، بس إنتوا فاهمين كلمة واحدة حلوة دي بطريقة غلط، يعني إنتِ صنفتِ الزوج الوسيم ده على أي أساس! عشان شكله؟ وصنفتِ زوجته برضو على أساس شكلها؟ طيب مين قال لك إنه شايف نفسه حلو!  بالعكس ده الراجل الوسيم جدًا جدًا جدًا اللي إنتِ بتتكلمي عنه ده ممكن يكون شايف نفسه مش حلو أصلًا وزوجته اللي مش عجباكِ دي ممكن في نظره تكون أحلى وأجمل وأكتر ست جذابة شافها في الحياة عشان كده قرر يرتبط بيها بعيدًا عن شخصيتها وكريرها وشغلها وطموحاتها والهبل اللي بيعجنوه في قنوات التليفزيون والميديا ليل ونهار ده.

-- يعني أنتوا مطلعتوش تافهين زي ما كنا متخلينكم؟!

- لا واللّٰه احنا كرجالة ناس عميقة جدًا لدرجة إننا متعايشين في مجتمع مليان ستات مسترجلة ومع ذلك راضين وساكين اهو شوفتي حد اتكلم مننا ولا اشتكى حتى؟!

-- على أساس إنكم تقدروا تتكلموا أساسًا!!

- مثلًا!

-- شوفت!