جوازي من هشام مكنش بدايته قصة حب، كنا زي أي اتنين ربنا جمعهم سوا عشان ليهم نصيب مع بعض، اللي اكتشفته بعدين إن قصة الحب دي مجرد وصف بسيط جدًا لعلاقة ورباط مُقدس بيجمع راجل وست قرروا يكملوا سوا حياتهم مع بعض، قرروا بعقلهم واختاروا قبل ما يختاروا بقلبهم.
...
مش هكذب وأقول إني بنت مميزة وشديدة الجمال أو أو.. بالعكس أنا بنت عادية جدًا زيي زي ملايين ملايين البنات في العالم، خلصت دراسة واشتغلت ولما شاب شافني مناسبة له، قرر يتقدم لي، هشام هو كمان مش الشكل المميز جدًا ولا الرول موديل اللي كل بنت بتحلم بيه، شاب عادي عايز يتزوج ويكوّن أسرة.
الحياة لو كانت فضلت ماشية بينّا بالشكل ده وإني مستصغرة كل حاجة فينا وكل حاجة بتجمعنا كده مستحيل كنا نقدر نكمل، تقريبًا كنا هنموت من الممل، لأننا مش عاديين، احنا بشر، بنحس، كل إنسان عنده مشاعر، محتاج يغلط عشان يتعلم ويصيب ويعدل الصح عشان يحس بإحساس حلو يخليه يقدر يكمل حياته وهو راضي مهما كان فيها نقص بس مع ذلك راضي وقابل فيها بكل شيء للدرجة إنه يبقى قابل عيوب شريكه وقادر يتعايش معاها.
...
من أول يوم بعد جوازنا، حسيت إن البنت الرقيقة اللي كانت في الخطوبة بدأت تختفي واحدة واحدة، والشاب الجنتل اللي كان ذوق وبيتكسف بدأ يختفي واحدة واحدة، مبقيتش فاهمة ايه اللي بيحصل؟
...
هشام هو احنا اتغيرنا ولا دي أصلًا حقيقتنا وكنا بنمثل على بعض؟
لا متغيرناش ولا حتى كنا بنمثل، احنا كنا بنتجمل، بس تقريبًا لما بدأنا نقرب المسافات كل واحد فينا بقى حابب يبقى على راحته أكتر، المهم محدش فينا تكون راحته دي مضايقة التاني!
طب أنا مضيقاك؟
لحد دلوقت لأ، شايف إنك مش أوڤر وتصرفاتك عادية، مش مستغربك ولا مفتقد شخصيتك من أيام الخطوبة
أنا كمان مش حاساك إنك غريب، ومش مضايقة منك، بس ساعات راحتك دي بتتعبني في التنضيف شوية
اممممم هو ممكن دلوقت اعمل حاجاتين، ممكن اقول لك إنك إنتِ اللي مهملة ومش قادرة على خدمة بيتك وأعكنن عليكِ فإنتِ تنكدي عليَّ وتبقى ليلة طين، وممكن أقول لك لو كان عاجبك، بس أنا عايز أقول لك حاجة تالتة خالص ودي يمكن لأول مرة اقولها عن نفسي أنا أسف لأني فوضوي جدًا ومعنديش الاستعداد النفسي إني أفضل انظم كل حاجة من بعدي تاني زي ما كانت، هحاول إني أظبط ورايا وكده بس موعدكيش.
...
بدأت حتة كانت مضلمة في دماغي تنور، لو بدلنا كل حاجة مش قادرين نعملها باعتراف صريح هيكون أحسن من إننا نرمي اللوم على بعض، كان عاجبني أوي إنه صريح حتى لو كانت صراحته دي هتتعبني، بس كنت ببقى مرتاحة وأنا حاسة إني بعمل اللي عليَّ.
أنت تقرأ
حكاوي بالعامية
Povídkyحكاوي بالعامية ممكن نقول انها اسكربتات بس فيها فكرة شوية بمعنى أنها من أرض الواقع شوية مش خيال زي باقي الاسكربتات و حكاوي بالعامية هي للكاتبة أسماء شميس و لو دخلتم على الفيس هشتاج #حكاوي_بالعامية. هتلاقهوها موجودة.. و صدقوني حلوة جدا و هتتبسطوا لم...
