Isang papel ang nagpapatunay
Na ang sa ating dalawa ay iba ang pakay
Pagsasama natin ay agad ding hihimlay
Sa tayog ng nais ako'y nagpaakay
Buhay kong puno ng sakit at hirap
Isang kasunduan ang saki'y iyong iniharap
Kahit na ba tingin ko dito'y kay saklap
Dahil pulos sakit at tila walang sarap
Tila mas dusa pa ang aking pinili
Sa mga desisyong ni hindi nilimi
Ang mga kasunduang wala man lang kimi
Nagpatangay agad ako at 'di inisip ang mangyayari
Nagsimula lahat ng lapitan mo ako
May ngiti sa labi mong sa aki'y nagpatuliro
Nangarap agad ako ng ibang mundo
Magkasama tayo at sa saya ay puno
Inilahad mo ang iyong kailangan
Kasama ang pursigido at matalik mong kaibigan
Na kailangan mo ako upang pamanahan
Upang mapunta sa'yo ang sanglaksang kayamanan
Dahil sa gipit at kailangan ng pera
Sa mga salita mo ako'y nagpadala
Isang taon ang nakasaad sa kontrata
Na tulungan at pakasalan ka
Hindi ko tukoy kung bakit ako ang napili
Samantalang marami naman sa'yo ang kumakandili
Lasing ka lang ba o sadyang may sapi
Bakit ako na anak ng iyong tagasilbi?
Bata pa lamang ay kilala ka na
Tinatanaw sa malayo nitong mga mata
Nasaksihan ang papalit-palit mo ng dalaga
Tuloy sa pagmamatyag kahit nasasaktan na
Isang pangyayari ang sa aki'y nagpabaon
Talagang kay lupit sa akin ng panahon
Ang mapagaling ang ama ang naging aking misyon
Kahit harangan man ako ng sibat o ng kanyon
Nabalitaan mo pala ang aking pangangailangan
Kaya ako ang napili mong lapitan
Ang sabi mo'y maari tayong magtulungan
Upang ang mga nais ay ating makamtam
Agad na pumayag at sayo'y nagpakasal
Kahit na ba ang totoo ay isa itong sakal
Baka tunay na saloobin ko'y iyong makalkal
Kahit balutin ko pa ng makapal na trapal
Mabatid mo ang nilalaman ng puso'y nakakahiya
Aba! Sino ba naman ako para mahalin ka
Ang makasama ka sa isang taon ay sadyang dusa
Abot kamay na kita ngunit nadadaanan lamang ng iyong mga mata
Nakakapagtaka lamang ang iyong ikinikilos
Bakit pakiramdam ko ika'y nagseselos?
Nakita mo ang kapatid mong ako'y hinaplos
Nagalit ka agad at nagpadalos-dalos
Walang salitang siya'y iyong sinuntok
Nag-aapoy na mata mo'y sa kanya nakatutok
Hinatak mo ako patungo sa isang sulok
At nagulat sa paghalik mong tila may paputok
Hindi nakakilos at nakahuma
Ang nangyari ay isang panaginip lang ba?
Ayaw kong magtanong o magsalita
Baka iniisip ko ay isa lamang maling akala
Mga nais itanong ay talagang naipon
Dahil ang nangyari tila mo lang itinapon
Ilang araw na lang at tapos na ang isang taon
Mula sa imahinasyon ko'y ako ay umahon
Sadyang isang kontrata lamang ang satin ay nagbibigkis
Ang pagtrato mo sa aking estranghero ay aking tiniis
Umasa akong ang pait ay magiging tamis
At maging totoo ang ating pagbibigkis
Handa na akong lumisan bago pa dumating ang mismong araw
Baka sa katangahan ako'y maging matakaw
Hindi ko na hihintayin ang mismong araw
Na matatapos ang panaginip kong tila babagsakan ng bulalakaw.
●●●◎●●●
© March 2015
J.Bree
