٥٤
اخر ربيع
مساء الخير
وكعت من طولي ماحسيت
علئ نفسي اله رجال يحجي وياي
بنتي انتي زينه
فتحت عيوني واني اكوله اي
الحمد الله وكفت علئ حيلي
اباوع نفسي بمحل او مكتب
كاعده على قنفه والرجال يمي
عدلت نفسي
وتشكرت منه و
ورجعت للبيت مخيم عليه الحزن
دخلت وتكلاني يوسف حظنته هو يحجي وياي
شون بعد كم يوم إله اخذوك منو يتلكاني
بعد
ظليت شايلته واني متعلمه اجيبله ويأي حلويات
افتحله بلنستله والجكليت
ظل ياكل واني رحت سبحت
وطلعت كعدت بالغرفه اجتي ساره كالت تتتغدين
رفضت
سألتني وحجيتلها
عافتني وراحت ومقهوره
بقيت يومين بالبيت مارحت للدوام
وكلما يدك الباب اكول اجوا يأخذوا مني
بالفعل اجه هو وياه شرطي ورقه المحكمه
وهو بقئ بسياره
والشرطي بلباب واجتي امي كالتلي وبديت احضر ملابسه
تالي كلت خليهم عندي
اكيد مايردون ملابسنا احنه الفقيره
وعفاف تشتريله علئ ذوقها
بدلت الجنطه بجنطه زغيره
وبدلته وانطيته لامي
أخذته واني صعدت فوك ظليت اباوعله
من. السياج. نزل بهجت واخذه هو يبجي
هو يسكت بي
والشرطي سلم امي ورقه وصعد ويه بهجت
ظليت اباوع الئ أن راحوا باوعت للسماء
والشمس عاليه
وظليت ادعي ربي ياخذ حقي منهم
الئ أن حركتني الشمس ونزلت لكيت امي تصلي
وتبجي
اووف هاي اني ورثت منج شلعان الكلب
علئ الأقل امي يجوز احسن مني
أبويه مات وبقينا احنه محد طالب بينا وبقينا بحظنها
البيت هدوء ومابي روح يوميه هو سوالفه تخبل
مالي علينا
صار اليل واني اباوع علئ فراشه فارغ
ظليت بس اتكلب ونار بصدري واني اباوع علئ الساعه
وقت كعدته اني هم اكعد
يارب كون يسمعوا من يكعد ويسوله ممه
مو يخلوا يبجي لو جوعان
صبح الصبح واني عيني علئ الساعه
بقيت يومين واني مريضه بس نايمه
ثالث يوم أتحسنت شويه كلت اروح للشغل احسن
اخاف هم يجيبون موظف مكاني
رحت بس الحمد الله المدير ماكل شي
رجعني وباشرت بدوامي عادي
لظهر بوقت الاستراحه
خابرت من تلفون المعمل علئ المكتب
دكيت الرقم كم دكه وأجاني صوته المقرف
سديته بوجهه ماحجيت
بقيت ساعه هم رجعت دكيت اكيد هسه طلع
دكيت اجاتي صوت شاب
كتله اريد أركان
اني أركان تفضلي منو وياي
اني اسيل ام يوسف
اهلا اسيل
عفيه أركان كولي شونه يوسف زين
الحمد الله زين
شوكت شفته
والله البارحه احنه عدهم
اني وأهلي كلهم تعشينا يمهم
يبجي أو ساكت
ساكت شايله ابوه ومرات يلعب ويه ولد عمي
عفيه أركان طمني عليه ودير بالك عليه
أن شاء الله بدون ماتوصين
سديته منه
مسوين عزيمه فرحانين ومنتصرين يسون عزايم
واني اليوم
يمر عليه بلقهر علئ فراكه
رجعت السماعه وكعدت علئ كرسي قريب علئ المكتب غطيت وجهي بأيدي
كان المكتب فارغ من خابرت
بقيت هيج
الئ أن اجاني صوت هشام
هلوو اسيل
بيج شي
باوعت عليه
لا مابيه
عفته ورحت علئ شغلي
صاح عليه ابقي اسيل لاتشتغلين اله تعبانه
شكرا هشام
ودخلت للقاعه
