فصلية لواء

23

،،،،،،،،،،،

الخذلان.. عدوي الأكبر في الحياة
لايفارقني يجذبني دوماً في صراعات
يعلم فيها انه الفائز بها
لقد خذلت من الجميع
كل من مر بحياتي
لم يتساهل معي احد
لم اعد احتمل تلك الدائرة المهلكه التي تحتجزني
كرهت ثوب الضحيه الذي لاارتدي سواه
لم يعد يلائمني بل اصبحت اختنق بداخله
يكفني مامضئ.. طوال حياتي وانا هاربه
اتسلل في جنح الليل.. اتوارئ عن الانظار
اتفادئ الحياة وأخشى الطرق المضاءة الكبيره
اجد نفسي الجأ دوماً إلى الخفاء
لكي احصل على ما أريد
قائمه طويلة من الخيبات والانكسارات
ودوما اتقن دور الضحيه ببراعه
اركض من خوف لخوف اكبر
ومن مصيبه لكارثه مخيفه
انا خانعه للجميع الانفسي
انا من تألمت كسرت وهزمت 💔

،،،،،،،،،،،،،،،،
،،،،،،،،،،،،،،،

زينب،، مصدومه من منظر الدم
واكفه بمكاني واصيح لواءء اگعدددد
خطيه فز مرعوب طفر يمي
لزمت ايده ايدي ترجف
يسالني شبيج؟؟
مامنتبه للنزف
اشرتله فتح عيونه وبسرعه ركض انخبص مايعرف شيسوي
لازم دشداشته وسويجه ومحفضته بيده
يريد يندل يلبس الدشداشه ارتبك مايعرف شيسوي
لبسها واجاني
لواء،، لتخاافين گوولي ياالله انشاءالله ماكو شيي
زينب،، بسرعه راح فتح الكنتور طلعلي ملابس
هو بيده لبسني حيلي يختض
حط عباتي على راسي
ردت امشي ماقبل شالني ينحثل بيه
نزلنه لجوه هو يصيح يماااا نذيررره
كلها نايمه طلعني للسياره نيم الكشن وگعدني خلاني مبطوحه
ركض البيت نذيره حتى تروح وياي لان وحدي لازم مره تروح وياي
شويه وطلعت اشوفها من بعيد لازمه راسها
عافها واجه يركض
تحسه يريد ينفجر شغل السياره وشخطها
اذا الطريق ساعه من سرعته سواه دقايق
كل شويه اگول دخيلك ربي راح تنگلب بينه السياره
اخذني للمستشفى وحدي لاام وياي ولااخت ولاعمه
رحت بطرگ روحي صدگ انهضمت
بهيج موقف المره تحتاج وياها حبايبها يطمننها
اله اني حتى حبايبي ساگماتني سگم
وصلنه للمستشفئ بااللف ياالله
راد يشيلني گتله فشله وادم واگفه اني امشي على كيف
لزم ايدي ومشاني دخلنه للطوارئ مالگينه غير ممرضات
وحده تشمرنه ع الثانيه لان مبينات صغار وبعدهن جدد مايعرفن شي
لواء يحجي وياهن بعصبيه گالهن مستشفئ مابيها دكتورره؟؟
الممرضه گالتله اكو دكتوره تلگاها موجوده بصاله الولاده بس ماكو سونر
لواء،، زين المريض اليجيكم بي مصران اعور اشلون تكتشفون علته؟؟
تاخذوله خيره مثلا؟؟

زينب،، گوه واگفه تالي اجه رجال سلم على لواء ومبين يعرفه سأله شكو شعندك اهنا لواء گاله زوجتي حامل واتخربط وضعها واريدلي دكتوره تشوفها
الرجال اخذنه الصاله الوالده بعدنه موكلش قريبين عليها سمعت اصوات الصريخ بفلس
انقبض گلبي خفت ولزمت دشداشه لواء من ضهره التفتلي شاورني
لواء،، لتخافين ذني بشهرهن عدهن ولادة انتي بعده توه شهرين اذا تعطسين يطلع من خشمج
بس انتي كلشي مابيج انشاءالله فوتي واتوكلي على الله
زينب الممرض مبين يعرف الدكتوره والممرضات الموجودات بالصاله دگ الباب طلعتله السستر
گالها صيحيلي الدكتوره فلانه دخلت الابنيه شويه وطلعت الدكتوره مره جبيره
حجه وياها الولد گالها هاي مرت اخوي وضعها متخربط شوفيها
الدكتوره حطت ايدها على ضهري تريدني افوت من الخوف عيني تشكلت على لواء اتمنئ يفوت وياي
الدكتوره،، حبيبتي انزعي عباتج انطيها الزوجج
زينب،، الممرض كال الواء اني رايح للطوارئ شتحتاج اني يمك
دخلت لجوه عبالك مجزره صايره من خوفي ولاول مره اشوف هيج منظر جدامي رجل اطگ برجل نسيت حتى الالم
اخذتني للسديه. نمت گالت. مااگدر افحصج راح اشوف نبضه بالجهاز واخذلج سونر
حطت الجهاز على بطني اسمع وشوشه ضعيفه
الدكتوره،، هذا نبضه ماما بس كلش ضعيف
شگد على حسابج؟؟
زينب،، اخر سونر اخذته اول ماحبلت انطيتها التاريخ
حسبتلي بيدها ورجعت اخذت سونر
گالت
الدكتوره،، بنيتي انتي بداية شهر الثالث
وصاير عندج فطر بالجاره سببت النزيف
شايله شي ثگيل؟؟
مشتغله شي؟؟
زينب،، هزيت راسي بمعنى اي
الدكتوره،، مايصير ياامي ذني الاشهر الأولى لازم تنتبهين على وضعج كون حتى درج متصعدين
هسه راح اكتبلج علاجات ومثبتات تاخذوهن من الصيدليات البره مو من المستشفى لان ماراح تلگين اهنا العلاج الاصلي
راح اكتبلج وقت العلاج والجرعات حتى ماترجعين لهنا وعلى كيفج ويه نفس اهم شي الراحه
وابد ماكو اقتراب بينج وبين زوجج
زينب،، انطتني الوصفه عبالك مطيتني شهادة النجاح
حمدت الله وشكرته بداخلي
طلعت لواء واگف بمكانه ينتظر
ولازم عباتي بيده
من شافني ملامح وجها تحجي يريد يعرف شنو گالت الدكتوره
لواء،، بشري
زينب،، اتكول فطر بالجاره ونبضه ضعيف بس اذا ارتاحيت راح تلتحم الجاره وكلشي مابي
انطيته الوصفه گتله الدكتوره تكول اخذوها من بره مو من الصيدليه مال المستشفى
لزم ايدي يگودني للسياره كتله احس روحي زينه ارتاحيت لان گالت الطفل كلشي مابي