طبخاتي 😍

دولمه😍❤

مساء الخير  صار هوايه ممنزله شي بس مالي واهس انشر وهمين اغلب الاشياء الي اسويها تكون منزلتها من قبل

اليوم دولمه طيبه حامضه مقادير سهله

المكونات الرئيسيه..... 

سلگ منضف و منگع بمي حار حت يذب نفسه
راسين بصل حجم متوسط ينشال الكشر مالته ونگص من الوسط للنص مو تسونه نصين همين نسلكه زين

نجي للحشوه...

راسين بصل گبار مثروم ناعم
باگه كرفس مثروم ناعم
الي يحب يضيف باكه شبنت همين مثروم ناعم بس اني ماحبه فماضفته
لحم مثروم حسب رغبتكم
تمن كلاصين منگع نص ساعه
نخلط زيت زيتون مع زيت عادي نص كلاص
3 خوشيگ معجون طماطه
ملح خاشوكتين
البهارات
فلفل اسود نص ملعقه
بهارات منوعه نص ملعقه
لميمندوزي ملعقتين ونص
دارسين نص ملعقه
بابريكا بارده نص ملعقه
سماگ ملعقه كامله
بهارات دولمه ملعقه كامله 
ثوم مطحون ملعقه كامله
ونخلط المواد كلها سويه
نحضر الگدر نخلي شويه دهن وبصل يتحمس ونطفي النار نضيف عضود السلگ ونبلش نلف ونحشي الدولمه 
بعد ما كملنه نرجع الگدر ع طباخ على نار متوسطه لحد ماشويه ينزل ميه من الحروره بعدها نضيف صحن ع سلگ ونضيف مي كوبين ونص نخلط وياهم معجون و شويه لمندوزي اذا تحبون الحموضه زايده ونغطي على نار متوسطه بعدها نار هاديه مده ساعتين او اكثر شويه حت تلچع من جوه وهيج صارت جاهزه والف عافيه وسهمكم العافيه 😍❤