طفلته

البارت الاول ( بدايه النهايه 💔)

تصويتكم وتعليقاتكم تفرحني ❤

القلب يحزن والمدامع غزيره في جوفي نارا من لهبها تبكيت والدار ظلما كانت أمي تنيره يايمه وينك من دونك خلا البيت قلبي تفطرعلى الفرقاءالمريره أمنت بالله وباأقداره ترضيت.

......

طفلته ...
خلونه نعيش بالماضي شكم سنه احجيلكم عن حياتي وطفولتي
طفولتي !! اي ليش لاا هه غير اني هم جنت طفله حالي حال باقي الناس ؟
امي وابوي واخ وحيد
عمري تقريبا ٧ سنوات واخوي عمره .. اشش صبرو هسه اكولكم شكد عمر اخوي
امي جانت انسانه طيبه الى درجه صعب واحد يتصورها جانت طيبه وسمينه .. اي وزنها كلش مرتفع اكثر من ١٠٠ كيلو بس خطيه كلها جانت تتنمر عليها شسمنج جنج امل طه
خطيه ماما جانت تضوج وتنقهر وجنت بس اني عدها حملها بصعوبه بسبب زياده الوزن
بابا رجال فقير مو فقر فلوس لا خير من الله بس كلش طيب وخلوق وما يحب القال والقلت
وجان يحب ماما محبه عاديه
خير بابا كله سببه خوالي لان من تزوج امي اشتغل ويا خوالي وشاركهم والخير زاد وزاد
طبعا اهل ابوي هواي كلش ٧ عمام عندي وعمات اثنين
وجدو متوفي بس بيبي عايشه
وعمامي جانو كل واحد متزوج وبيته لحاله
وكل واحد شغله وحده الي عنده محل قماش والي يشتغل اسطه بناء والي عنده محل كهربائيات والي عنده محل حاجه بالف
المهم محد محتاج الثاني
بيبي جانت تنحاز ل ابوي وهو كلش يحبها لان الزغير
وجان بار بيها كل جمعه يروح الها وينطيها مصرف وحتى يدخلها للحمام يسبحها لان عماتي متزوجات بغير محافظات وجانت بيبي ما تطلب من جناتها شي مره جبيره وعدها سكر وضغط وعدها سوفان متكدر تمشي وكله متمدده
جانت حياتنا حلوه وهادئه ماما مسالمه ومعدها قيل وقال
بيوم من الايام ..
فاطم .. شلون بيه داده اموله سمعتي الدكتوره شكالت ؟
امل .. اي سمعتها كالتلج لازم تنزلين وزن حتى تكدرن تحملين لازم شحوم مغطيه الرحم .
فاطم .. شلون بيه والله سويت رجيم ومجاي يفيد شتكولين اشرب منحف ذاك اليوم شفت جوارينه صايره جنها سلبوح من الضعف سئلتها كالت يا ما اشرب شي بس رجيم لحد ما مرت حماها بعرس بنت ام حسين كالت ختولي يا رجيم غير جاي تشرب كبسول منحف
امل .. والله شكلج خاف مو زين عليج لو بي مضاعفات ؟؟
فاطم .. لا ما بي شي اشرب وعلى الله مليت اريد اضعف واجيب اخ لترف
...........
اني ترف وفاطم هيه امي وامل خالتي
راح اعرفكم ع الكل من ضمن احداث قصتي
مررت الايام وماما بلش وزنها ينزل شويه بس جانت تتعب هواي وبسرعه تصير شفتها بيضه
جنت طفله بس عقلي جبير وافتهم واشوف امي شلون تعاني وتتحمل تعب بس حتى تحمل
ابوي مجان يلح بموضوع الاطفال بس هم مجان يعارض
بيوم راحت ماما وخاله امل للدكتوره واني بقيت ببيت خالتي ويا بناتها و ولدها
الدكتوره .. مبروك عيني فاطم انتي حامل بشهرج الثاني شعجب محسيتي
فاطم .. صدك دكتوره !! والله اني حامل
جنت شاكه بس ماردت احجي لحد ما انتي تنطيني الخبر الاكيد
الحمد الله والشكر ربي على هاي نعمتك
الدكتوره .. حبيبتي الله يتمملج على خير وتولدين بالسلامه ان شاء الله .
ما احجيلكم عن فرحه بابا وشلون كعد يسولف ويا امي عن الحمل وليش ما حجتله
مرت الايام وماما حامل بولد
وصار وكت الولاده
كل ايام حملها خلصتهن تعب بتعب ودائما مريضه بس ما تشكي ل ابويه بالعكس ابد ما قصرت ويا وكايمه بواجبه ومداريته
ساعه ١ بعد منتصف الليل
اخ يمه ظهري يمه بعد ما اتحمل يا علييي دخيلك يا عليييي
حسن اكعد الحك عليه اااخخخخخ
ولج يمه
ها فاطم شنو شبيج ؟؟
راح اموت يمكن عندي ولاده بسرعه خابر اختي امل .
صار صار هسه يا الله يا الله يسر ولا تعسر
الو ام جنه خويه لحكي علينه فاطم عدها وجع
ابو ترف الحك وديها للمستشفى واني جايتكم
اوك خويه لا تجين انه راح اجيكم هم اخلي ترف يمكم وهم اخذج ويانا للمستشفى
يله استعجل استعجل
.............
مرات هواي ترجع بيه ذاكرتي لعيشتي قبل
لحب اهلي للدلال
صدك البنت تدلل بجال الام والاب
بسسس الي معدها حظ تفلس من اهلها وتعيش ذليله طول عمرها 💔
..............
ااخ والله ماكدر اتحمل الالم شلون بيه
تحملي فاطم هانت وصلنا وصلنا صيري سباعيه
ام جنه .. يا خويه هلا بيكم يله جايه جايه
نزلت اني ودخلوني ببيت خالتي وهمه راحو للمستشفى بعد نا راحت وياهم خالتي ام جنه
مرت ساعات طويله وتعبنا من كد الاتصالات والتفكير والخوف
وراهالتعب اجه بابا وجهه تعبان كلش ومبين عليه القلق
ركضت عليه وين ماما
كال ولادتها صعبه كلش وراح يسون الها عمليه بس يردون ضغطها ينزل
واني جيت اخذ فلوس وكلت امر اشوفج
شلونج باباتي زينه ؟؟
اني زينه بابا بس خطيه ماما هسه جاي تتوجع مو
حبيبتي ادعيلها
يله اني اروح لا تسوين وكاحه
بوسني بابا وراح واني غفيت مادري شكد من الوقت كعدت على صوت هوسه وصياح والدنيا مخبوصه
جنت طفله ممستوعبه هيج وضع ولا مار عليه ولا عايشته
هوسه وجادر وسواد ونحيب
لزمني وجع بكلبي حسيت نفسي مو طفله لا بنت جبيره بجسد طفله على كد الوجع الي عشته
ليش اني تموت امي واعيش يتيمه وليش وليش وليش
ماحب تفاصيل الحزن توجعني روحي من اذكرهن
راح اتخطى العزا وها الايام الي ما اتمناها لا تنذكر ولا تنعاد
جنت صف ثاني ابتدائي عمري ما يتجاوز ال ٨ سنوات من حملتني الدنيا فوك طاقتي .
رجعنا لبيتنا بس نفس العدد بتغير الاشخاص فقط
اب واخ والام ماكو
جان والدي يحاول يسوي كلشي يكدر عليه حتى يخلينا نحس بغياب الام بس شتتوقعون اكو شي يعوض حنان الام !! اكو شي يسد فراغها !!
عدت ع وفاة والدتي سنه
بهاي السنه كبرت سنه بكل يوم جنت اعيشه
اخوي جان عد خالتي خلال هاي الفتره لان زغير ومحد يراعي واني جنت الصبح اكعد ابدل والم شعري بطريقه تضحك لان ما اسيطر عليه جان كلش طويل وخالتي كل يومين جانت تكلي تعالي اسبحج وامشط شعرج حافظي ع شعرج امج تحبه
جان اغلب اكلنا من بيت خالتي ومن برا
يجي ابوي جايب كلشي ويقسم النا نص ولبيت خالتي نص جان يكلي ام جنه ماكدر اجازيها
حتى زوجها كلش حباب ويحبنا ولا يوم سمعنه حجايه لو سمعت منه تذمر او ملل
بيوم من الايام جانت خالتي جايه يمنا هيه وزوجها والجهال
صادف يوم جمعه وابوي الجمعه ما يطلع للشغل
خالتي نظفت البيت وغسلت الملابس
جنت شايله جود اخوي الزغير
وافتر بي واباوع اله شعره كلش حلو وضحكته تشبه ضحكه امي وكلش متعلق بخالتي بحيث اني شايلته وهو يصيح الها ماما . وترد عليه تجاوبه هسه حبيبي كملت يماما .
صبينا الغده وكملنا
كعدت خالتي تصب جاي وتحجي ويا ابوي وهو منتبه لحجيها
ابو ترف شنو رئيك تشوفلك بنت حلال تلم بيتك وجهالك والله ما متعاجزه من اي شي حتى جود يبقى عندي بس اني احجي على مودك
صفن بابا وهز راسه بمعنى اي
كالت اله عندك وحده ببالك .. جاوبها لا والله ماعندي شوفيلي على عرفج
اني اسمع الحجي واكول لنفسي يعني شنو راح تجينا ام جديده ؟؟
ليش بابا بسرعه قبل غير جان يحب امي ؟؟
بقت هواي تساؤلات براسي بس ساكته ما احجي
مبينت اي رد فعل .

.................
مرور زمني ( ٣ اشهر )

ترف وينج باباتي بدلتي
ها بابا بدلت
ليش ملابسه بدلتج الجديده ؟؟
ماريد هاي ملابسي حلوات
بابا ترف الحياة تمشي وكلنا على طريق والدتج
دنكت راسي والدموع تجمعت بعيني
طلعنا وبابا سكت محجى يمكن اصلا باله مو يمي هه
اخوي ببيت خاله وصلنا الهم العرس جان بس الكرايب والعروس كرايب امي عود خالتي ذاك الوكت
فكرت تجيب ل بابا عروس كرايب ومنها وبيها حتى لتاخذ حلال ومال ابوي وتكون حنينه علينه وتخاف الله بينه
جابت اله بنت باكر بس عمرها ٣٠ مو زغيره وشكلها عاديه وجانت من عائله بسيطه بس بعمري مشايفتها ولا اعرفهم
اليوم صدك حسيت باليتم
اباوع لخاله عيونها حمر ولابسه اسود وترسم ع شفتها ضحكه وجع
اخذنا خاله وجود وطلعنا شكم سياره لبيت العروس
بابا الضحكه شاكه حلكه وعبالك شاب
يعني هيج الانسان ينسى بسرعه شريكه حياته وحبها وصبرها وكلشي سوته اله ؟؟
اووف ماما تعالي شوفي بيتج منو راح تاخذه وشوفي رجلج شكد متونس .. بيومها كلششش كرهت بابا او مو كره يمك وجع بطعم الكره يمكن قهر يمكن خوف

جبنا العروس واجينا وحبايبها صفك وهلاهل والي يوجع اكثر بابا ابد متذكرني اني وجود !!
خالتي شايله جود واني يمها لازمه طرف عبايتها الي مليانه سواد بلون الحزن الي مخيم على كلبي وكلبها💔

وصلنا للبيت ونزل بابا وزوجته
وخاله كالت ترحون وياي ها الكم يوم حبيبتي ترف ميخالف مو ؟؟ هزيت راسي موافقه

رجعنا لبيت خاله وبقينا يمها اسبوع
جان بابا ابد ما يجي بس يخابر على خاله بين يوم ويوم ها شلونهم وبسس
هذا ابوي هيج ؟؟
خاله جانت تضحك جذب وتحجي وياي عبالها اني طفله متدري عقلي كبر قبل جسمي وكلبي بلشت علامات الحزن تاكل بي
حبي ترف بابا مشتاق الكم وراد يجيي ياخذكم بس اي ما قبلت اريد اشبع منكم
خاله ماريد اروح ابقى هنا
يروح خالتج هذا بيتج وذاك بيتج وبيت امج وبيت اخوج دير بالج تفرطين بحقج
ترف انتي بعدج زغيره ماريدج من هسه ضعيفه ؟؟
هزيت راسي بس مكدرت الزم نفسي وكعت دموعي عبالك جنت منتضره شي او سبب حتى ابجي
حضنتني خالتي وبقت تشم بيه وتبوس بشعري
اوف ياريحه امج لا تبجين اني وياكم
اني امج وسندج وامانج خلي هالشي ببالج .

..........................
اليوم السابع مال عرس بابا خاله كالت يله امشو نروح لبيت امكم
دائما خاله جانت تكول هالكلمه بيت امكم وبعدين عرفت شنو تقصد بيها

دكينا الباب
فتح بابا الباب واجت العروس لابسه مشلتح ومكياج طن وركبتها زركه واديها زرك
اني جنت اباوع بس ما افهم شبيها
بس اسمع خاله تدردم شنو مراهق ميستحي

ها ام جنه هلا بيكم شنو جبتي الجهال عود كلت بالليل امرلكم اعذريني
لا خويه ميخالف بس همه اشتاقولك وجبتهم

يله من رخصتكم .. مطولت خالتي يمكن دقايق بسس

رادت تطلع جان صاحت وراها هناء

................

يتبع

لهنا انتهى البارت الاول

انتضروني ❤