طفلته

البارت الخامس ( هروب مشروع )

السلام عليكم حبيباتي كلش اسفه تاخرت عليكم بس جنت كلش مضغوطه بشغلي وتعرفون وضع الشغل والتوصيل والحضر

فدوه لكلبكم لا تنسون التصويت والتعليق والمنشن كلش يهمني ❤❤❤❤

_____________

سمعو هذا الشعر 💔

عمه نقدم شكوى عليه هو ومرته
لا يمه خل ترف تحجي ونفتهم منها
ترف .. صح ابوي ظلمني بس حسيتها صعبه اشتكي عليه ضليت اتمتم بالحجي ويا خالتي كتلها لا ما اشتكي
ولج يمه اشتكي خل ناخذ حقج
لزمت ايد خالتي ب ايدي الثانيه وضغطت عليها وعيوني تتوسل بيها فدوه خاله لا تعوفيني
اخذج وياي لو اعرف الدنيا تنكلب شلون اعوفج
شويه وراح الولد والشرطي ودخل ابوي  وهنااا جانت الصدمه الي مراح انساها طول عمري .
يله ترف كومي وياي
ام جنه . ترف تروح وياي مالها ضله يمك مع الاسف عليك ما صنت امانه فاطم
بنتي واريد اربيها ما متربايه ولسان طويل
ام جنه . انت صدك تحجي ؟؟ خويه ابو ترف شغير احوالك جنت واحد منه وبينا تزوجت اختي وما حسبناك غريب لا اختي قصرت وياك ورثها من ابوي كله سلمته بيدك ولا اخواني قصرو ويا ليش خويه هاي تاليها من كتلك تزوج ردتك تلم جهالك وتصونهم مو هيج تسوي بس الهضيمه الكاتلتني اني بيدي جبت الحيه ودخلتها لبيت اختي
بيت اختي بيت اختي تره خبصتيني اختج ما الها شي يمي هذا تعبي وحلالي وهاي بنت قريت فاتحتها وتحترم نفسها وتمشي وياي
شلوووون قريت فاتحتها ؟؟ وحق الله اسوي الما تتوقعه لهنا وكافي طلعت تاكل وتنكر
ترف .. اسمع الحجي والصياح وابوي صار بيد مرته ولا عبالك اني بنته خفت من سمعت حجيه ما خفت على نفسي خفت على خالتي لا يتجاوز عليها
بقيت ساكته وبس عيوني تصب .. شويه ورجع راكان هيج جان اسمه سمعت خالتي تصيحه
بقى اول دقايق ساكت وتالي بلش يصيح على ابوي وابوي يهدد ويتوعد اني مالي مفر من هالعيشه ليش اورط خالتي وياي لو يصير بيها شي بسببي مراح اسامح نفسي
ضغطت على ايد خالتي حيل وعيوني تصب اترجاهه تسكت
يله لج كومي وياي
ام جنه . كتلك ما تروح وياك
راكان . ترف تروح ويانا للبصره
ميخالف اخذوها واني اطلع منا كبل للمركز اشتكب عليكم واكول خطفو بنتي
ترف . من سمعت الحجي هيج نسيت الالم وصرت كاااافي عفيه كااافي عوف خاله لا تئذيها اني راجعه وياك
حاولت خالتي تمنعني مكدرت لان جنت مصممه ارجع ويا هذا الي اسمه ابوي
كمت اسند بنفسي بلكوه وحيل ما بيه هو طلع كدامي واني ضليت اخطو خطوات كلها انكسار وحزن وخيبه خالتي سكتت من شافتني هيج بس ركضت وراي حضنتني حيل وخلت ب ايدي فلوس كتلها ماريد والله كالت ضميهن لحد يشوفهن عندج خاف يجي يوم تحتاجين شي ولتخافين مراح اسكت ل ابوج وهاي الحيه الصفره مرته
رجعت ويا للبيت تلكتني هناء مسويه نفسه فقيره وتتلوك كدام ابوي شكد كرهتهم والله جود اجاني ساعدني اصعد الدرج واسمع ابوي يصيح لهناء انطي خبر للجماعه موافقين
ما اهتميت اله وسكتت
ام جنه .. طول الطريق عيوني ما سكتت ابد ابجي ع اختي مدري ابجي على بنت اختي مدري الوم بنفسي لان جبت الحيه بيدي لبيت اختي وعفته تهجمه
راكان .. عمه كافي عيونج راحت لو مخليتني اسحله ولا احترم كبره
ام جنه .. ما يفيد ولك عمه حبيبي الرجال مغسول غسل اني كل بالي جنه 
راكان .. ميخالف عمه نوصل للبيت ونكعد نفكر  بلكت نلاكي حل .
____________
اسامه
بعد مرور اسبوع تقريبا من اجازتي خلصته طلعات وونسه
حياتي مليانه بنات هواي بس ولا حسيت ويا وحده منهن بشي اسمه حب يمكن لان هنه يجن يتنازلن اليه ويقدمن نفسهن بكل بساطه الوالده كالعاده تلح تريد تزوجني بس اني ماحب اتزوج اله من الاكي وحده تخطف كلبي وتخليني اسهر الليل افكر بيهة
وبعدين ليش اتزوج اذا اني كل شويه بحضن وحده
ام اسامه  .. الو ها داده ام جنه بشري شلونج
ام جنه .. الو هلا بيج يبعد عمري خيه شبشر  غير رحت لبغداد ولكيت بنت اختي مكسره تكسر وحال الضيم يا حالها وابوها الله لا يوفقه هو ومرته يردون يزوجونها
ام اسامه .. يااا عزااا بعين العدو شجا تخبل الرجال مو اذكر  كلتي عنه زين ومداري جهاله ؟؟
ام جنه .. سكتي سكتي خلي القهر بكلبي جان زين وادمي بس ااااخ مني جبت حيه وخليتها ببيت اختي
ام اسامه .. مرته مو زينه وياهم ؟؟
ام جنه .. ياا اكلج غاسله مخ الرجال غسل مخليته مثل العجينه بيدها تلعب بي
ام اسامه .. وهسه شلون بالبنيه ؟؟
ام جنه .. والله مادري عقلي وكف من التفكير ابو جنه يكلي مالنا خلك مشاكل بيت ابو راكان مبيدهم شي وها الباقيه حايره ب امري
ام اسامه .. الله كريم كولي يا الله وصلي ع النبي بلكت ربج  يصلح الحال .
ام جنه .. الله كريم الله كريم ربج ما ينسه عبده
______
ترف مر اسبوع وحالتي النفسيه صفر وكلش تعبانه مادري الدنيا شنو ضامه اليه
نزلت واني اسحل بنفسي وما اطلع صوت مو متعمده بس لان ع انزل بايه بايه على كيف ماكو صوت لخطواتي يمكن جان هالشي حكمه من الله عز وجل
اريد اعبر للمطبخ وسمعت هناء تخابر بس ما اعرف تحجي ويا منو  اكو شي بداخلي دفعني اتقرب من باب غرفتها واسمع شتحجي
الي سمعته خلاني ارجف كلي من الخوف .
هناء .. ههههههههاااي اي ولج شومه مو كتلج مسويه رجلي محبس ب ايدي واخلي يقبل ب اخوج بدون ما اتعب نفسي
هههههههههاااي اي اي شفتيها البربروك ولا عبالك عمرها عمر زعطوطه شفتي جسمها
صدك اكلج اخوج شكال
ههههههاااي ياااا شكد نغل وين شاف طي..ها شكبره ومرفوع
لج اخوج نغل
لا لا شلون اكول سكير ويكبسل ومطلك ٣ مرات
لج سويته بس هوه وبس ابو العيشه هههههههاااي ميدرون ياخذ مصرفه منج
اي عفيه
اي اي ختولي اخذيها يمعوده فكيني منها هيه تفيد اخوج للنوم وتفيدج للخدمه
هههههه ديله عيني اذا اني شيطانه انتي شنو
هههههههه اوك اوك ديله استعجلو اخذوها خلصوني منها
ماشي ماشي  اي لج ماشي الج الحلوه ديله باي عيني
_______
جنت اسمع الحجي وكلبي يفور وعيوني تصب شسوي شسوي واني لا حول ولا قوه
طلعت هاي مسرحيه الزواج تدبير هناء حتى تتخلص مني وتريد تنطيني لعائله ساقطه الله يعلم شراح يسون بيه
اجت ببالي فكره انتحر وارتاح من هالعيشه
بس تذكرت جود منو اله وهم فوك هذا كله الله يغضب عليه
بسرعه ضغطت ع نفسي ورجعت للغرفه بقيت كاعده مكابله صوره امي وسجادتي وتربتي  ماعندي غير الله عز وجل ينور طريقي ويدليني على الحل
اني ماكدر اتوضه لان ايدي صابينها
رفعت راسي للسما وعبالك اناجي واحجي ويا ربي
يا الله انت تعلم بحالي ماعندي احد ياربي الدنيا جارت عليه وانظلمت من اقرب ناسي
مو حمل هيج اختبار يا الله
احجي ودموعي تنزل والعبره متكسره بصدري
سجدت لرب العالمين وبالي خالي من اي فكره شراح اسوي احجي ل ابوي ؟؟ هه ع اساس يصدكني
يارب ماعندي غيرك نور بصيرتي وانقذني
كنت على حيلي لميت السجاده وشلت صوره امي بسرعه خطرت ببالي خالتي ام جنه وتذكرت هيه انطتني فلوس بقيت افكر بس متردده
اني هنا شعندي ؟؟ معقوله اسلم نفسي لعائله ساقطه بس حتى مرت ابوي ترتاح ؟؟
هيه هاي احلامي ؟؟ وين ترف المدلله الي جانت تتمنى تصير دكتوره وين روحي الحلوه؟؟ كلهن اختفن بقت بس جسد خالي من كلشي
قررت بداخلي ابطل ضعف واستسلام ولازم اواجه الكل بس كون من اواجه عندي سند وياي
وماكو سند اليه اكثر من ريحه امي
انهزم ؟؟ اي انهزم اروح لبيت خالتي وخالي
بس اني ما اندل ؟؟
شلون اروح شلون اوصل ؟؟
اني حافظه رقم خالتي قررت انهزم واطلع من هالسجن
الي يسئل ما يضيع
بسس و وجود ؟؟
خفت وترددت بس اني اذا ابقى هنا هم راح اتزوج واروح وانحرم منه !! بكل الاحوال اني لازم انقذ نفسي حتى اكدر انقذ اخوي
خلص حسمت امري وقررت الصبح قبل لا تطلع الشمس انهزم
حضرت ملابسي جبه اسلاميه وشال وجنت محتاره خاف احد يتعرض اليه .. قررت اشيل الخوف من كلبي وافوض امري لله  عز وجل
صحت لجود بوسته وحضنته حيل عبالك احس هاي اخر مره اشوفه مادري شنو ينتضرني بالمجهول الي رايحه اله برجليه
انتضرت طول الليل وابد عيني ما غمضت
ساعه 5:00 الفجر اكو عندي مقص جبته وبلشت اشيل الجبيره من ايدي صح توجعني بس لازم اشيلها
بدلت لبست بنطرون وبدي طويل وعليه الجبه ولفيت الشال عبالك وحده عمرها جبير طلعت الفلوس الي انطتني اياهن خالتي
ونزلت امشي بهدوء حتى ما اطلع صوت التفتت على كل جزء بالبيت بنضرات وداع وعيوني هلت الدمع هنا جانت امي تدرسني هنا جانت تلعب وياي هنا كعدنا اكلنا من جنت مدلله امي وابوي هنا صدى صوتها من صارت تتوجع من الم الولاده
جريت حسره ومسحت دموعي وكملت طريقي فتحت باب البيت الرئيسي وطلعت وسحبته وراي يعني رديته رد
بلشت خطواتي تتسارع بهذا الطريق الطويل منين اروح منين اوصل لخالتي
عبرت هواي شوارع وصلت للشارع العام جانت اكو مريه بيدها جنطه سفر زغيره والمريه جانت جبيره بالعمر
تقربت منها سلمت بس صوتي يرجف
خاله فدوه منين اروح للبصره
المريه جانت نضراتها اليه تساؤلات
جاوبتني كالت اني اريد اروح للكراج تعالي وياي ومناك تصعدين للبصره
اشرت لتكسي وصعدنا كتلها خاله فدوه ما اندل
لا تخافين بنيتي عليج الامان انتي مهزومه ؟؟
خاله فدوه ساعديني الله يوفقج
اساعدج والله بس احجيلي الصدك
حسيت كلبي شويه اطمن الها حجيت الها مختصر عن ظلمي وكتلها اريد اروح لخالتي
اوف سوده عليه بعد اكو هيج ظلم بالدنيا
سكتت بس دموعي تنزل
مسحي دموعج بنتي انتي امانة الله ورسوله اساعدج بلي اكدر عليه
وصلنا للكراج مقبلت ادفع كروه من نزلنا رحنا للسيارات الي توصل للبصره دورت شافت سياره راح تقبط بيها مكان واحد جانت سياره زغيره
صاحت للسايق وحجت ويا
خاله ابو الوليد بيك نخوه من اختك تنتخي بيك ؟؟
عد عيناج كولي يمه
خاله هاي بنيتي امانه الله ورسوله وامانتك توصلها للبصره الدنيا جارت عليها وها لتشوف الحال
صار يوالده بس الله والهوى يمسها صعدي خويه
بست المريه وحضنتها وبجيت كل قوتي خطيه خلت بيدي فلوس بس مقبلت اخذهن كتلها والله خاله عندي
خطيه حضنتني وبجت وكالت يمه روحي مودعه بالله واهل بيته

صعدت والطريق جان طويل كلش وبعيد كلش
عيوني شارده تباوع على المحطات الي عبرت بيها وجنت وحدي لا اهل لا سند لا والي بس رحمه الله
مشت السياره ومشت ومشت بين تعب وخوف وقلق غفت عيني يمكن ساعه او اكثر شويه
حسيت صوت يكعدني
خويه خويه يبنيه اكعدي
فزيت مرعوبه هاا شنو وصلنا ؟؟
لا خويه بعد بس هاي استراحه خاف تردون تاكلون لو ترحون للصحيات
هزيت راسي بمعنى لاماريد 
هو هم تفهمني وراح بقيت مادري شكد وكت بس مو هواي اجو الركاب الي جانو صاعدين بالسياره واجه السايق ورجعت السياره تمشي بهذا الطريق الطويل
اخذتني افكاري شراح اسوي شلون اعيش وين اعيش ابوي شنو رده فعله من يكعد وميلكاني هناء شراح تترس راسه عليه ؟؟
بين هاي الافكار اجه صوت السايق الحمد الله على سلامتكم  كل الركاب انطو الكروه
اني جنت ماعرف شكدالمبلغ لان بحياتي ما مسافره
سئلته بصوت يرجف شكد الكروه
خويه واصل كروتج الحجيه دفعتها
بسرعه دمعت عيني اثاري المريه حتى كروتي دفعتها فدوتك ربي شكد رحيم بحالي،
وكفت السياره والكل نزلو واني هم
ردت اخابر لخالتي معندي تلفون
حجيت ويا السايق
بلا زحمه عليك منين اكدر اخابر على اهلي
تفضلي خويه هذا تلفوني خابري
تشكرت منه واخذت التلفون ودكيت الرقم 
الووو ولج خاله الحكيني  فدووووه
..............
انتضروني ❤
يتبععع