طفلته

البارت الرابع ( هل من منقذ لي 💔 )

السلام عليكم 🥀🖤
اريد احجي وياكم شويه عن القصه والاحداث

القصه حقيقه ميه بالميه من واقعنا واعرف الابطال شخصيا الله شاهد هالقصه كلش توجع كلبي اكتب واحاول ما احجي كلشي عاشته ترف وشكد انظلمت وشنو الضيم الي شافته
بس كل ظالم يجي يوم وينظلم
كل دمعه الها حوبه خصوصا دمعه اليتيم
اريد منكم طلب
تسون منشن لكل اصدقائكم واهلكم اريد القصه والعبره الي بيها توصل ل اكبر عدد من الناس
اتمنى منكم تطولون بالكم لان القصه كلش توجع بالكتابه مو سهله ظلم اعز الناس النا
اني كاتبه الاحداث والمواقف المهمه الي لازم تنذكر بس جاي ارتبهن ب البارتات حتى كلشي يكون واضح
القصه بيها هواي مفاجئات اصلا مراح تتوقعونها ..

تعليقكم وتصويتكم والمنشن الي تسسونه كلش مهمات عندي احبكم هواااي ❤🥺

بينــه هــواي
شيــب وضـيم
و بــيــنه اهــواي ماگــلنــاه

....................

ركضت على التلفون مال هناء،من سدته
دكيت رقم خالتي ما جاوبت
ضليت ابجي بقهر ورجعت دكيت مره ثانيه وعيني ع الباب مال الغرفه خاف هناء تطلع من الحمام وتلزمني
ولجججج خاله فدوووه الحكي عليه
يدك يدك ومحد فتح خط عفت التلفون وطلعت بسرعه من الغرفه .
عد اليوم ومادري شلون عده ولا شراح يصير ومحد يحجي وياي عبالك كاسره وجووهم
ثاني يوم الصبح حسيت واحد يرفس بيه فزيت لكيت هناءواكفه على راسي تصيح وتفشر
يله خاتون شمسج عاليه يله ولج بت الزفره ما تكعدين شنو على ايدج نقش الحنه
ترف .. اني كم مره كتلج لا تغلطين على امي والله بيها حوبه خافي ربج هيه ميته شتردين مني شمسويتلج حتى هيج تكرهيني
ولج بربوك امج ماتت وخلتج عله على كلبي اكرهج اكرهج بدون سبب بس مدام مو بزري تلعب نفسي منج ومن اخوج
هه بزرج ؟؟ ليش انتي بزرج ربيتي !! تره اني ربيتهن وتعبت عليهم هاي السنين مو انتي
تف عليج وعلى صباحج الاكشر يله عابت هالوجه كومي نظفي البيت اليوم يجي العريس،واهله  هههههه
عريس ؟؟ صدك تحجين ؟؟ حسبي الله ونعم الوكيل فوضت امري لله عز وجل وحوبتي ما تتعداج
تفلت عليه ونزلت واني شكد ما جنت ارد بقوه شكد ما حسيت روحي موجوعه وجع الروح ماكو مثله وجع بقيت ابجي ولا حول ولا قوه ومادري خالتي وين عني ليش عافتني ونستني
نزلت جوه نظفت البيت وسويت ريوك ل اخواني وجود حجى وياي بس عبالك خايف مني
صدك راح تتزوجين ؟؟
منو كلك هالحجي حبيبي
خاله هناء كالت اختك مفلفه على الرجل توته عود شنو مفلفه
سكتت وجريت نفس ودعيت عليها من كل كلبي بصوت اشبه بالهمس شلون تحجي عني ل اخوي وتكرهه بيه
حبيبي معليك هاي كلمه محلوه لتعيدها اوك عمري انت حباب ومتحب تحجي هيج حجي محلو مو ؟
اي معليه هيه كالت
جودي بابا وين ؟؟
بابا طلع كال ارجع على وكت على مود خطابه يجونج
يعني بابا هيج كال ؟؟
اي والله توته سمعته يحجي ويا خاله
اوك حبيبي يله كوم اسبح لو تريد اسبحك اني ؟؟
لا عيب مو انتي علمتيني اسبح وحدي 
عفيه اخوي السبع
خطيه حضنته وبسته وراح يسبح
بقيت محتاره شدا يصير وياي بابا ليش هيج خاضع لهناء ليش هيج كرهني
هناء بغرفتها ملتهيه عبالك عدها عرس لطخت روحه تلطخ وكشخت والعطر يعط منها
كلت بكلبي هيج مكيفه تريد تخلص مني
عفتها ورحت انظف بغرفتي
للظهر اجه بابا ولا كلف نفسه ولا سئلني عن رئيي وكتها كلش حقدت عليه معقوله اكو رجال هيج ينغسل مخه وينعمي عن اولاده على مود زوجته ؟؟
صار العصر واني حاولت التهي بغرفتي طبعا اني ما اكل وياهم انزل اصب الهم غده او عشه واكل وحدي بلمطبخ ومن يكملون انظف المطبخ
المهم واني كاعده بالغرفه ضليت اكلب بغراضي عندي هواي لعابات ضامتهن امي جابتهن اليه حسيت روحي مشتاقه الها اريد شي من ريحتها لان كلش مختنكه
يمه اكعدي بنتج انهظمت
يمه الدنيا جارت عليه وابوي نسى اصلا عنده بنت
يمه وينج تعالي شوفيني خدامه ببيتج بس يا يمه هو بيتج وراح للغريبه وصرت خدامه الها
يمه اكعدي طولتي بنومتج والله طولتي ماكدر اتحمل
يمه تسمعيني يمه بنيتج تريدج
يمه فدوه اخذيني يمج مالي مكان هنا
احاجي اللعابه والدموع ابد ولا وكفت احس نار يجون خدودي
واني بها الوضع فاتت هناء
هاا يمصخمه عليمن هالعياره والبجي دكومي يله نزلي اجو الناس وانتي هنا تتختلين
ما انزل
دكومي انزلي لا حظج اطيحه واكول ل ابوج بنتك مصاحبه وتكول ما اريد اتزوج
فكرت بداخلي وهيه تحجي انو ماكو فايده من الرفض منو وياي ومنو يساندني اصلا  سكتت بضعف ولا حول ولا قوة
وكمت لبست شال وبدشداشه البيت بس غسلت وجهي
ونزلت وياها وهيه تمشي كدامي دخلنا للصاله وجانت بس بنت تقريبا بعمر هناء و وياها مره جبيره
سلمت وكعدت واسمع هناء وهاي البنت يتمضحكن
ويباوعن عليه
شويه وسمعت صوت بابا من الباب
ترف تعالي
نعم
لبسي جبه وتعالي للستقبال
هزيت راسي ورحت لبست جبه ونزلت جان بعده منتضرني
فتت ويا ومنزله راسي ومادري منو موجود اصلا
كعدت يم ابوي واني مدنكه مشفت اي شي ولا ردت اشوف اصلا
احس روحي ارجف موقف صعب واني رافضته اصلا
_____________________
ام جنه
ياااا هاي هناء متصله عليه اول تالي ؟؟ خل ادك عليها اشوفها شتريد
يدك وترفضني .. من شفت الرفض كلبي كرصني وشكيت هاي مو هيه الي متصله هاي ترف وبنت اختي بيها شي
طلعت رقم ابو ترف وخابرته
الو الله يساعدك ابو ترف
هله بيج ام جنه
شلونكم ترف وجود شلونهم
الحمد الله زينين
اكول ابو ترف بلكت تجيبهم يبقون يمي كم والله طاك كلبي عليهم
والله خويه مشغول وهم ترف راح تتزوج  اجو عليها خوش ناس
شلوووون ؟؟ هاي منو تتزوج ؟؟ خويه كول غيرها ترف بعدهي جاهله مو مال زواج ومدرستها و مستقبلها خويه جاي تتشاقه مو
لا جاي اكلج حجي الصدك بطلت من المدرسه وكبرت صارت عروس المن باقيه كاعده 
لا وروح فاطم ترف ما تتزوج لو اعرف اشتكي عليك
خلي فاطم بكبرها ارتاحت وخلت شلعان الكلب عليه
شلعان الكلب ؟؟ مع الاسف والله مو هاي المرجيه منك
سد التلفون بوجهي واني ظليت الطم عرفت حلمي ذاك اليوم اشاره وترف بشده
كبل خابرت ابو جنه وكتله باجر اروح لبغداد لبيت فاطم
ضل يحجي كال هو ابوهم واحق بيهم ومالج حق تتدخلين ضليت ابجي وكتله هاي يتيمه سكت كال ياهو ياخذج
كتله اشوف واحد من ولد اخوي سالم ياخذني
سكت وسديت التلفون منه لبست عباتي ورحت لبيت اخوي سالم هو انتقل للبصره على مود علاج زوجته جان بيها خبيث يكفيكم الشر عنده ٣ ولد راكان وشهم وحيدر وبنات ٢ متزوجات
راكان جان بالبيت كبل تلكاني هلا عمه شبيج صاير شي ؟؟
بلشت احجي الهم واخوي سالم صفك ايد ب ايد وكال يا وسفه هيج تاليها وخير فاطم وذهبها راح للنايمات الظهر
راكان .. عمري ٢٥
خريج اداب انكليزي
من زمان اني معتمد ع نفسي وشايل شغل عائلتي ابوي اعتمد عليه من وكعت امي بذاك المرض واني عندي صديقي جان يجيب عطور وعنده وكاله خاصه مال عطور تشاركت ويا وشويه شويه صرت اشتغل وحدي
مكان شغلي الرئيسي بالامارات واجي للعراق كل شهرين  او اكثر
اجت لبيتنا عمتي وجانت تبجي وحالها مايسر حجت النا عن بنت عمتي المرحومه اني ماذكرها من جانت زغيره وانتقلنا وهم سفر وشغل ناسيها اصلا 
المهم رادت واحد ياخذها لبغداد كتلها عمه اني اخذج اتفقنا نطلع الفجر امر الها للبيت ونطلع
طلعنا لبغداد وعمتي طول الطريق تبجي تكول صوجي جبت الحيه لبيت اختي ردتها عون صارت فرعون
عمه طولي بالج هسه نوصل ونفتهم
اوف يا راكان شطول بالي  الله يعلم هاي شمسويه بيها
ان شاء الله خير تفائلي يا عمه دكولي خير يصير  خير
ان شاء الله لعد اني شريد
____________________
ترف ..
بقيت كاعده يم ابوي حوالي ١٠ دقايق واحس روحي طلعت وانتبهت على ايدي بس رمشت عيني وكعت دمعه ع ايدي
مادري شلون كمت بدون ما اكول ل ابوي ومشيت عبالك واحد يركض ردت بس اتنفس اختنكت ما اهتميت للحجي
كبل ركضت لغرفتي وكعدت ابجي بكل قوتي عيوني صار لونهن احمر عبالك دم محتصر بيهن من كد البجي
سمعت خبصه ورا نص ساعه وحجي هناء وصوتها الي تلعلع بي وتترس براس ابوي شوف بنتك شلون ما خلت الك قيمه كدام الرجال وطلعت بكيفها
لو كاسر الها ضلع جان مشت عدل
محسيت الا باب الغرفه اندفر وانفتح وابوي عبالك هيئه شيطان مو ذاك ابوي ابو وجه الحلو الطيب
لزمني من شعري وضل يسحل بيه ودفرات برجله
يضرب ويصيح عليه فشلتيني ولج هيج هيج منج وذاك الغلط الي استحي حتى اكوله
كمت اريد ادافع عن نفسي محسيت بي فر راسي براشدي وكعت على ايدي وحسيتها طكت ضليت اصرخ من الالم
وهو ولا اهتم نزل وعافني
مادري نمت مادري غابت روحي
محسيت ع نفسي الا ثاني يوم
جنت بين واعيه بين ما مركزه الالم موتني واسمع صوت وهالصوت مو غريب عليه حاولت اركز اكثر اي والله هذا صوتها
صوت خالتي جانت تحجي وتعتب بصوت عالي وهناء تردها وتعلي صوتها وابوي جان كالعاده موقفه مساند هناء
سحلت نفسي حتى انزل جوه شعري مكطع ايدي اكيد مكسوره لان المها جان مينحمل
صوتي جان ضايع اصيح والصوت ما يطلع
ضليت امشي خطوات واني سانده نفسي على المحجر مال الدرج بالكوه وصلت للصاله
وشفت خالتي واني بعد وكعت محسيت بالدنيا
وين يله حسيت وانتبهت اني بالمستشفى وخالتي يمي وشرطي واكف يم ولد ما اعرفه  ويحجون عن شكوى ومادري شنو مفهمت شي
ام جنه
بعد كلبي توته الحمد الله على سلامتج ولج يمه هبطتيني شصاير بيج منو هيج ضاربج ولج اني مكان امج احجيلي لا تخافين اجيتج محد يكدر يأذيج بعد
جنت اسمع كلامها ودموعي تصب وصوتي ميطلع
شويه واجه الولد الي جان يم الشرطي حجى ويا خالتي
عمه نقدم شكوى عليه هو ومرته
لا يمه خل ترف تحجي ونفتهم منها
ترف .. صح ابوي ظلمني بس حسيتها صعبه اشتكي عليه ضليت اتمتم بالحجي ويا خالتي كتلها لا ما اشتكي
ولج يمه اشتكي خل ناخذ حقج
لزمت ايد خالتي ب ايدي الثانيه وضغطت عليها وعيوني تتوسل بيها فدوه خاله لا تعوفيني
اخذج وياي لو اعرف الدنيا تنكلب شلون اعوفج
شويه وراح الولد والشرطي ودخل ابوي  وهنااا جانت الصدمه الي مراح انساها طول عمري .

_________________

__________

بنات عقمو عيونكم 😁😉❤🥺

يتبعععع

انتضروني 🥺❤