أنا معاك متخافش، بص سيبك منهم كلهم، سيبك من العالم كله، انا معاك ومش همشى، مش انت قولتلي مرة انك مبتصدقش غيري ؟
- امشي يا حياه
- طب أقولك على حاجة ؟ انا بحبك .. مش انت عارف اني بحبك
- امشي انا معنديش اللي اديهولك، ومش قادر احارب كمان، سيبيني وامشي
- طب سيبني معاك ومش عاوزة حاجة
- انتي بتعملي كده ليه !
- ماهو يا سليم أنا بحبك، أنا مستنياك بقالي كتير ومش هينفع اسيبك تروح من ايدي كده، مش بعد وجع السنين دي كلها اسيبك وارجع لوحدي تاني، مش عاوزة ابقى لوحدي تاني
مسك حجر ورماه في البحر اللي قدامه بكل قوته وكإنه بيخرج وجعه فيه
- انتي بتكذبي على نفسك، انتي تعبانة من العلاقة دي، بس خايفة تعترفي بده، انا مش قادر أحب حد، وانتي بالذات مش هينفع تتأذي بسببي، قومي امشي
- بس انا مطلبتش منك حاجة
صرخ في وشي - كفاية تصعبيها بقى، انا مبحبكيش ومش عاوزك معايا.
معرفش ايه حصل بس سحبت الشنطة من خوفي ومشيت، كنت خايفة ابص ورايا، كنت خايفة اشوفه وهو كده، سليم مش كده، هو بس يأس شوية علشان مش قادر يحقق أحلامه، او يأس شوية علشان كان راسم حاجات كتير وكلها اتبخرت، او ممكن.. المهم هو مش كده، سليم طيب وحنين جدا والله، هو بس تعبان ومينفعش يكون لوحده وهو كده، وقفت ورجعت تاني قعدت جمبه
- طب خلاص، انا هقعد ساكتة والله ومش هقولك حاجة، او لو عاوز تصرخ يعني مش هخاف وامشى، ممكن تصرخ لو هترتاح عيطت - او لو تحب ممكن نعيط سوا، بس متقولش مبحبكيش علشان انت بتحبني، هو ممكن استحمل تصرخ بس متقولش انك مش بتحبني يا سليم، ماشي؟ وممكن كمان ..
- مبحبش غيرك ومبحبش قدك ومبحبش زيك، علشان كده فكي ايدي وامشي، بتضيعي وقتك معايا
- تاكل آيس كريم ؟
بص حواليه وبعدين بصلي - لأ
- تحبه بالشيكولاتة زيي ؟
- مش عاوز
- طب استنى هقوم اجيب لينا وآجي مش هتأخر.
لسه فاكرة كلام دكتورة دنيا صاحبتي، قالتلي ان هو لازم يتعالج، مش بس محتاج علاج نفسي، محتاج وجوده في مستشفى، وانا مش عارفة اقولهاله ازاي، عادي مالناس بتتعب، في ناس عندها مرض السكر علشان البنكرياس تعب، وفي ناس عندها مرض القلب علشان القلب تعب، وفي ناس نفسيتها تعبانة علشان روحها تعبت، عادي مرض زي بقية الأمراض ومحتاج علاج
- ها نمت ؟
- تغطيت خلاص
- قولي تصبحي على ضحكتي يا حياه
- تصبحي على خير
- على ضحكتي يا حياه
- تصبحي على ضحكتي يا حياه
- طب بما انك بتسمع الكلام، قولي تصبحي وانتي من اهلي يا حياه
حسيته ابتسم - مش هنام السنة دي يعني ؟
- بقيت قفوش اوي يا سليم، طب انت عارف لما ابقى اهلك هعمل ايه ؟
- ايه ؟
- طب ماتعملها وشوف اسهل
- يابنتي نامي بقى
- براحتك اوي، عاملني وحش لحد مااتجوز واسمي ابني على اسمك، واقوله تف على عمو ياحبيبي
- وبعدين ؟
- بس ياسيدي كده الحدوتة خلصت، نام بقى، وبكرة هستناك متتأخرش بالله
- حياه
- قلبها
- احكيلي حدوتة.
كل القصص انت بطلها، كل الحاجات حلوة علشان كانت لوصفك أصلا، كل فارس عربي قديم وقعت في حبه علشان كنت بشبهك بيه، انت مش شبه حاجة يا سليم، كل حاجة بتتوصف وانت وصف لوحدك، عايشة عمري كله مستنية طلتك ومش هينفع تقع من ايدي، مش هسمحلك تقع.
_____________
- سليم، هقولك حاجة وانت اسمعني للآخر ومتتعصبش، ولو هتتعصب قولي انا هتعصب فانا اسكت، ماشي ؟
- قولي حاجة ومش هتعصب
- ما تيجي نتجوز و..
- وبعدين ؟
- انا مش عارفة اكون جمبك كده، انا عارفة انك بتتعب من الادوية وبتكون..
- وايه كمان ؟
- سليم متتكلمش معايا كده وتوترني
- اتعالج يا سليم، و سليم بيتعالج، ادويتك يا سليم ، و سليم بياخدها رغم انه عارف انها مش هتفيده بحاجة بس علشان ترضي، انما نتجوز وانا كده !
- انت كده ايه ؟ كلنا تعبانين، كلنا، محدش فينا معندهوش مرض نفسي افهم ده
- طب ولما هو كلنا تعبانين، بتجبريني آخد ادوية ليه طالما الموضوع عادي ؟ انتي مبتاخديش ادوية ليه !
- انت لما بتكون كويس بكون كويسة، مبتعبش غير لما بتتعبني، يعني انت بتاخد ليك وليا
- حياه، شيلي موضوع اني هوافق ادخل المستشفى ده من دماغك، والموضوع التاني ده سيبيه لوقته
- مش عاوز نتجوز ؟
- انتي غبية ؟ انا هأذيكي بطلي غباء بقى، انا مبعرفش اسيطر على نفسي لما باخد الزفت ده مبعرفش، قولتلك امشي من الاول وانتي اللي بتحاربي معرفش عاوزة توصلي لايه، انا مش نافعك ولا نافع حد
- اجيبلك عصير ايه بكره وانا جايه ؟
- حياه
- مانجا ؟
- ..
- فراولة زيي ؟
- ..
- طب نشرب قهوة ؟
- أنا بحبك
- ايوة يعني هتشرب قه.. ايه ؟ يالهوي !
ابتسم - ايه ؟
- ماانت بتعرف تبتسم وتخليها تنور اهوه، اومال مضلمها على أمي ليه من الصبح !.
انا مش ناسية كل مرة استحمل فيها عياطي وغبائي، كل مرة كنت بروح ارمي وجعي فيه، كلنا تعبانين والله، بس مش كلنا محظوظين نلاقي تعبان ويستحمل !
- انا محتاجلك معايا
- بااس يبقى نتجوز
- انا عاوز كده
- يالهوي انا كنت بهزر، طب يلا، قصدي امتى قبل ماتغير رأيك زي كل مرة
- يعني لما اشوفك واقعة كده اقول عليكي ايه ؟ اتقلي شوية
- قول عليا واقعة، عادي جدا
- ياسلام ؟ وشكلك قدامي
- شكلي ايه قدامك ؟
- حلو، حلو زي عيونك وهي بغمض لما بتضحكي
- تاني كلمة حلوة يقولهالي النهاردة ونقول ألو
- طب ايه ؟
- ايه يلا تعالى اقنعهم هنا، قصدي هقنعهم على ماتيجي يعني.
انا كل يوم من 3 شهور تقريبا بقولهم هنا ان خلاص هنتجوز وفي الآخر بيرجع في كلامه، بس طالما هو اللي طلب يعني فاكيد مش هيرجع تاني، ده لو متعبش بليل، او لو محسش بلامبالاة الصبح، صحيت وانا فرحانة ومسكت الموبايل علشان اقوله صباح الخير لاقيت رسالة منه " انا مش هقدر، آسف "
ماما بتقول اننا انصاف، محدش فينا كامل، ومش كلنا محظوظين علشان نلاقي نص يشبه حوافنا، يشبهنا فنكمل واحد صحيح سوا، انا بتكسر بسببه واللي بيتكسر مني بيقع في ايده، هكمل مع غيره ازاي !
- اللي سليم فيه ده آخر انتحار، عايش لوحده وممكن ينتحر في اي لحظة
- متقوليش كده يا دنيا، انتي قولتي ان الادوية دي هتريحه
- مفيش ادوية بتريح ياحياه ، لو الجسم مش متقبل فمش ادوية هتنفع، حالته مش متقبلة علاج اصلا
- طيب واحدة واحدة، ايه ممكن نعمله غير الادوية ؟
- حد يكون معاه.
- ونوقف الادوية ؟ هي اصلا بتتعبه، بيقول ان بيحس ان مخه وقف لما بياخدها، ومش بيكون قادر ياخد نفسه، لحد مابينام
- تهيؤات، هو لانه بياخدها غصب عنه.
طب وبالنسبة لانه عامل بلوك لرقمي ومش عارفة اوصله ! اروحله البيت علشان يقتلني طيب ؟ طب اموت نفسي فيجي ؟ صح اموت نفسي فهو يندم ويجي، فيلم هندي ده
بعتله رسالة من رقم تاني " بقيت انام بصعوبة يا سليم علشان مش بقولك تصبح على خير، انت بتنام ازاي ؟، يعني في وقت زي ده كان زمانا بنفطر سوا، نعمل فطار بنحبه ونتفرج على اي فيلم تختاره، الصبح كان هيبقى حلو جدا والله، تخيل القصص اللي هحكيهالك كل يوم قبل ماتنام، مش هقولك وقتها اصبح على ضحكتك، علشان انا فعلا هصبح عليها، في الف حكاية ممكن نحكيهم يا سليم، في حاجات كتير حلوة ممكن نعملها، أكلي اللي عارفة انك هتتريق عليه، شكل شعرك وانت صاحي من النوم، في حاجات كتير جدا مستنيانا، وفي نكت كتير بايخة جدا هقولهالك علشان تضحك على طريقتي كالعادة، مش شايف انه كفاية انك تنام وانت مطمن ان في حد جمبك بيتنفس بس علشان سامع صوت نفسك ؟ "
بعدها بساعتين اتصل بيا بعد بلوك 3 ايام
- يانعم ؟
- ..
- انت بتتصل علشان تسكت ؟ وعاملي بلوك يا سليم ! انا تعملي بلوك يامهزق ؟
- ..
- دبلتك دي انا هروح ابيعها وآكل بفلوسها كشري، بتحب الكشري صح ؟
- ..
- اسكت اوي ماانت مهزق
- حياه
ايه ! قلبي اتنفض لما سمعت صوته، نفس الاحساس اللي حسيته لما سمعت صوته اول مرة - يالهوي نعم ؟
- تتجوزيني ؟.
كنت عارفة والله ان الدنيا هتضحك تاني، وعارفة كمان انه في يوم هيرمي وجعه ويضحك زي طفل معندهوش هموم، معنديش مشكلة نقسم وجعه سوا، او يرميه فيا وأنا راضية
سليم وقف الأدوية أول أسبوعين من جوازنا، مش عارفة المفروض يمشى عليها قد ايه، بس حاسة انه يوم مايخف هصحى الصبح الاقيه باصصلي وبيبتسم، سليم مش بيضحك الصبح معرفش ليه، بحسه مش عاوز يصحى اصلا، وقتها هسأله بغباء " انت بتبصلي كده ليه ؟ " ، فيقولي " كنت بشوف الشمس وهي بتصحى " وقتها بس هعرف انه خف، علشان سليم مبيصحاش كويس
- طيب اخرجي وهاخده
- عاوزني أخرج ليه ؟
- علشان خاطري اخرجي،، مبحسش بنفسي ومبتحكمش في أعصابي فاخرجي واقفلي الباب
- سليم مفيش آثار جانبية لدوا زي مابتقول كده، مفيش حاجة هتحصل متفكرش بس
- طيب اخرجي، مش عاوزك تشوفيني كده
وقفت فعلا وروحت قفلت الباب من جوه ورجعت قعدت جمبه تاني
- انتي بتتعبيني ليه ؟
- يلا غمض عينك وعد 3 تلاتة
اتنهد وأخده
فاتكلمت - ها شوفت ؟ الدنيا سهلة والله، ننام ولا نتفرج على فيلم، ولا نقوم نعمل كيكة سوا ؟
- عاوز أنام
- حلو اوي، نقوم نعمل كيكة سوا
أول مادخلنا المطبخ وقع في الأرض، فصرخت من الخضة، تقريبا الصوت عصبه فجسمه بدأ يتشنج، مكنتش عارفة أعمل حاجة غير اني أمسكه، جسمه كان بارد أوي، تقريبا ده أصعب موقف مر عليا في حياتي كلها، مكنتش أتمنى أشوفه كده أو أشوفه بيتوجع أصلا، فرميت الأدوية خالص، مكلمتش الدكتورة ومكنتش عارفة اللي بعمله صح ولا غلط، بس اللي اعرفه ان أغلب الأمراض النفسية بتتعالج من غير أدوية، حد يكون معانا بس، يطمنا ان بكرة الجاي حلو، يطمنا اننا مش هنخطي فيه لوحدنا وان مهما الطريق كان طويل هيكون سند، اغلب الامراض النفسية بسبب نقص الحب
- انتي بتعملي كده ليه ؟
أخدته في حضني - نام
- أنا دماغي مصدعه وتعبان اوي
- هتبقى بخير، أنا معاك
غمض عينه - متمشيش.
دنيا حاولت أكتر من مرة تمنعني أكمل، بتقول اني هتعب، بس اللي أعرفه اني هتعب لو بعدت، وهتعب لو هو تعب، وهتعب لو مكنتش معاه حتى لو وجودي مش فارق، هو مش حمل ، هو كمان سندني كتير من غير مايحس، علشان هو مش فاهم ان وجوده بس سند، كونه معايا بحس اني مسنودة
- قوم بقى، والله أفطر وأسيبك
مسح بإيده على وشه - شوية وهقوم
- تؤ، بعد كده هنصحى من الساعة 7، الصحيان بدري حلو، و..
- فاتحة الشبابيك ليه كده !
سكت شوية بتخيل ان هو اللي يرخم ويفتحها ..
- قوم بس، هنفطر ونشرب شاي سوا بره، والله يا سليم انا مش عارفة كنت هتعمل ايه لو أنا مش في حياتك، قوم اشكر ربنا على وجودي
ابتسم - طب جهزتي الفطار يالمضة ؟
- لأ، هجهزه لوحدي ! قوم بقى علشان انا جوعت والله.
_____
- بس ياسيدي، وكل اللي في الغابة عاشوا سعداء، وتوتة توتة خلصت الحدوتة
- هو انا طفل ياحياه! احكيلي قصص للكبار
- قصص للكبار ازاي ! هي القصص للصغيرين، قولي شكرا ومتناقش
- شكراً ياستي، احكيلك أنا قصة ؟
ضحكت - يلا
- كان في أميرة حلوة اوي
- أحلى مني ؟
- لأ تشبهك، كانت عايشة في قصر عالي، وكان صعب جدا ان حد يقدر يطلعه، فمحدش كان بيقدر يوصلها، كل يوم الصبح كان بتقف في شباك القصر وبتبص للسما، وفي يوم شافها شاب فقير وضعيف
- والشاب ده حلو ؟
- يشبهني، كل يوم كان في أمراء بيحاولوا يطلعوا ومحدش كان بيوصل، واللي كان بيوصل الأميرة كانت بتقفل شباك اوضتها فبينزل تاني، الشاب الفقير كان بيبص لأوضتها كل يوم ومكنش قادر يحلم او يفكر يحلم انه يحاول، مش لفقره بس، بس لضعفه كمان
- طب مايحاول
- أوقات بنلغي أحلام علشان نريح قلوبنا لما متتحققش، المهم ياستي في يوم الأميرة شافته، فضلوا باصين لبعض كتير، والشاب ده كل مايبصلها كل مالحلم يكبر كل ماهيتعب، وفي اللحظة اللي قرر فيها انه يمشى رمت ضفيرتها من فوق وابتسمتله، فضل واقف مش مستوعب، مكنش قادر يحدد اذا كان واقع ولا حلمه كبر لدرجة انه بقى ملموس، كان خايف يمسك ضفيرتها فتتحول لسراب
مسك ايدي - تفتكري شافت فيه ايه وهو ميملكش غير فقر وضعف ؟
- حب ؟
ابتسم - يعني يمسكها ويحاول ؟
- لو محاولش هي هتتكسر، ولو بيحبها مش هيسمح انها تتكسر، مش هو بيحبها برضو ؟
حضني وسكت، اول يوم انام وانا عندي رضا، او انام وانا حاسة ان في أمل بكرة، واول مرة هو ينام ومسمعش صوت نفسه السريع وكإنه بيجري، كان نايم راضي.
فتحت عيوني الساعة 7 تقريباً، لاقيته صاحي وباصصلي
اتخضيت - انت بتبصلي كده ليه !
- بشوف الشمس وهي بتصحى
حطيت ايدي على بؤقي وانا بعيط، تقريباً من الصدمة
قرب مني - بتعيطي ليه ؟
- يالهوي، انا كنت بفكر .. قصدي كنت بحلم انك .. سليم انا.. متركزش معايا، أنا بحبك
- أمسك الضفيرة وأطلع يعني ؟
- انت لسه هتسأل !
ضحك - طب والأميرة مش هتقوم نجهز الفطار ؟
- لسه بدري نصحى بعد شوية
- لا انا مبحبش الكسل، بعد كده هنصحى الساعة 7 كل يوم، الصحيان بدري حلو
- انت فاتح الشبابيك كده ليه ؟
- ششش بحبك
- مريم هاني
