حب في التصنيف

إقتباس ١

ادخلت ميرا يديها بداخل حقيبتها واخرجت بعض الورقات المالية ومدت يديها اليه نظر زياد الى يديها، زياد باستغراب: ايه ده
ميرا : اجرتك
زياد : وهو انا سواق تاكسي
ميرا : الله مش وصلتني يبقى تاخد اجرتك
زياد: يعني دي كانت مساعدة من عندي في حد يرد المساعدة كده
ميرا : بس انا مش بقبل مساعده من حد غريب
زياد ببساطة: خلاص اعتبريني مش غريب
ميرا : هو انا اعرفك
زياد: لا
ميرا : طب في صلة قرابة ما بينا
زياد: لا
ميرا : طب مش عايز تاخد الفلوس ليه
زياد: لا
ميرا باستغراب: لا ايه هو انت علقت
زياد: خلاص اعتبريني سواق تاكسي بس مش باخد فلوس
ميرا بحيره وغباء : الاه هو في سواق تاكسي مش بياخد فلوس امال انا بيضحك عليا ولا ايه
زياد بغيظ : انا بقول اعتبريني
ميرا وهي تحرك وجهها بنفي : لا انا مش بعرف اعتبر
زياد وهو  ياخذ منها النقود : تعرفي انا هخدهم عارفه هخدهم ليه
ميرا : ليه
زياد :علشان اخلص من كلامك ..... يلا انزلي
ميرا بدهشة ودراما : ايه ده انت بتطردني اكمنها عربيتك وانا واحده غلبانه ومنكسره ومكنتش لاقية تاكسي اركبه وكونت واقفة لوحدي في الشارع والكلب كان بيجري عليا و....
قاطعها زياد قائلا : ايه ايه خلاص كفايه انا اسف اتفضلي حضرتك لو هتتكرمي عليا وتنزلي
رفعت ميرا رأسها بشموخ : اكيد طبعا هنزل انا مش بقعد مع ناس بتاخد اجرة مساعدتها
ترجلت ميرا من السياره واغلقت الباب خلفها ونظر لها زياد بصدمه اليست هي من كانت تريد ان تعطيه النقود واصرت عليه بذالك وهو اخذها بسبب اصرارها لا اكثر ثواني وانطلق زياد بسيارته وهو مندهشا مما قالته