عشقت انفاسك
الحلقه 10
(عند أحمد )
بعد محاولات ومحاولات اقنعت هناء نرجعوا ليبيا ع اساس بنطمن علي امي
ولما وصلنا حكيت لباتي علي حمل ليلى واني منبيش انسيبها خصوصا انها حامل بولدي.وهو حكي مع هناء في الاول بدت اتعيط وترفع في صوتها بس بعدين حكى معاها في الدار بروحهم واقتنعت صار زي المره الي فاتت لما اتزوجت ليلى
خاطري نعرف كيف باتي يقنع فيها
المهم وصلنا خشيت انا وهناء لشقه كانت زعلانه ومضايقه خشت لدار وصكرت عليها . وجعتني واجد بس منقدرش نظلم ليلى حرام حتى هيا
مشيت بنشوف ليلى معاي مفاتيح فتحت الشقه القيتها فاضيه ومضلمه
عديت للمطبخ القيت في الثلاجه كنافه
عنجد امها تعرف اطيب بنتها خياااااال 😍
حسيت بتخربيش الباب مشيت شور الصاله
وفتحت ليلى الباب وقعدت اتبحت فيا
ليلى ** قل أعوذ بربي الفلق
أحمد ** لا منش شبح متخفش
ليلى ** شن جابك من فرنسا
أحمد ** جي لمراتي حبيبتي من حقي على مااضن
ليلى ** معليش وخر
أحمد ** لولو قلبك ابيض سامحيني .انا جاي بنصلح غلطتي وقاعد هنا في ليبيا خلاص معش بنرجع لفرنسا
ليلى ** وشن الي جد عليك
بحتت في بطنها
أحمد ** يرضيك وليدي يعيش بلا باته
ليلى **😲 من قالك
أحمد ** يعني متبش تخبريني قبل
ليلى ** أحمد وخر بالله عليك
أحمد ** ها وخرت بس معاش ادفي حسيتها راه
ليلى ** لا غايته انخليك . وانت مطلقني
أحمد ** لا مش مطلقك مزال مطلقتكش انا يعني مزلتي حلالي
ليلى ** كيف صار
أحمد ** مش مهم كيف صار المهم انك مزلتي مراتي وبنقعد جنبك وهناء تعرف بالشئ هذا وموافقه نعدل بينكم يعني يوم عندك ويوم عندها
ليلى ** وانا مش موافقه
أحمد ** لولو هيا عاد
ليلى ** نحكي جد
أحمد ** وانا مش مسيب مراتي وولدي حتى لو غصب عنك بنقعد معاك
عند ليلى / بحتت فيه وهو يحكيلي رايح سمح 😍 يهبل . قعد يحكي امتع مش مسيبك ونبيك والكلام هذا . وانا كنت عارفه انه رجع عشان البيبي الي في بطني مش عشاني نا بس قدر يضحك عليا بكم كلمه وخلى قلبي يحن
قعدت انبحت فيه ونبتسم رايفت عليه علي الرغم من اني مسامحتاش لأنه سيبني وسافر بس مقدرتش اندس فرحتي بشوفته
بعد شافني مبتسمه قعد يبتسم حتى هو
أحمد ** كنك
ليلى ** مكنش
أحمد ** لا نشبح فيك مبتسمه بس
ليلى ** ابتسامتك في وجه أخيك صدقه .مش صح
أحمد ** صح
ليلى ** خلاص انا نصدق عليك
أحمد ** تصدقي عليا صار .باهي تو تعرفي كيف تصدقي عليا مرا اخره
ليلى ** لا أحمد نزلني يابارد
أحمد ** حبيبي مرايف عليك وااااااجد .
❤ ومشينه
/
/
/
(عند ولاء )
رقدت بصعوبه انحس بروحي مضايقه ومجانيش النوم لبعد وين وين . وانا راقده انحس بروحي غارقه وجهي كله عرق ونتنفس بصعوبه قعدت نقلب في وجهي ايمين يسار لين قفزت من النوم
كنت نشوف في كابوس
حلمت كأنهم رافعيني في تابوت ومدايرين جنازتي ع البحر اهلي كلهم كانوا يبكو وهشام كان يبحت من بعيد ويبكئ قعد يخش للبحر بشوي بشوي ليت معاش بان وغرق
بعد قفزت شربت اميه ومسكت نقالي دزيت لهشام رساله
( حبيبي انا موافقه نتزوجك )
حطيت النقال وقعدت نقرأ في أية الكرسي وأذكار
وانفكر في حالتي هشام غلط في حقي ومستاهلنيش بس انا انحبه ونبي انعيش آخر ايامي امعاه
رجعت رقدت وتريحت اشويه بعد قريت قرأن
/
/
/
(عند هشام )
كالعاده نضت علي ازعاج خواتي الصغيرات توأم شيطانات بعيد عنكم . يهبلن الواحد يركبن الشيب
نهى وسهى مواليد 2001 نايضات 7 بيمشن للمدرسه قاعدات في الصاله وانا في داري نسمع في هرجتهن وناعس نبي نرقد
نهى ** ماما ماما 😠تعالي قوليلها
سهى ** مدخلكش بيا انت انا بنلبس الشنطه هذي
نهى ** انا منبيكش تلبسي زي انا بنلبس زيها انت البسي الاخره
سهى ** عدي سلم ابنيتي كملي مشط شاعرك راهو وقت الساعه 7:30 تو هذيك الهبله المديره اتخلينه بره في الشمس
نهى ** والله مانك لابستيها هاتيها قتلك
سهى ** هاتيها ياكلبه
قعدن يكرن في الشنطه من بعضهن
