فوزية : مكيبانش ليك أ براهيم بلي زربو علينا أش غادي نوجدو فسيمنة خاصنا شحال من حاجة
براهيم : إيو كالو ليك كلشي على حسابهم غادي إديرو العرس هنا فالدوار من بعد غيدي معاه مراتو للمدينة السيد مزروب أ فوزية عندو الخدمة ممساليش
فوزية : إيوا صافي هوما إعرفو
فهاد الأثناء ريم الضغمة وحلات ليها صافي هادشي داخل المعقول وزربان من الفوق دارت عند باها متوثرة
ريم : با بابا وقرايتي أش غندير فيها
براهيم : ( مغوبش ) واش حنا كنهضرو فجيه ونتي فجيه راه ألالة عطينا الكلمة للسيد أشمن قراية باقي باش نفعاتك هاد السنين كاملة بلا ما تشوهينا الله إرضي عليك راه قرينا الفاتحة ولي عطا الله عطاه
قرصاتها مها من تحت الطبلة وحمرات فيها عينيها بمعنى سكتي داكشي لي دارت نيت مبقا عندها ميدار ولكن واش غادي تستسلم بهاد السهولة ...
من بعد ما تعشاو خوتها خرجو لبرا وباها مشا إنعس هيا بقات مع خوتاتها ومها جمعو المواعن والدار عاد مشاو البنات لبيتهوم دخلات ريم وكلسات فبلاصتها مزال ممستوعباش أش كيوقع ليها حطات راسها بين إديها دارت عندها بشرى
بشرى : الله ياختي واش غرقو ليك الباطوات راكي زعما غادا تزوجي(شافتها مجوباتهاش) يلاه تصبحو على خير نعسي وخوي راسك
ريم : ( هزات فيها راسها ) أوووف أنا راسي كيضرني بقوة التخمام فين غادا نتي بعدا دوزي باتي معانا
بشرى : لا منصيبش سماعيل ( ولدها ) كيبكي غادي إصدعكوم بالليل
ريم : دوزي أتا تركدي على أساس حنا دابا طايحين دودات بالنعاس
جيهان : أنا غنخلي ليك بلاصتي نعسي فيها وأنا نفرش فالأرض حيث نتي مثقلة
بشرى :( مشات عندها وجبدات ليها حناكها ) إخلي ليا ليكيفهم
جيهان : ( شدات فحناكها ) أححح ضريتيني رانا كبيرة راه عندي 14 عام كنفهم كلشي
ريم : صدعتوني فراسي زيدو تنعسو وطفيو عليا داك الضو
داكشي لي دارو كل وحدة قادات بلاصتها ونعسات بشرى وريم بقاو كيهضرو شوية أما جيهان نعسات حتى داهوم النعاس كاملين
الصباح 🌞🌞🌞🌞
فاقت فوزية هيا اللولة ووجدات الفطور فطر براهيم من بعد مشا إتلقى بنسيبو إوجدو الوراق لي خاصين من بعد دخلات عند بناتها لقاتهوم كل وحدة وكيف ناعسة
فوزية : أويلي باقي ناعسين راه باقي عندنا شلا ميدار
كل وحدة فيهوم كتقلب فجيهة
فوزية : (حلات الشرجم ) كلت ليكوم نوضو يلاه ريم بشرى ياك كلت ليك البارح نعسي فالبيت لاخر حيث عارفة مغاديش تنعسو إلى تجمعتو
ريم : ( كتمدد) هاحنا نايضين أ ماما صافي
من بعد كل وحدة فيهوم ناضت غسلو وجهوم وفطرو فطور عادي زيت بلدية وعسل زبدة وخبز ديال الدار مع أتاي وكل وحدة شدات جيهة من الشقا ومهوم مشات عند البهايم عطاتهم ميكلو وملي سلات لقات البنات نصبو الغدا وعجنو والدار نقية مشات لبيتها تجبد شي حوايج ومجوهرات ديال الدهاز ديال بنتها كانت كتوجدهوم ليها شحال هدي كانت عارفة بلي شي نهار غادي تزوج كانت كتشوف شنو لي خاصها باقي
أنت تقرأ
ليلة زفافي غيرت حياتي 💞💞 (بالدارجة المغربية )
Randomالقصة ديال كتحكي على بزاف ديال المشاكل الإجتماعية لكتعيشهوم البنت المغربية في صمت سواء فالبادية أو المدينة قررت نكشف الستار على بعض منهوم كنتمنى تعجبكوم القصة 😍😍😍
