ريم : (غير سمعات سيرة باها تخلعات حيث غادي إقتلها قبل ما تشرح ليه شدات لعائشة فيديها ) با لا با لا الله إخليك أخالتي عفاك (كتبكي)
عائشة : (نترات ليه إيديها )بعدي مني أنا شنو غادي ندير بيك
خرجات عائشة من البيت وخلات ريم غتسطى بالبكا مشات لبيتها هزات التيليفون
عائشة (كيصوني حتى جاوبها ) سي براهيم أجي دبا عفاك نتا ومراتك
براهيم :لالة عائشة شنو واقع واش كاين شي مشكل
(تصلات بيه حيث هو الوحيد لعندو التيليفون فالدار )
عائشة :حتى تجي وتعرف (قطعات )
براهيم خرج من بيتو كان كيرتاح شوية دخل عند العيلات فالكوزينة لقاهوم كيوجدو فطور العروسة
براهيم(،مخنزر ) فوزية أجي نهضر معاك
فوزية :(شافت فيه وحطات داكشي لفيديها وخرجات عندو ) براهيم واش كاين شي مشكيل مالك معصب
براهيم :لي مالي أ لالة هو ديك مت محسن تصلات بيا كالت ليك أجيو دبا معرفتش أش واقع
فوزية : أويلي ياكما بنتي واقعة ليها شي حاجة مكانتش هيا هديك ملي مشات
براهيم : كولي عنداك غير تكون فضحاتنا هكاك ليخاصكي تكولي والله وديرها أ فوزية حتا نقتلها حسن ليا ندوز على قبرها ولا ندوز على فضايحها (مشا وخلاها )
فوزية من بعد ما سمعات ديك الهضرة رجليها فشلو بيها مشات محادية مع الحيط حتى وصلات عند بيت بشرى كانت ناعسة فيه
فوزية : (طاحت كلسات فوق الناموسية ) بشرى بشرى نوضي أبنتي نوضي راه مصيبة نزلات على راسنا
بشرى (فاقت وعينيها باقين مسدودين حيث يلاه داها النعاس شافت مها الدم هارب ليها من وجها ناضت بزربة ) مي ماما مالكي علاش سخفانة
فوزية : نوضي لبسي حوايجك راه باك مشا إضبر لينا على شي مركوب نمشيو عند ختك راه صونات لينا عجوزتها
ناضت بشرى لبسات جلبتها مع الشال وعاونات مها حتى لبساتها ووصات خالتها على ولدها وخرجو ركبو فوزية فيها الدوخة خايفة من هضرة راجلها مسافة ديال الطريق كانو قدام الدار دقو حلات ليهوم عائشة وهيا معصبة براهيم عرف بلي محسن مكاينش فالدار بقا كيتسناه فبرا فوزية دخلات : شنو واقع أ لالة عائشة
عائشة (نفجرات عليها ) دخلي سولي ديك بنتك المصونة خرج ولدي عندها بلا عقل معرفتوش فينا حتا مشا
فوزية غير سمعتها جرات ودخلات عندها هيا وبشرى ريم غير شافتها ناضت عندها وعنقاتها كتبكي
فوزية(كلسات حيث رجليها فشلو )مالك أبنتي أش واقع عاودي ليا
ريم :أنا منحوسة أ ماما معندي زهر فوالو والو (كتبكي وعاودات ليها كلشي بالتفصيل الممل )هادشي لي وقع أ ماما
فوزية ؛(ضربات فخادها )أويلي أش هاد المصيبة وعرفتي شكون هوا ومحسن فين مشا
ريم: لا معارفاش أ ماما
فوزية( صافي سكتات حتى ناضت ) نوضي يلاه بدلي حوايجك نوضي
ريم :فين غدي نمشي أ ماما
بشرى :ماما فين غادي تديها
فوزية :أنا مغادي نمشي لحتى بلاصة نتي لغادي تمشي خاصكي تهربي من هنا قبل ميعرف باك وخوك أش واقع
ريم (شافت فيها مصدومة ) أش هاد الهضرة أ ماما فين غادي نهرب
فوزية :(نوضتها بالجهد حتى تقسحات ) غادي تخرجي من هنا دبا وتمشي واش بغيتي تسكتي ليا قلبي ءءء نوضي لبسي حوايجك راه باك غادي إقتلك
ريم شافت فيها بصاح باها غادي إقتلها جبدات ليها بشرى جلابة من بليزتها ريم كانت مترددة حيث معندهاش الشجاعة لهاد شي ولكن معندهاش شي حل أخر ديك الجلابة وشال على شعرها الفازك وبلغة فرجليها
فوزية (جبدات من صدرها شي فلوس إكونو جوج ربعميات ومية درهم وحيدات الحلقات لي دايرة فودنيها والدبليج فيديها كانو ديال الدهب ) خودي هادو ديريهوم فستيان ديالك وسيري خرجي من هنا أنا غنمشي عند باك نلاهيه بينما مشيتي
ريم :(عنقات مها )ماما أنا خايفة
فوزية : ماعندك مناش تخافي خرجي دبا
ريم عنقات بشرى وكتبكي فوزية مسحات دموعها خرجات عند براهيم داتو بعيد على الدار وكلها كترعد معرفاتش شنو غتقول ليه
ريم خرجات من البيت للمراح بان ليها الباب مشات ليه وخرجات بان ليها باها ومها كيهضرو مشات بالجرا دخلات لواحد الزنقة وكتشوف وراها بقات كتمشا حتى خرجات للشانطي
كان الصباح طلع والشمس بانت مشات مع داك للشانطي وكتشوف وراها ووجها عامر بالدموع قطعات مسافة ديال كيلومتر تقريبا الحديد لي كان كيدوز قليل بزاف شافت مورها بان ليها طوبيس جاي بقات مترددة واش تركب فيها ولكن معندهاش حل أخر هزات إيديها وقف وطلعات ركبات
كان خاوي فيه غير شي رجال وواحد البنت هيا كلسات فالكرسي اللخر عاد بدات كيرجع معاها داكشي لي وقع ليها وهداك لي تكرفس ماشي راجلها حطات إيديها على وجها
ريم (كتبكي وتشهق )لا لا ميمكنش أش هادشي
كانت كتبكي وسط إيديها حتى كاع لي كانو فالطوبيس دارو إشوفوها مالها هيا ملي فشات قلبها حطات راسها على الجاجة وعقلها محبسش من التفكير وصل الطوبيس للمحطة ليف المدينة هيا خلصات ونزلات كانت فالمدينة لي كتقرا فيها ولكن معندها حتى شي بلاصة تمشي ليها حتى من الصحابات معندهاش بقات كتفكر خاصها تخوي هاد المدينة كلها حيت غادي إلقوها أكيد قررت تشد الكار مشات لمحطات الكيران عامرة بالناس والصدعات مشات لبلاصة التداكير
ريم : سلام خويا إمتى غادي إخرج أقرب كار عفاك (كتهضر وخايفة من القرار ديالها )
الراجل : كاين واحد دبا غادي إخرج من هنا ل خمسة دقايق كيدي ل**** بغيتي تمشي فيه
ريم عطاتو الموافقة براسها خلاصات التدكيرة خرجات ومشات سولات على داك الكار لقاتو ركبات فيه كلسات فبلاصتها الناس كل واحد شاد بلاصتو والكار نطالق ريم لحمها تبورش عليها بقات كتشوف اللور غتخلي دوارها ومدينتها والأهم عائلتها
أش بان ليكوم فالقرار لي خدات🤔🤔🤔
أنت تقرأ
ليلة زفافي غيرت حياتي 💞💞 (بالدارجة المغربية )
Randomالقصة ديال كتحكي على بزاف ديال المشاكل الإجتماعية لكتعيشهوم البنت المغربية في صمت سواء فالبادية أو المدينة قررت نكشف الستار على بعض منهوم كنتمنى تعجبكوم القصة 😍😍😍
