لقات ليليا كتسناها حدا الكوافوز وفيديها مجفف الشعر
ليليا : أجي نشف ليك شعرك عاد نزلو
ريم :(جاها الموضوع فشكل) لا لا غير خليه دبا إنشف بوحدو بلاما نصدعك
ليليا :أشمن صداع أ صاحبتي راه غادي تمرضي
ريم سمعات منها وتاجهات للكرسي كلسات فيه جات ليليا وراها خدماتو بدات كتنشف ليها حتى سلات خدات مشطة وكتمشط ليها
ليليا: (فرحانة )عرفتي ديما كنت كنتمنى تكون عندي شي ختى نمشط ليها (حطات المشطة)
ريم (بتسمات ليها ) شكرا ليك
خرجو من البيت كان الحال بدا إضلم والثريات ديال الدار شاعلين ريم غير كتشوف مزال عينيها ممتيقينش أش كتشوف داتها ليليا لوسط الدار فواحد الصالون عصري كانت كالسة فيه ثريا ودايرة رجل على رجل هازة فيديها فنجان ديال القهوة كتشرب فيه بكل نخوة وثقة جاو البنات كلسو معاها حطات الفنجان
ثريا : بنتي ريم رتاحيتي شوية نزلات ليك السخانة
ريم (حشمانة منها )أه ألالة أنا دبا مزيان
ثريا : ولي تعيطي عليا خالتي واخا (عطاتها موافقة براسها ) يلاه كبو القهوة
ناضت ليليا كبات ليها ولريم عطاتها ليها وحطاتها قدامها كتفرك فيديها من التوثر ومنزلة راسها شافتها ثريا : بنتي علاش مكتشربيش قهوتك واش معجباتكش
ريم (كتهضر بشوية ) لا ماشي هكاك غير مكنحملهاش أنا كنشرب غير أتاي
ثريا : واخا أبنتي دبا نكول للبنات إصاوبوه ليك مفيها والو
ثريا عيطات للخدمة وطلبات منها تجيب أتاي للريم وداكشي لي كان جابو ليها أتاي خدات الكاس وبدات تشرب فيه ومنزلة راسها سولاتها ثورية على عمرها وفين جات جاوباتها
ثريا بقات كتهضر مع بنتها شوية حتى دخل مهدي
مهدي : ها واحد السلام عليكم(شاف فريم ) أووه الضيفة ديالنا فاقت كيبقيتي دبا
نقزات ديك الفرفارة ديال ليليا : سميتها ريم
مهدي : مشرفين أنا مهدي
ريم : (محساتش براسها )بحال سميت خويا الصغير (عينيها لمعو )
كلشي سكت وكيشوف فيها هيا عاد وعات براسها سكتات
مهدي (ضحك ) إيوا مزيان عاشت الأسامي المهم (كيهضر مع ثريا ) ماما أنا غنطلع ندوش ونبدل حوايجي غنخرج مع صحابي بلا ما ديري حسابي فالعشا متسناش جوابها عارف غادي تعطيه عاوتاني محاضرة
مشا دغيا طلع بالجرا للبيتو مكملاتش حتى عشرة دقايق حتى نزل مفركس والريحة كتعطعط منو من بعيد الكونطاكط فيدو مشا للصالون ريم غير شافتو نزلات راسها
مهدي : يلاه أالجميلات أنا خارج (صيفط ليهوم بوسة فالهوا)
مشا خرج داز الوقت حطو الخدامات العشا ناضو تعشاو داكشي خفيف شربة وسلاطات ريم جاها عجب حيث بحال هادشي مكاينش فدارهوم المهم سلاو ناضت ريم وليليا لبيتهوم وحتى ثريا مشات لبيتها بدلات حوايجها ولبسات شوميز دونوي كحلة لاحت عليها بينوارها طويل وحازماه شعرها خالاتو مطلوق السيدة باقة شباب تبارك الله
أنت تقرأ
ليلة زفافي غيرت حياتي 💞💞 (بالدارجة المغربية )
Rastgeleالقصة ديال كتحكي على بزاف ديال المشاكل الإجتماعية لكتعيشهوم البنت المغربية في صمت سواء فالبادية أو المدينة قررت نكشف الستار على بعض منهوم كنتمنى تعجبكوم القصة 😍😍😍
