عمران وشو اخد لون أحمر وعيونو لمعت فيها الدموع .... فكو السفلي ارتجف وهو بيحاول يمسك نفسو : برضو محتفظ بيها ؟_ أكيد ، م طلعت يوم من جزلاني يا عُمران .... انا م قادر اصدق ... حقيقي م قادر اصدق ... انو بعد كل السنين دي الله كتب لينا نتلاقى تاني .... وم قادر اصدق انو الواقف قدامي دا ياهو عُمران الخليتو ولد صغير .ابتسم م بين دموعو : دي ٢١ سنة ... م شي هين .عاين للكرسي ورجع يعاين لي عزيز تاني : اتفضل ... اتفضل اقعد .عزيز اتوجه ناحية الكرسي وقعد وعُمران قعد قُصادو وطوالي سألو : وين خالتو سارة ؟_ خليتها ف لندن_ ونونا ؟ضحك : نونا بقت بت كبييييرة واتخرجت من الجامعة كمان ._ والله ماشاء الله العيال كبرت ._ وانت زاتك كبرت وكمان بقيت تقول العيال كبرت 😂... سبحان الله من السنين البتجري بينا فجأة ... هسه قريب دا انا كنت بشيلك والعبك ._ فعلاً بتجري ... بتجري بسرعة من دون م حتى ننتبه ليها .سكتوا الاتنين لمسافة لحد م عمران هز راسو وهو بقول : صراحة م قادر اصدق محتاج زول يقرصني عشان اعرف اني م في حلم ... معقول بعد السنين دي كلها يا عم عزيز ؟_ سبحان الله ._ م فارقت بالي ف يوم ... كنت دايماً بفكر فيك ... والحصل عليك شنو وحلقاك كيف تاني ... وفتشت على قد م اقدر عنك بس م كنت بلقى عنك اي شي ._ صدقني يا عُمران انا نفس الشي ... بعد سنتين من سفري رجعت السودان تاني عشان افتش عليكم لكن م لقيت اي اثر ليكم حتى البيت قالو لي رحلتو منو .... كنت متألم شديد وحاسي بذنب .... لحدي م فقدت الامل ... الموضوع كان مؤلم كانك سافرت ورجعت لقيت اطفالك مفقودين وبقيت بتفتش عليهم بس ماف أمل ... وبتسأل نفسك ياربي حاصل عليهم شنو جعانين ، عطشانين ؟ خايفين بردانين ؟ بس ماف اي اجابة كلو مجهول ._ الحمدلله يا عم عزيز احنا عشنا بسترة ربنا وكرمو.... الحمدلله ._ اول م شفت الاخبار البتتكلم عن تعيين سفير جديد بجنوب افريقيا وشاب والناس قايمة بالموضوع وقاعدة وبعدين قريت الاسم م قدرت اصدق، معقول دا عمران ؟ يعني الولد الخليتو صغير واخبارو اتقطعت طول السنين دي لمن ربنا يلمني بيه تاني القاه بقا سفير مره واحدة ماشاء الله ، وقتها كمية الفخر الحسيتها بيك يا عمران خلتني ابكي من السعادة .... وكان لازم اجي اشوفك ... لانو انت ربنا ظهرك لي ف اكتر وقت انا محتاج ليك فيه ..._ لطالما كنت مصدر فخر لينا يا دكتور عزيز ، اظن جا الوقت الارد ليك فيه الشعور دا ( اجتهدوا يا اخوانا واسعوا وانجحوا وخليكم مصدر فخر للناس البيعرفوكم واهم شي لنفسكم ♥️)صلح قعدتو : محتاج لي ف شنو ؟ اطلب الانت عايزو وانا حنفذ.دنقر راسو وابتسم ... وعُمران قدر يقرا ملامح الحزن والهم الارتسمت فجأة على وشو .عـمران : ان شاء الله خير ؟_ الموضوع كبير يا عمران كبير شديد ... وانا عايزك ف شي واحد بس ._ طيب قول ..._ انت عارف انو انا الله رزقني بي بت واحدة بس ... م عندها اولاد اخوان ولا عندها اهل غيري انا وامها عشان يكونو ليها سند لو انا حصل لي شي ... م عندي غير ربنا ... وحقيقي الوضع الانا فيه صعب ._ انا م فاهم شي ..._ انا يا عمران النوم طاير من عيني لي قرابة الاسبوع وبفكر ... انا ونونا وسارة ف خطر كبير ... انا م مهم كدا كدا خلاص مصيري اتحدد بس بتي ومرتي ... بتي ومرتي هم الشي الوحيد المهم هسه بالنسبة لي ولازم اطلعهم من دائرة الخطر ... وربنا ظهرك لي تاني وم صدقت لميت فيك ... انت الوحيد البقدر بي كل ثقة اخليهم امانه عندك ._ دا شنو الكلام دا ؟ خطر شنو ؟ ومصيرك اتحدد كيف ودا منو البيمثل ليك الخطر دا ؟_ حفهمك واحدة واحدة ..._ طيب انا سامع ..._ انا يا عـمران ... ح ... حتصفى .عمران حسا قلبو وقع ف الارض وجسمو بقا بااااارد ... بلع ريقو : ها ؟_ زي م سمعت ... حتصفى ... حيقتلوني_ منو ؟_ ناس انا خطر بالنسبة ليهم_ كيف يعني ؟ كيف يعني يصفوك وكيف انت خطر عليهم ... يا عم عزيز دا شنو الكلام دا ._ زي م سمعت يا ولدي ... المؤسسة الطبية الانا شغال فيها دي ... اكتشفت وللأسف الشديد انو ف ممارسات غير اخلاقية بتتم فيها ؟_ غير اخلاقية ؟_ ايوه ... غير اخلاقية ... ف تجارب علمية بتتعمل على البشر ... والموضوع دا خطير شديد ولو اتكشف للعالم حتبقى فضيحة دولية ... انا اكتشفت الشي دا وبما اني اكتشفتو وهم عرفو اني اكتشفتو فما فاضل لي كتير ... بس كل العايزك تعملو انو نونا وسارة يكونو امانة ف رقبتكعمران بي صدمة :لا ... مستحيل ... مستحيل ... بعد السنين دي كلها وبعد م لميت فيك تاني تقول لي انك حتتصفى ؟ انا م حسمح بالشي دا .عزيز بانفعال : لا ... لا يا عُمران يا ولدي م تندمني اني استعنت بيك ... اياك ثم اياك تعرض روحك للخطر و إياك تدخل ... الموضوع اكبر مني ومنك_ يعني انت مستسلم للشي دا ؟_ حالياً م باليد حيلة يا ولدي ._ لكن_ اعفي لي ... م عندي وقت ... اسمع كلامي بس ... انا ميت ميت والحمدلله الدنيا دي عشت فيها احسن عيشة بالطول والعرض ... سافرت وقريت وربنا رزقني بأجمل وأبر ابنة واكرم واحب زوجة ... وديل حالياً الشي الوحيد البيهمني ... حرسلهم ليك هنا كأنهم جايين اجازة وبعد كدا حيرجعو السودان ... انا كل م املك وكل الحوشتو ف سنيني الاخيره حولتو ف حسابي البنكي ف السودان ... والحمدلله عندي بيت ليهم ... اول م يوصلو السودان عايزك تتواصل مع واحد اسمو عادل ... دا صديق وزميل قديم ... هو الحيقوم بباقي كل الترتياب..._ انت فاكر اني حتخلى عنك ؟_ عمران_ ف اكتر من طريقة احنا ممكن ننقذ بيها الموقف ._ صدقني لو في انا كان عملتها من زمان ... حالياً م عندي اي طريقة_ والناس ديل منو ؟ لازم نضمن انهم يتحاسبو_ انا عندي البيضمن تورطهم ف الافعال دي ... لكن الشي دا م يظهر الا بعد ... الا بعد مماتي ... وقتها نونا وسارة حيكونو خلاص ف امان .ختا يدو ف وشو : لا حول ولا قوة الا بالله ._ السلسلة ، الدليل كلو حيكون ف السلسلة ؟_ سلسلة شنو ؟ انا حاسي اني حفقد اعصابي ._ لا ... عايزك تتماسك يا عمران البطل ._ اتماسك كيف وانت عايزني انتظر خبر اغتيالك بكل بساطة ... طيب م ممكن تبلغ الشرطة ؟_ انا مهدد بي مرتي وبتي .. م حقدر اقدم على خطوة زي دي ..._ ياربي 💔💔💔..._ لا بأس عليك يا ابني ... كلو مسطر ومكتوب والحمدلله على كل حال ...._ يعني ... يعني انا م حشوفك تاني ؟ 💔_ الله لو كاتب لي عمر بتشوفني .مسح الدمعة العنيدة السالت على خدو ودنقر راسو وهو بيشيل ف انفاسو وبيهمس : اللهم اني أعوذ بك من قهر الرجال ... أعوذ بك من قهر الرجال .عزيز بابتسامة : انا كدا واثق انو اغلى اتنين ف حياتي ف ايدي أمينة ..._ م تخاف عليهم ... حشيلهم ف عيوني .عاين لي ساعتو : انا عندي ٣ ساعات بس لي سفري ._ مسافر طوالي ؟_ اي_ جيت هنا كيف ؟_ مؤتمر طبي ... ويبدو انو الاخير لي ._ كيف خلوك تسافر ؟_ هم واثقين اني حرجع تاني بما انو اسرتي متواجدة هناك ...عاين ليه ف عيونو : خايف ؟_ الكنت خايف عليهم بقيت مطمن عليهم ... اما انا م خايف على نفسي بعد دا ... كلنا الى الله وكلنا اليه راجعون ._ الموضوع صعب انا م قادر استوعبو 💔ابتسم ابتسامة باهته : ولا انا والله ... حاجات زي دي كنت بشوفها ف الافلام وم كنت متوقع ولا بنسبة ١٪ اني ف يوم من الايام اكون ضمن تفاصيلها ... لكن لا نقول سوى الحمدلله يا ولدي وف النهاية لن يصيبنا الا م كتب الله لنا ... عموما زي م فهمتك ... انا جهزت ليهم تذاكرهم واي شي .. حيجو كانها مجرد اجازة ... على الاقل حتكون معاهم انت لمن يجيهم خبري_ كفاية 💔... انت لي مسلم بفكرة الموت كدا يا عم عزيز ... انا م عهدتك انهزامي ومستسلم والله_ ف حاجات يا عمران يا ابني م حتفهمها الا لمن تكبر او على الاحرى لمن ربنا يوهبك زوجة تحبها ويكون عندك ابن او ابنة وقتها حتستوعب فكرة انك تضحي بأي شي ف سبيل حمايتهم ... حتى لو كان روحك ... دي فطرة ربنا بيجبلها جواك وحتلقاها محركاك وقتها ... م هو لو م اتأذيت انا حيتأذوا هم ... وانا اهون لي الموت الف مرة من انو واحدة فيهم تتمس بسوء او شر من مجرم ... عايزك بس تختهم جوه عيونك .الدموع كانت بتلمع ف عيونو وهو بيحاول يتماسك بقدر الامكان : ابشر ...عم الصمت بينهم لفترة م قصيرة وكان واضح انو اي واحد فيهم دخل ف دوامة تفكير ... لحدي م عزيز بادر تاني بالكلام :عايز اوريك شي تاني ... م عارف هل دا وقتو المناسب او لا ... بس المتأكد منو ... انو دا حقك ولازم تعرفو ._ طيب ، انا سامعك ...شال انفاسو وهو بعاين ليه وملامحو وضحت انو ف صراع داخلي مع نفسو بين يبوح او لا ... استجمع شجاعتو وقال ليه : الحاجة دي انا من زمان كنت ف صراع مع نفسي هل انا اوريك ولا لا ، بس وقتها كنت صغير شديد وهسه ماشاء الله كبرت وبقيت راجل وحتقدر تستحمل ._ ان شاء الله خير ؟_ حُسنة و فضل م امك وابوك الحقيقيين ..._ ها ؟_ زي م قلت ليك_ عم عزيز .... دا شنو البتقول لي فيه دا ؟؟؟ كيف يعني م امي وابوي ؟_ اعفي لي يا ولدي ، انا عارف الموضوع دا قاسي ومؤلم بس انا عايزك تعرف .... م عندي مصلحة من اني اوريك الحقيقة غير اني اكون مرتاح وانا مي...قاطعو : عليك الله م تقولها ... م تقولها الله يرضى عليك 💔._ عـمران .... سامحني لاني بعيش فيك ف ضغط رهيب ... لكن عايزك تستحمل ... قد يكون اعلى من قدرة تحملك .. لكن استحمل ... عشاني ..._ ................_ باختصار ... حسنة وفضل م امك وابوك البيولوجيين ... بس انا واثق كمية الحب الكنوها ف قلوبهم ليك اكبر واسمى واطهر من الكانت حتجيك من الحقيقيين ..._ عم عزيز ... معليش بس انا م مصدق .... يعني امي حتسكت طول السنين دي وم حتقول لي ؟_ لانها بتحبك شديد وانت غالي على قلبها ._ انت جادي يعني ف البتقول فيه ؟!هز راسو بمعنى نعم ...عـمران لسا م كان قادر يستوعب الكلام ... وفجأة لقا نفسو بين نارين ... اولاً ثقتو الكبيرة ف عزيز وانو مستحيل يكذب عليه و بقول شي م حاصل او حقيقي و ثانياً عدم تقبلو للفكرة ... يعني فجأة وهو عمرو كم وتلاتين يادوب حيعرف انو امو واخوانو م عندو معاهم صلة دم بالحقيقة ؟رجع لواقعو بصوت عزيز القال ليه : انا وريتك الحقيقة واديتك طرف الخيط_ طيب انا وصلتهم كيف ؟ و وين امي وابوي الحقيقيين ؟_ دي حخليها للوالدة الكريمة .... هي الوحيدة العندها احقية توريك القصة كاملة من كل النواحي ... وارجول م تقسو عليها ... ف والله كمية الحب والرعاية الوهبتك ليها م كنت حتلقاها عند امك الحقيقية .ارتسمت ابتسامة خفيفة ف وشو وهو بيشيح بنظراتو عن عزيز : يوم صدمات ... اكتشفت فيه انو اعز شخص على قلبي فاضل ليه ايام محددة ... وانو انا م ولد امي ._ لا ولدها ... وحتفضل طول عُمرك ولدها ...عاين لي ساعتو : جا وقتي ... مفروض اتحرك على المطار ...عمران وقف على حيلو : استنى .... يعني ... يعني خلاص ؟_ استودعنا نفسنا لرب العباد ♥️.... والحمدلله الذي قر عيني بشوفتك بعد كل السنين دي يا عمران ... انا ممتن لله جداً ومؤمن بقضاءه وقدره وكل شي بيعملو لينا لحكمة يعلمها هو وحده ... عايزك تكون قوي ومتماسك ... وم تزعل من امك واسمعها كويس ... وخلي بالك من نفسك ... ومن نونا وسارة ... و .... و م تنساني يا عمـران ... م تنساني ... خليني دايماً في قلبك وف دعاك .مسك يدو وهو بيعاين ليه ف عيونو : من يوم فتحت على الدنيا و وعيت انت م غادرت بالي ولا لي ثانية واحدة ... ولا عمرك حتغادر قلبي ولا عقلي يا عمي ... انت كنت بمثابة الوالد الانا اتحرمت منو ... كنت الحنان والركن الدافئ بالنسبة لي ... كنت باعث للامل والحماس والارادة ف نفسي ... ولا زلت ... الله وحدو عالم مكانتك ف روحي ... والله وحدو عالم مقدار الحزن الدخل ف نفسي وانت بتوريني انو دي اخر مرة اشوفك فيها 💔.ابتسم : نقول الحمدلله ♥️.جا عليهو وعانقو بعاطفة أبوية ... ربت على ضهرو : في امان الله ...عمران وهو بيمسح دموعو الحارة : طيب خليني اوصلك المطار ._ لا احتمال كبير اكون مراقب او متابعني ... م عايزك تظهر .. انا حركب تكسي وارجع الفندق ... ومن هناك طوالي على المطار .دنقر راسو : طيب ._ يلاعمران مشا معاهو لحدي بره ... لطالما اتمنى اللحظة دي ... انو يقابل عزيز تاني في يومٍ ما ... لكن حتى اليوم دا لمن جا ... كان محزن وم زي م اتخيلو ...كان مجبور انو يتقبل الحقيقة دي ... انو دي النهاية ...مضت ساعات بعد م عزيز طلع ... عـمران فضل قاعد ف كرسيه وافكارو متشتتة ومخو بيودي وبيجيب ...غير موضوع عزيز ... كان ف شي تاني ... انو م ولد حُسنة وفضل .... الشي الوحيد البيهمو هسه انو يعرف الحقيقة كاملة ... والوحيد الحيقدر يديه الحقيقة كاملة هي حُسنة .... بس حيواجها كيف ؟وهل الكلام دا بالجد حقيقي ؟يعني تصحى ف يوم عادي وتعرف انو اهلك م اهلك ؟ امك م هي امك ولا اخوانك هم اخوانك ... محرد شخص متبنى او متربي معاهم .وضع مقدمة راسو المسخنة بالتفكير في طرف المكتب ...وبعد دقايق طويلة لقا نفسو بيشيل التلفون وبيتصل على هبة السكرتيرة ._ ايوه يا مستر عمران_ انا نازل السودان يومين ... فتشي لي على اقرب حجز بسرعة ._ الموضوع لي دخل بالشغل ولا خاص ؟_ خاص ._ تمام ...قام من كرسيه وشال جكت البدلة وطلع من المكتب ....اتوجه ناحية عربيتو ومشا على البيت ...اول م دخل قعد ف الصالة قدام الشرفة المطله على البحر ... فضل مراقب حركة الامواج بهدوء ... صوت تلفونو علا ... شالو ورد : الو ؟جاه صوت هبة : لقيت حجز بكرة الساعة ٥ فجر ._ طيب كويس ..._ مش يومين ؟_ اي_ اوكي...قفل التلفون وختاه ف التربيزة ورجع يتأمل ف الامواج الفيروزية ... داعبت عقلو للدرجة الخلت النعاس يسيطر عليه ...م اخد وقت كتير عشان يغط ف نومة عميقة هو ف امس الاحتياج ليها ...كان عامل زي الطفل الصغير لمن يكون زعلان ويبكي ... وبعدها ينوم .اخد وقت طويل ف النوم وم صحا الا بصوت حركة واحدة من العاملات ... عاين لي ساعة الموبايل ... كانت الساعة ٧ مساء ...شال جكتو وطلع الطابق الفوق ...خشا الاوضا ... اخد ليهو دش منعش وغير هدومو ...وبعدها جاب شنطتو وختا غياراتو والحاجات الحيحتاج ليها ف اليومين ديل...قفل الشنطة ورقد ف سريرو ..._________________________________السودان ...في واحد من احياء بحري وف بيت جميل ومرتب اتلمت اسرة على السُفرة للغداء ... لمن فجأة الجرس ضرب .علياء الاخت الكبيرة لعـمران واللي جات تقضي الاجازة بي بناتها ( نور و نوف ) مع امها واخوها.كانت مقيمة ف السعودية مكان عملها كأخصائية تخدير ...اشرت بي يدها ل عبد الرحمن الكان قايم يفتح الباب : اقعد اقعد بفتحو انا ...مشت باتجاه الباب وفتحتو ... وقفت لي ثواني بي صدمة قبل م تضحك بصوت عالي : عمرااااااناتقدمت ناحيتو وحضنتو بحب وشوق شديد ... نظراً لي انو اشغالهم فرقتهم من بعض واي واحد بقا في قارة بعيد عن التاني مع انهم زمان م كانو بيتفرقو من بعض ...بالرغم من انو بقا ف فارق جسدي من ناحية الطول والحجم كبير بينهم الا انو نظرتها ليه كانت لسا طفولية ... قرصتو ف خدو وهي عاضة على اسنانها : الجابك هنا شنو ؟ عايز تفاجئنا يا عموري ؟ضحك وهو بيزح يدها من وشو : والله ياخ ممكن تقولي مفاجأةرجعت حضنتو تاني : مشتاقة ليك شديييييييد يا عمران ياخ .بصوتها العالي امها واخوها جو مارقين ... كانت مفاجأة بالنسبة ليهم ...وبعد دقايق طويلة من العناق والسلام ... عبدو شال شنطتو وخشو جوه .امو حلفت الا يتغدى معاهم لكن رفض بحجة انو مرهق عايز يرتاح وم جعان ...دخل جوه الاوضة ... استحم وغير هدومو واخد ليه غفوة للراحة ... صحا بملمس اليد الصغيرة البتتحسس ف وشو ...فتح عيونو ببطئ واذا بها نوف ابنة الثلاثة سنوات ، ضحكت : حالو عملان .كان راقد على ضهرو ... شالها بيدينو ورفعها فوق : نووووف .ضحكت وهي بتفرفر برجلينها .باسها ورفعها تاني فوق وصوت ضحكاتها الطفولية البريئة ادا المكان احساس دفئ وامان خاص ♥️.علياء جات داخلة الاوضة ... لقتو مرقدها على حضنو وبيمشي يدو على ضهرها الصغير وهو بيغني ليها وهي بترد ليه : الشطووووورة_ نوووووف_ الجات الاولى_ نووووف_ العسولة_ نوووووووف_ حبيبة خالو_ النووووووفضحكت وهي بتجي عليهم : معليش على المقاطعة يا عمران ونوف .. لكن ارح الشاي .عاين ليها : المغرب اذن ؟_ اي اذن_ طيب اقوم اصلي واجيكم .علياء : تعالي يا نونو خلي خالك يقوم .شالتها وطلعت بيها ...اما هو خش الحمام ... غسل وشو واتوضى ... صلى المغرب وطلع عليهم برة ...الهبوب كان بااارد ومع ريحة طين الشتول المرشوشة بالموية كانت الاجواء حلوة شديد ... اتلمت الاسرة الصغيرة ... حُسنة كانت متكلة ف السرير المفروش ليها ... والاولاد قاعدين ف الكراسي .علياء ظبطت الشاي والكيك وقعدو يضحكو ويتونسو ...لحدي م عمران طلب من علياء تدخل بناتها جوه يحضرو التلفزيون ...وطوالي قامت دخلتهم وجات قعدت .عبد الرحمن : اها عايز تقول لينا شنو؟ حتعرس ؟حُسنة : ان شاء الله يارب ييكون داير يعرس ... نفسي اشوفو عريس وارتاح .علياء : اها يا سي عمران اتكلم .. ف شنو ؟ ترا احنا الشمارات م بنقدر نستحملها .ختا كباية الشاي ف التربيزة القدامو... نظراتو اتجولت ف وشوش اخوانو ... لحدي م ف النهاية نظرتو استقرت ف وش حُسنة ....عم صمت تقيل على المكان لمن قال ليها : انا ولد منو ؟عبدو هز راسو بعدم استيعاب : دا شنو البتقول فيه دا؟حُسنة من الخلعة قعدت ...ظهر التوتر ف وش علياء : عمران ؟ صاحي انت ؟عاين ليهم : يا جماعة معليش خلوها هي الترد علي ...رجع يعاين ليها : انا عرفت الحقيقة ... بس عايز اعرف انا ولد منو ؟ وانتو لميتو فيني كيف ؟عبدالرحمن بنرفزة : انت جنيت ؟حُسنة نهرتو : اسكت ...كلهم بقو يعاينو ليها ....عاينت للأرض وسكتت لمسافة قبل م تقول : انا كنت عارفة انو اليوم دا جاي ... كنت عارفة انك حتعرف الحقيقة ف يوم .عبد الرحمن : امي انتي بتقولي ف شنو ؟عاينت ليه : عمـران_ مالو_ م اخوكم الشقيق .عمران وقف على حيلو : لي دسيتي مني الطيلة السنين دي ؟_ لانو م كان عندي قوة كافية اقول ليك بيها الكلام دا ._ طيب فهميني ابوي وامي الحقيقيين منو ؟ وانا وصلتكم كيف ؟_ انا بعرف ابوك بس ... امك م بعرفها .عبد الرحمن : امي دا شنو البتقولو فيه دا عايزين تجننوني ؟_ احكي لي القصة كاملة ..._..........................._ ابوي منو ؟_ ابوك .... ابوك علاء الرَمّال .عيونو اتوسعت بصدمة .... واول شي جا ف ذاكرتو اليوم داك قبل سنين طويلة ... سلمى وهي بتشيل عربيتو وتضرب بيها الحيطة وتتفرتق لي قطعة قطعة ...تعنيفها ليه واذلالها لي امو ... تحت مباركة علاء الواقف يتفرج ... لي يوم الليلة م ناسي نظراتو ... معقولة الراجل الاختار يسكت وم يفتح خشمو اليوم داك دا ابوه ؟تمتم : ك ... كيف ؟ ابوي .بلعت ريقها : انا لمن ولدت جناي الكان حيكون ف عمرك كدا هسه ... مات لي ف نفس اليوم ... كانت حالتي صعبة شديد وم فاضل لي الا اجن ... اليوم التاني فضل جابك لي ... امك جابتك لي علاء ابوك ... لكن ..سكتت ...عمـران : ابا يمسكني صح ؟هزت راسها بمعنى اي ...قعد ف كرسيه تاني : طيب ... طيب انا ... انا شرعي ولا ؟_ لا يا ولدي شرعي شرعي ... اوعك تقول شي تاني ._ طيب لو انا شرعي وجيت من زواج صحيح ... لي امي وابوي اتخلو عني بكل البساطة دي ؟حل الصمت على المكان ...وقف على حيلو تاني وعاين لي عبدو : مفتاح عربيتك وين ؟_ ماشي وين ؟_ قلت ليك المفتاح وين م ترد على سؤالي بسؤال ._ ج .. جوه ف الاوضة .دخل بي سرعة الاوضة وشال المفتاح وطلع .حُسنة : ماشي وين يا عمران ؟م رد عليها ...عاينت لي عبدالرحمن المخلوع اكتر منها : اجري .. اجري حصلو م تخليه براه .عبد الرحمن لحقو ...كورك : عـمـران ماشي وين ياخ .. استنى .عمران ف اللحظة دي قفل باب العربية واتحرك بسرعة ... بطريقة قومت التراب ف الشارع .عبد الرحمن ختا يدينو ف راسو وقعد ف المسطبة القدام باب البيت .مرت ساعات طويلة ... طويلة شديد ...لحدي م عمران جا راجع تاني ... وقف العربية قدام باب البيت ... اتفاجأ بي عبد الرحمن قاعد ف المسطبة ... اول م شافو وقف على حيلو : عمران ؟عاين ليه : بس م تقول لي قاعد من قبيل هنا ؟قال ليه بانفعال وبصوت باكي : انت مشيت وين ؟ مشيت وين ؟ ... انا افتكرتك م حتجي راجع تاني ... وحتى تلفونك خليتو ف البيت_ ممكن لو سمحت م تكورك ؟_ عمران ... انا من قمت على الدنيا دي قمت يتيم ... م عندي لا ابو ولا عندي ضهر ... انت كنت ابوي قبل م تكون اخوي ... لقيتك دايماً وراي .متذكر كويس انك كنت بتجوع نفسك عشان انا اكل ... وانك بتنوم خايف عشان تخليني انا مطمئن ... متذكر الساعات الطويلة البتضيفها لي شغلك عشان تحيب لي شي انا طلبتو منك .بي سببك انت بعد الله انا لا جعت لا حسيت بنقص ف يوم ... انا م عندي غيرك ... ولا عايز اخسرك ... ولا حتى مقتنع بكلام امي القالتو دا ... انت اخوي .. والكلام السمعتو دا اعتبرت اني م سمعتو ... انا ذكرياتي كلها معاك انت من طفولتي لحدي شبابي ... كنت المرشد والموجه لي ... الصاحب والابو والاخو ... لو عايز اشتري شراب بجي بوريك قبل م اشتريه بعد دا كلو عايز تخلينا ؟انا ... انا ممكن اموت لو انت بعدت عننا او حصل ليك شي . ( ناخد حسنات واحنا بنقرا ؟ سبحان الله ..الحمدلله..الله اكبر ♥️)ختا يدو ف كتفو : انت يا حيوان كنت فاكر اني حتخلى عنك ؟دموعو نزلت : طيب مشيت لي ؟ مشيت وخليتني لي ؟احاط وشو بيدينو وبي اصابعو مسح ليه دموعو : كان ف شي لازم اعملو ... وانا كنت ولا زلت ابوك واخوك وصاحبك ... ومستحيل اتخلى عنك ف يوم ... الا بس اذا روحي مرقت ... بطل عوارك واسمح دموعك دي .قال جملتو الاخيرة وهو بيضمو ناحيتو بحنان ...
