-عايزه اخرج
=........
-خالد انا بكلمك علي فكره
=خير يا ورد النكد جاي عالصبح ليه
- نكد!!! انا نكد
=قطع لساني قبل ما اقول علي حياتي كدا
-ايوه ايوه ثبتني بالكلمتين بتوع كل مره
=طب يا روح امك ايه المطلوب دلوقتي
-يا روح اي!؟
=يااا رووحي
- عايزه اخرج
=مانتي خرجتي امبارح
-انت بتسمي دي خروجه دا كان ناقص يخرجو البواب يغير جو معانا
=اومال انتي عايزه اي
-عايزه اخرج مع قره عينيي لوحدنا
= ماشي ربنا يسهل كدا واخلص اللي ورايا بدري وهخرجك
-علي فكره
=هاا
-الاهتمام مبيطلبش
=وبعدين!
-ولو اطلب مبينفعش
=لا انتي عظمه بجد انتي كنتي مخبيه الموهبه دي فين
-متهزرش معايا انا كرامتي متسمحليش اكلم واحد مش عايز يخرجني
=ماشي مش ههزر ممكن تسبيني اكمل شغل بقا
-بسبسبس
= بتبسبسي لمين في البلكونه يا ورد
-لعم عبده
=وعايزه اي من عم عبده
-هيجبلي شبسي
=بتبسبسي للراجل الكبير دا عشان يجبلك شبسي
- منا لو عندي زوج عدل مش هبسبس لحد
=لازمته ايه الكلام الكبير دا دلوقتي
-خالد
=يا عيونه
-عايزه اخرج
= وانا عايز اتغدي
-مفيش اكل غير لما تقولي هنخرج ولا لا
= مقولنا حااضر حااااضر
-انت بتزعقلي!!! طب مفيش اكل وهنخرج نتعشي برا وهتنزل تجبلي كرتونه شيبسي وهتوديني الملاهي
=مين دا اللي زعق قطع لساانو
-لا لا بعد الشر ياعم انت عايز الناس تقول عليا اللي جوزها لسانه مقطوع اهي
= هي حصلت طب مفيش خروج يا ورد
-ياعم متحبكهاش كدا دا انا هبقا متواضعه معاك ومش كل شويه هطلعلك لساني واغيظك وكدا لا متقلقش
=........
-خاالد
=.......
-جرا ايه يا قره عيني انت زعلت دا انا بهزر معاك
= طب بتعيطي ليه دلوقتي
-عشان حطيت صينيه الفراخ بالبطاطس اللي انت بتحبها في الفرن ونسيت...
=نهارك اسود نسيتي ايه اوعي تقوليلي انها اتحرقت
-لا نسيت اولع عليها
= طب قومي من وشي عشان مكسركيش في حضني دلوقتي وتقضي اليوم في المستشفي بدل الملاهي
- ايه الناس اللي مبتقدرش النعمه دي دا انا نسمه
=بتقولي حاجه يا ورد
-بقول هنخرج امتي
= دلوقتي
-طب والاكل
=هناكل برا
-والشبسي
=هجبلك كرتونه شبسي
-و..
=كلمه كمان هكون حالف يمين تلاته محنا خارجين
-انا جهزت
= اي الهباب دا
-في اي
=شكلك حلو كدا ليه كدا الناس هتمشي تحسدني عليكي
-يالا بس وانا هبقا اقرأ المصحف كلو وانا خارجه
=استني بس
-ايه تاني
=طب والاكل
-هناكل برا
=والشبسي
-مش هيطير
=و ..
-يمين بالله ادخل اغير هدومي واقلبهالك نكد طول اليوم
=ليه وعلي ايه الطيب احسن...جاهزه يا حجه
-جاهزه يابنيي
………………………
"ستبقـي خالداً بقلـبي مهمــا دار الدهـر بنـا❤️💫"
#رغـده_حسـن"ورد" 🖤🌸
أنت تقرأ
أســكريبتات🖤
Lãng mạnكـل يـوم أسكريــبت مختـلف بقصـة مختلفـة بأحداث مأخوذة من الواقــع🖤✨ بقلـــم :- رغـــــدة حســــن 🖤
