في قريه صغيره من قري الجزيره تزوج محمد من هدي بعد شد وجذب بينو وبين اهلو بسبب اهل هدي الوضعم تعبان جدا مقارنه بي وضع اهل محمد الممتاز شديد محمد اصر علي رايو واتزوج مني وربنا رزقو منها بي تلاته بنات هند وشهد ومزدلفه اتوالت الصدمات علي الاسره الصغيره محمد خسر شغلو وحتي اهلو ضغطو عليهو واي حد يمشي عشان يشتغل معاهو هم كانو بصلو قبلو وبمنعو الشخص يشغلو ودا كلو ضغط منهم عشان يطلق هدي ويرجع البيت ويرجع شغلو حتي اصحابو تركوهو وماوقفو معاهو كترت الصدمت ادت لي انو محمد يصاب بالسكري وشويه شويه معا تقدم العمر بقي راقد في البيت
بناتو الكبيره كانت بتقري في جامعه في الخرطوم وقربت تخلص والتانيه في تالت ثانوي وعلي اعتاب الجامعه والتالته ممتحنه تامنه
محمد حاول بقدر الامكان انو يبعد بناتو من الحاصل لكن هم كانو عارفين ومتابعين كل حاجه ودا اثر فيهم بالذات هند وكانت بتتوجع شديد من تصرفات اهل ابوها ورغم دا كانت بتشتغل معا قرايتا عشان توفر مصاريفا وتوفر حاجه بسيطه ترسلا لي امها تساعدا في مصاريف البيت
شهد كانت مابتشتغل بالموضوع كتير هي زوله مرحه وبتحب الحياه شديد
مزدلفه كانت دلوعه امها وابوها وخيلانا وبتحب دايما تكون معا امها تساعده في كل حاجه
مرت الايام صعبه وعصيبه علي الاسره الصغيره وكانت منتظراهم حاجه اصعب
