شالو هند سريع المستشفي واول مافاقت طلبت من يوسف يتصل بي اخر رقم اتصل عليها
يوسف اتصل علي الرقم وعرف من الحاصل واتصل علي اخوهو هند اصرت الا تمشي معا يوسف في الاول رفض شديد بس هي اصرت الا تمشي اتلاقو ومشو لقو انهم اتقبضو مجموعه وكانو قاعدين في شقه ابو واحد من شله امجد
علاقات ابو امجد وباقي الشباب نهت الموضوع وكل الشباب افرج عنهم
يوسف واخوهو ساقو شهد وهند وشهد وهند يبكو كل الطريق هند اصلا مااتلكمت معا شهد
بعد وصلوهم يوسف وقف معا هند وقال ليها
:اتكلمي معاها براحه اكيد هي ماعندها يد في الحصل هي طيبه شديد ومسكينه والشباب غشوها
سكتت هند وماقدرت تتكلم اتحست انها مكسوره شديد حتي ماقدرت ترفع عينه في عين يوسف
:هند انا زوجك وشهد اختي زيما هي اختك وانا مسئول منكم كلكم واي حاجه تحصل انا حتلقوني قدامكم اي زول بغلط في الدنيا دي بس الزول مايكرر غلطو انتي اسي اهدي وماتشغلي بالك الموضوع انتهي مافي حاجه
:مشكووور يايوسف والله ماقصرت خالص كل يوم بتثبت انك راجل حقيقه اي واحد في محلك بعد الحصل اليوم.كان ابسط حاجه نهي كل شي اذا ماسمعنا انا واختي كلام فارغ وحالقي ليك العزر والله انا ماقادره اعاين ليك في وشك خجلانه منك والله
:عيب تقولي كدا ياهند حرام عليك ماانا البعمل كدا انتو بقيتو اهلي ومافي زول بخلي اهلو في محنه ابدا اي كانت (راجل والله يايوسف قليل الزيك )
هند خشت هي وشهد جوه الغرفه الهام من شافتم
:مالكم يابنات في شنو وماله عيونكم ملانه دموع في شنو
مافيهم واحده ردت ليها هند بعد مسافه قالت لي شهد
:تعالي معاي عايزاك
طلعو بره هند قالت لي شهد
:ابدا مااتخيلت انك تكوني كدا ابدا القصر معاك منو الناقصك شنو هل انتي جاهله لي درجه يغشو عليك انتي اليوم وطيتي راسنا الكان مرفوع من جينا الدنيا دي ومافي زول قدر يعمل كدا وجيتي انتي يااستاذه بكل بساطه دمرتي كل شي انا قريت قدامك وعشتا اوضاع اصعب من صعبه عانيت ولقيت مغريات كتيره ومضايقات اكتر لكن كنتا عامله حساب اي خطوه انا بخطوها لانها ماحتتحسب علي براي لا حتتحسب علي الابو الضحي بكل شي عشانه وعشان الام الصبرت واتحملت كتيره عشان تشوفنا ناجحين ومحافظين علي نفسنا وسمعتنا وعلي الخال الضحي بي شبابو وعمرو عشان يفرح بي بنات اختو اي حاجه كانت قدامي بالصوره الانا عايزاها وبدون مازول يعرف لكن حاستفيد شنو لما اخسر نفسي واضيع سمعتي
انا كنتا علي طول بمشي وانا رافعه راسي فوق وبقوله وانا واثقه منها انا هند بت محمد الربا بناتو صاح وانتي جيتي وطيتي راسي قدام زوجي الزول الدخل حياتنا قريب وبدل مايعرفنا بالحاجه العجبتو فينا انتي خليتي يعرفك علي اسوا صوره
