My Neighbor :> (Completed)

Chapter 9

NATULOG agad siya pagkatapos maghapunan pero nagising nang maghahatinggabi na. Namulatan niyang nakaupo na naman sa gilid ng kama niya si Divie, niyugyog siya sa isang braso.

“Liza, baba ka muna sandali…”

“Bakit?”

“Si Boboy… nagwawala sa labas. Lasing na lasing at nagbabalak magpakamatay!”

“Ha?” Mulagat na napabangon siya. “Magpa-pakamatay? E bakit?”

“Bigo daw kasi siya sa ‘yo,” napapahagikhik na sabi ni Divie. “Ayaw na raw niyang mabuhay kung bigo din lang sa pag-ibig. Pakipuntahan mo nga sa swing… doon pa yata gustong magbigti!”

Magkasunod silang bumaba at nagkubli muna sa pintuan ng apartment. Nakita ni Liza na mula sa isang kahoy na pakuan ng bubong ng swing, isang dilaw na nylon cord ang nakalawit. Nakalupasay si Boboy sa sahig, patay-lasing. Hinihila ni Rado ang isang kamay nito.

“Halika na, ‘oy,” nagtatawang sabi ni Rado. “Doon ka na lang magbigti sa atin, Boboy. Huwag dito sa swing. Ang baba ng bubong nito, o. At magagalit si Ate Divie mo pag nasira to.”

“Naaapakasakittt, Kuya Rado…” panangis ni Boboy. “Hindi ko khaya to… hindee, hindee, oh no! My God, ngayon lang ako natutuhong huumibeggg… magma’al nang tapahaat! At bigumbigo hakkoooo…! Naphhakasakit naman… arayyy!”

“Gago! Ang OA mo talaga! Naffakasakit daw…! Pwe!”

“E sa nafakashakit mo namang humawak, e! Arayyy… b-b-bitiwan mo’ng kamay ko, Kuya!”

Binitiwan ito ni Rado. Nagkahagikhikan sina Liza at Divie sa may pinto.

“Doon na tayo sa bahay,” nagtatawang sabi uli ni Rado. “Mas kumbinyenteng doon ka magpakamatay. Dito, ang sikip-sikip.”

“Hayokoo… ghusto ko munang makita si Liza…!”

Lumabas si Liza. Lumapit siya sa swing. “Anong problema, Boboy?”

Parang nagulat pa ito at kaagad nagtangkang tumayo sa swing. Gumiwang ang swing at muntik na itong tumihaya. Nauntog ito sa isang haligi.

“Arekuph…!” sabi nitong sinapo ng palad ang nauntog na noo. Paupong bumagsak ito sa isang upuan. “My God… bakit bigla yatang lumuhod ang mga tala sa aking harapan?”

Nagtatawang sumakay si Liza sa swing at naupo sa tabi nito. “Hoy,” aniyang humawak sa isang braso ng binata. “Ano bang kadramahan mo to, Boboy?”

“‘Ala,” sabi nitong sumulyap sa kanya at tumungo. Para itong nahimasmasan agad sa tabi niya. “G-gusto lang naman kitang makita at makausap ngayong gabi, e. Gising pa naman sina Kuya Rado at Ate Divie… p-pero ayaw ka nilang tawagin.”

“E kasi nga’y tulog na siya,” ani Divie. “Boboy, what’s happening to you? Para ka talagang sira d’yan!”

Tumungo ito at umiling.

Napabuntunghininga si Liza. Ganito rin ka-immature ang ex-BF niyang si Marvin. Masyadong emotional. Ganito ang tipo ng lalaking minahal niya noon at naging dahilan kaya ayaw na niyang umibig uli.

“Liza, pagpasensiyahan mo na ang pinsan ko,” ani Rado. “Talaga lang sigurong masama ang tama n’yan sa ‘yo. Bata pa kasi at maagang naulila sa ama.”

Tumango siya. “Okey lang, Rad. Sige na… mag-uusap kami sandali.”

Magkaakbay pang pumasok na sa apartment sina Rado at Divie.

NAKATUKOD ang mga siko sa tuhod, nakatakip sa mga tainga ang dalawang palad, bumuntung-hininga si Boboy ilang minuto matapos silang magkasarilinan sa swing.