اسكريبتات و خواطر بقلمي/نورهان صبري

أعْشَقُكَ و لَكِن مَا باليَدِ حيلَةٌ

خالد : يعني إيه ما بتحبينيش؟!

رؤى بجمود : أيوا مش بحبك، افهم بقا، أنا كنت مجبرة مش أكتر، روح بقا شوف حياتك بعيد عني.

خالد بصراخ : ليه؟ لييه؟ دا أنا حبيتك، حرام عليكي، و بعدين ما كل حاجة كانت حلوة ما بيننا و طبيعية، إزاي فجأة كدا جاية تقوليلي الكلام دا؟ دا احنا كتب كتابنا بكرة!.

رؤى : أنا حرة، و أظن مش محتاجة أبرر تصرفاتي.

- تمم انتى اللى اختارتى يا رؤى انتى اللى اختارتى سلاام
لفيت وشى بسرعة و انا بكتم دموعى عشان مايشوفنيش لازم يبعد لازم.. مشي.. فضلت واقفة مكانى مش مصدقة انو هيبعد عنى.. بصيت للسما و انا بدعى ربنا ان كل داا يبقى وهم.. يا رب
" انا رؤى 21 سنة فى كلية تجارة عايشة مع ماما و بابا و مالك اخويا، متدينة إلى حد ما بشرتى قمحية و عيونى بنى و شعري بنى طويل"
~ الو يا رحمة.. انتى فين انا محتاجالك..
_الو يا رؤى.. مالك يا بنتى بتعيطى لى!!
~ خالد سابنى يا رحمة خالد سابنى انا السبب.. انا السبب فى كل حاجة..
_ اهدى بس كداا و عرفينى انتى فين انا جايالك حالا..
~ انا فى كافيه (...)
_ تمم اهدى بس و ماتعيطيش مسافة السكة و هكون عندك..
قفلت معاهاا و قعدت افتكر ذكرياتنا سوا انا وخالد... و اول مرة شوفته فيهاا..
-يا آنسة.. يا آنسة استنى بس
لفيت وشي بسرعة و انا مستعدة لتهزيق الغبى داا
~ افندم عايز اى انت ما بتفهمش او مابتفهمش ايهما أقرب..يا لهووى دا دكتور خالد انا اسفة يا دكتور و الله ما كنت اقصد
- حيلك حيلك بس كداا انتى وقعتى الكتاب داا و انا جيت اديهولك مش اكتر لكن الواضح أن مفيش ذوق خالص
سكتت و م عارفة ارد انا فعلا انفعلت بس اعمل اى يعنى لو اى حد مكانى كان عمل اكتر من كداا
~ اا انا اسفة فكرتك بتعاكس و شكراا على الكتاب يا دكتور
- لا و لا يهمك بس يا ريت المرة الجاية ماتتسرعيش انا أهلى ربونى انى احترم البنات مش أمشى اعاكس فيهم عن اذنك
مشي و انا كمان مشيت و انا بفكر فى الموقف المحرج داا و روحت البيت..
~ يا أهل المنزل.. يا أهل البيت انتوا فين..
*اى مفيش سلام عليكم و لا اى حاجة..
~ اسفة يا بابا.. احمم احمم السلام عليكم يا أهل المنزل
* و عليكم السلام يا هبلة خدى تعالى عشان عايزك فى موضوع
~ ايتاا ايتاا مادام فيهاا الدخلة دى يبقى اكيد الموضوع ايااه و انا قلتلك قبل كداا انى مش هتجوز الا الشخص اللى بحبه و بس مش جوازة صالونات
* خدى يا بت انتى هناا الناس كلمونى و انا اتحرجت أرفض الصراحة و هم كمان ناس ما يتعايبوش و بعدين انا مش بقولك اتجوزى بكرة.. انا بقولك شوفيه بس و لو رفضتى مش هجبرك على حاجة.. اتفقناا
~ و يعنى لو انا رفضت هيتغير حاجة.. اعملوا اللى انتوا شايفينه مناسب..
* انا مش بجبرك على حاجة ابداا و اعرفى انى عارف مصلحتك اكتر منك خشى يلاا غيري و صلى و تعالى عشان ناكل..
~ ربنا مايحرمنى منك يا حبيبي
دخلت و انا قاعدة بفكر فى نفس الموضوع هم ليه مش فاهمينى انا عايزة واحد يحبنى و كداا و نفهم بعض مش اى حد يتقدم.. يلا ربنا يقدم اللى فيه الخير
غيرت و صليت و طلعت عشان اكل..
~ عاملة اى يا مامتى
¬الحمد لله يا حبيبتى تعالى يلاا عشان تاكلى و تجهزى قبل ما الناس ييجوا
~ اشطاا.. عامل اى يا وااد يا مالك فى المذاكرة
°حاجة استغفر الله العظيم يا رب مش عارف هخلص ايمته من الثانوية العامة دى.
~ معلش يا حبيبي استحمل شوية هانت اهى و تجيب مجموع حلو و تدخل الهندسة اللى نفسك فيهاا
قعدنا نهزر سواا و كلت و بعدين دخلت اجهز عشان عريس الغفلة..
جت الساعة 7 بالليل لقيت ماما داخلة علياا الاوضة
¬يلاا يا حبيبتى الناس براا و مستنيينك ما شاء الله قمر يا روحى
كنت لابسة فستان بيبي بلو و طرحة اوفوايت من غير ميكب عشان ما بحبوش لازم اللى هيتجوزنى يشوفنى بطبيعتى و بس
~ بقولك اى يا ماما اقعدوا انتوا معاهم و قوليله نامت ماتت اى حاجة انا مكسوفة اووى بصراحه
¬ يلاا يا هبلة قدامى احسن ما اناديلك ابوكى انتى حرة..
~ لا خلاص و على اى
خرجت و انا عينى فى الأرض كان جاى هو وصاحبه تقريبا قعدت جمب بابا و انا بفرك فى ايدى و م عارفة اتصرف مافوقتش غير على صوت بابا و هو بيقول نسيبهم مع بعضهم شوية.. يا لهوووى اى العيلة دى دى مش جدعنة خالص..
- هتفضلى باصة فى الأرض كتيير..
يا لهووى طب ارد ازااى انا بس حاسة انى عارفة الصوت داا.. معقولة يكوون..
بضحك - ايواا هوو بصى بقاا
رفعت عينى بسرعة و اتصدمت ~ انتت بص لو جاى تشتكى لبابا فأنا اسفة و الله ماكانش قصدى ازعقلك و أفرج عليك الجامعة ابداا يا دكتور..
- انتى هبلة يا بت انتى هو مش المفروض انك قاعدة مع العريس اللى جاى يتقدم و كداا انا اصلا مش فاكر اللى حصل انهاردة
ببلاهة ~ ايتاا هو فين العريس.. سيبك بس المهم انت بجد مش فاكر انى هزقتك انهاردة و لا كداا
- اولا لا مش فاكر.. ثانياا انا العريس..
بغباء مضحك ~ عريس مين
- عريسك يا آخرة صبري و تقريبا كداا انتى موافقة فهنعمل خطوبة و كتب كتاب على طول الشهر الجاى.. يا عمى
* اى يا ولاد اتفقتوا على اى
- انا بقول الخطوبة و كتب الكتاب الشهر الجاى و نبقى نتفق على الفرح بعدين
* و الله يا بنى الرأى رأى العروسة هاا اى رايك يا رؤى
ببلاهة ~ هااا هو اى اللى حصل بس لامؤخذة عشان نفهم هو مين داا
بضحك - امم لا دا فى قعدة تانية بقاا اولا يا ستى انا دكتور خالد 29 سنة و اظن انك عارفانى سابقاا و ثانياا انا جيت اتقدملك انهاردة عشان اكمل نص دينى و كداا هاا قولتى اى
~ امم بص هفكر و اقولك رأيي اصل انا هنجت الصراحة
* خلاص يا بنى هنعرفك راينا بكرة ان شاء الله
- تمم و انا ماعنديش مشكلة عن اذنكواا
مشى و انا دخلت الاوضة بسرعة قبل ماحد يسألنى عن حاجة..
صليت استخارة و مانكرش انى كنت مرتاحة جداا هو اصلا شخص ما يترفضش بشعره الأسود و بشرته القمحى و عيونة السودا دى ...دا كامل الأوصاف فعلا و تقريبا يعنى و الله اعلم يمكن يكون بيحبنى و عشان كداا اتقدملى.. بس برضو انا مش عايزة اتجوز كداا.. بس مش يمكن نحب بعض بعد كداا.. مش عارفة
نمت من كتر التفكير و صحيت الصبح بابا سالنى و قولتله انى موافقة و خلاص و اكيد لو فيه خير ربنا هيقدمه و لو شر لياا كان زمانى مش مرتاحاله على الاقل.. بابا بلغه موافقتى و كان مبسوط جداا و عداا شهر فعلا انا وخالد اتقربنا فيه جامد و اكتشفت فعلا انه خير و كنت مبسوطة اووى بعلاقتنا و هو كان بيجيبلى هدايا كتير و بيجى يقعد معايا و نتكلم فى كل حاجة تقريبا بس كان بيقلل من المكالمات الا عند الضرورة و بس عشان يحافظ علياا و جه اليوم اللى قبل كتب الكتاب غير كل حاجة فجأة..
كنت خارجة من الجامعة زي كل يوم بعد ما قعدت مع رحمة شوية و لقيت خالد باعتلى مسج فيهاا العد التنازلي بتاع كل يوم ان فاضل يوم واحد على كتب كتابنا و انا كالعادة ببتسم بس من غير ما ارد عليه.. مشيت شوية و اتفاجأت بواحدة قدامى شكلها يقول انهاا فى الخمسينات كداا و شيك في نفسها اووى
= انتى رؤى صح
~ ايواا مين حضرتك و تعرفينى منين
= انا معرفكيش شخصياا بس انا ابقى ام خالد اللى المفروض تكتبوا الكتاب بكره من غير ماياخد موافقة اهله و قالكوا ان اهله عايشين برا البلد بس الحقيقة ان باباه رفض انه يتجوز من بنت اقل من مستوانا و هدده انه هيحرمه من ميراثه و هيطرده و خالد عند معاه و مشي من البيت ارجوكى ابعدى عنه و خليه يرجعلى خليه يرجع لحياته و بيته و باباه انا جيتلك انتى عشان عارفة انه مستحيل يسمع الكلام ويبعد عنك لانه بيحبك جداا من اول يوم شافك فيه و كان دايما بيجى يحكيلي عنك و عن جمالك كان دايما يرسم صورك و يفضل يكلمها طول الليل.. كان خايف يجى يكلمك لترفضيه بس فى الاخر قرر انه يتقدملك و لما عرف باباه حصل اللى حصل ارجوكى انا ام و مستحيل اقدر اعيش بعيد عن ابنى.. حاولى انتى تبعدى عنه..
كنت ساكته م قادرة اتكلم او ارد عليهاا انا بحبه لكن فى نفس الوقت م هبنى حياتى معاه و ابعده عن أهله انا اللى لازم ابعد
~ متقلقيش ابنك هيرجعلك
سيبتها و مشيت من غير ما ارد فضلت ماشيه كتير و انا ببكى و م قادرة أصدق انى هبعد عنه يا رب ليه كداا رنيت عليه عشان انهى اللى بينا.. كنت انا الوحشه فى نظره و نظر الكل انا اللى اتخليت عنه..
فقت على رحمة اللى وصلت الكافيه و قعدت قصادى
_ احكيلي بقاا اى اللى حصل و اى اللى انتى بتقوليه داا و بتعيطى ليه كداا
~ اقولك اى بس اقولك اى
و حكيت ليهاا كل حاجة حصلت و انا منهارة من العياط
_ معقوله اى حد يقولك سيبى خطيبك اللى هتتجوزيه بكرة تعملى كداا انتى اتجننتى يا بنتى
~ ماقدرش اعيش معاه و انا عارفه ان اهلو بعيد عنه بسببي مقدرش انتى ماشوفتيش مامته و هى بتترجانى
بس مقدرش اعيش من غيره انا بحبه يا رحمه بحبه اووى
_ طب ما تقولي له اللى حصل
~ لا مستحيل انا وعدتها انى هرجعلها ابنهاا لو قلتله هيرجعلى و كداا هيبعد عن أهله
_ خلاص يا حبيبتى اهدى بس دلوقت و قومى يلاا نروح و نبقى نشوف هنعمل اى بكرة.. بس هتعملى اى مع اهلك!!
~ م عارفة م عارفة حاجة انا مفكرتش غير فى الوعد اللى وعدته لمامته و بس..
_ و الله ما عارفة اقولك اى كان مستخبي فين كل داا يا ربى
روحت البيت و دخلت اوضتى بسرعة من غير ما ارد على بابا اللى بيستفسر عن اللى حصل و مكالمة خالد له اللى بيقوله فيهاا اننا انفصلنا و كل حاجة قسمة و نصيب.. قعدت اعيط كتيير و ماكنتش قادرة اتنفس.. انا كده لماا بزعل ماقدرش اتنفس و لا اتكلم اتخنقت جامد و كنت بجاهد الغيمة السودا اللى كانت قدامى و بعدين بدأت استسلم.. انا اصلا مش هقدر اعيش من غيره...
مافوقتش غير وأنا فى المستشفى و لقيت بابا و ماما و مالك و رحمة جمبي بدأت استوعب شوية و هم بيطمنوا علياا.. كان نفسي اووى يكون جمبي كان نفسي نفضل سواا بس اناا اللى اتخليت عنه لازم استحمل بقاا..
بس اتفاجأت بيه داخل الاوضه و هو بيعيط و جيه جمبي و مسك ايدى
- معقوله عايزة تسيبينى بعد ما حبيتك عايزة تسيبينى..
حاولت امثل او أبين انى مش مهتمة بس اتفاجأت بيه
-اى بتفكري فى كدبة تانيه تقوليها عشان تنفذى وعدك و الا اى
بصيتله بصدمة..
- عايزة تعرفى انا عرفت ازااى هقولك..
Flash back..
رحمة بعد ما رؤى مشيت ماقدرت تستحمل اللى صاحبتها فيه و قررت تعرف خالد و فعلا رنت عليه
_الو دكتور خالد معايا
- ايواا انا مين معايا
_ انا رحمة صاحبة رؤى
- لو سمحتى مش عايز اسمع اسمها تانى دى واحدة استغلت مشاعري و حبي ليهاا و اتخلت عنى.. انا بقولك ليه اصلا ما تلاقيكواا متفقين سواا
_ لو سمحت ماتظلمهاش رؤى كانت مجبرة تبعد عنك انا لازم اقابلك ضرورى عشان تعرف الحقيقة
- و اى اللى ياكدلى انك بتقولى الحقيقة مش يمكن دى خطة جديدة عاملينها سواا
_ اللى ياكدلك ان انا عارفة ان باباك ماكانش موافق على الجوازة دى و حرمك من الميراث عشان صممت على اللى انت عايزه
- انتى عرفتى منين
_ هتعرف كل حاجة لما اقابلك
- تمم اجيلك فين!
_ انا موجودة فى كافيه (...) مستنياك
~تمم
وفعلا خالد راح عشان يقابل رحمة و رحمه حكتله كل حاجة حصلت
Back..
- انتى ازااى متخيلة انى اقدر اعيش من غيرك معقولة تعملى فياا كداا.. رؤى انا بحبك..
~ وانا كمان بحبك بس ماقدرش اعيش معاك و انا عارفة ان اهلك مش موافقين مقدرش اعيش معاك و انت بعيد عنهم ارجوك افهمنى
- و انا اوعدك انى مش هتجوزك قبل ما اقنعهم بس انتى خليكى جمبي
~ انا جمبك على طول..
خرجت من المستشفى و روحنا البيت و بابا قالى ان خالد طلب انى اروح معاه عند أهله و هو وافق..
تانى يوم لبست و نزلت لخالد اللى كان مستنينى تحت.. ركبت العربية و انا متوترة و مش عارفة هعمل اى و خالد قعد يطمنى و يهدى من توترى.. و فجأة لقيته بيقولى وصلناا.. بصيت لقيت بيت كبير اقل ما يقال عنه انه رائع و لقيت بوابة كبيرة بتتفتح عشان ندخل نزلنا من العربية و انا متوترة جامد دخلنا بعد ما واحدة جت فتحتلنا الباب.. دا م بيت داا داا فعلا جميل اووى كل حاجة فيه حلوة.. لقيت مامته نازله على السلم و جايه عندنا بسرعة و خدت خالد فى حضنهاا و قاعدة تعيط و تلومه انه بعد عنهاا و انا واقفة مكانى متوترة و دموعى فى عيونى..
= هان عليك يا بنى كل داا تبعد عنى انا مقدرش اعيش من غيرك..
- غصب عنى يا امى بابا هو اللى اختار و انا نفذت و بس
# و هفضل عند قرارى لحد ما تعقل و ترجع لحياتك..
ببص لقيت واحد وشه مكشر نازل اكيد داا باباه يا ربى انا خايفة اووى
- و انا قلت لحضرتك انى بحب رؤى و هتجوزها و داا اخر قرار عندى
# يا بنى انت مش شايف مستواهم و لا شايفها عاملة ازااى معقوله دول هيليقواا بمستوانا
لسه خالد هيرد عليه انا اتخنقت الصراحه و شاورتله عشان يسكت..
اتقدمت خطوه نحيت باباه و وقفت قدامه و انا بحارب عشان دموعى ماتنزلش
~ اولا حضرتك انا لما حبيت خالد و وافقت اتجوزه حبيته عشان هو خالد مش عشان هو ابن حضرتك.. انا و لا كنت اعرف حضرتك و لا كنت اعرف عن خالد غير انه دكتور خالد الدكتور بتاعى فى الجامعة مش اكتر.. و لما جه يتقدملى قال ان اهله مسافرين براا و انهم موافقين على الجوازة عشان كداا انا و أهلى وافقنا عليه و ثانياا انا مستحيل اسمح لحضرتك انك تهيننى او تهين أهلى باى شكل من الأشكال و احب اقولك ان انا اللى ما يشرفنيش انى اكون جزء من عيلة حضرتك..
بصيت لخالد و خلعت الخاتم اللى بيربطناا.. كان بيبصلى بعتاب و اسف
~ اسفه يا خالد كل حاجة قسمة و نصيب اتمنى المرة الجاية تختار واحده تليق بوالد حضرتك
طلعت أجرى و انا منهارة من العياط خرجت من البيت و انا تايهة و قاعدة بجرى و مش عارفة ابطل عيااط و قفت تاكسي و وصلت البيت دخلت اوضتى بسرعة و انا منهارة من العياط.. و بعد فترة من العياط و ماما و بابا قاعدين بيخبطوا على الباب عشان يطمنوا علياا قمت غسلت و شى و بعدين روحت فتحت الباب لقيت ماما جايه تحضنى و بابا واقف بيبصلى بحزن
~ ما تقلقوش علياا انا هكون كويسة كل حاجة قسمة و نصيب ماتقلق.. مقدرتش اكمل الكلمة و اترميت فى حضن بابا و انا منهارة كنت بصرخ و ببكى ما كنتش قادرة اتحمل اكتر من كداا و بابا قعد يطبطب علياا و هو بيبكى
* ابكى يا حبيبتي.. ابكى طلعى اللى جواكى..