اسكريبتات و خواطر بقلمي/نورهان صبري

عشر طاولات فى مطعم.. جميعنا مرضى نفسيين🖤🖇️

#عشر_طاولات_فى_مطعم.. 🖤🖇️
#جميعنا_مرضى_نفسيين.. 🖤🖇️

شخصية من وحى خيالى..(عائشة).. جلست على إحدى كراسى هذا المطعم لتتجول بعينها بين طاولاته..لترى اول طاولة..

عائشة..
:دا بيفسح مراته و بيفرحها.. معقولة لسه فى رجالة كدا..؟!

الطاولة رقم(1)..

_مش هتسيب الموبايل دا بقا و تكلمنى شوية.. ؟!

بلا مبالاة
=حاضر.. استنى بس هخلص الشغل اللى فى ايدى..

_انت مخرجنى فى يوم الاجازة عشان تقولى شغل يا كريم..؟!

=نعم يا سارة.. نعم يا حبيبتى.. ادينى سيبت الموبايل.. هنقول اى بقا.. ؟!

_اى حاجه يا كريم.. حسسنى انى مراتك يا اخى.. امال لو مش متجوزين بقالنا 6 شهور.. كنا هنوصل لإيه..؟!

=بقولك اى يا سارة.. انا مش فاضى لشغل النكد و التأنيب دا.. كلى و اسكتى..

حبست دمعاتها متصنعة الابتسامه..
:تمام.. هاكل و انا ساكته.. كمل شغلك..

استمعت لهم عائشة باستغراب و حزن..
:معقولة اللى بيتصنعوا الابتسامه بيبقى مخفى الحزن دا كله وراها..؟!

ألتفتت إلى طاولة أخرى..

عائشة..
:اهم دول باين عليهم مخطوبين...

الطاولة رقم (2)..

_يعنى مفيش فرصة تانية يا مريم..؟!

=انت ما كبيتش عليا عصير و الا دوست على طرف فستانى.. انت خونتنى.. مش قادرة انسى منظرك و هى فى حضنك اللى المفروض يكون مكانى انا.. حتى لو جيت على كرامتى و كملت معاك.. مستحيل انسى ابدا..

_قولتلك كانت غلطة.. غلطة فى لحظة ضعف بسبب مشاكلنا الكتير اللى مابتخلصش.. و ندمت و الله.. ارجوكى سامحينى.. و ادينى فرصة واحدة بس.. و اوعدك انى هتغير..

=انا ممكن اسامح على اى حاجه.. اى حاجه يا حسن.. الا الخيانة.. لان اللى يخون مرة.. هيخون الف مرة.. و انا مش هأمن على نفسى معاك لو بقيت مراتك فى يوم.. عشان كدا.. دا نهاية الطريق بينا.. و كل شيء قسمة و نصيب.. عن اذنك..

تركته يبكى ندما على ما حدث..

عائشة بحزن و فقدان أمل..
:معقولة مفيش حد فى الدنيا دى سعيد ابدا.. مفيش قصة حب بتكمل على خير..؟!

التفتت بنظرها إلى طاولة أخرى..
عائشة بفرحة..
:وااو.. دا بيمسح دموعها.. و بيحاول يراضيها.. بقى فى أزواج حنينين كدا.. ؟!

الطاولة رقم (3)..

_عشان خاطرى يا سچا ماتعيطيش.. حبنا لبعض يكفى حياتنا كلها..

=كان نفسى ابقى ام اووى يا أحمد.. كان نفسى ابقى ام لابنك..

_انتى بنتى و كل ما ليا.. ربنا ما أرادش اننا نخلف.. خلاص بقا نحمد ربنا على عيلتنا اللى حوالينا.. و على حبنا لبعض..