اسكريبتات و خواطر بقلمي/نورهان صبري

تلاقي أرواح

_تسمحيلي بكلمة ؟
مسحت دموعي بسرعة، وأنا بحاول أبان بخير.
_مين حضرتك؟
ابتسم ابتسامة غريبة كأنه بيقوللي أنا فاهمك، وعارف إنك بتعيطي، وناولني منديل بهدوء، أخدته وسكتت.
طلع قعد على السور جمبي بمسافة مش بعيدة.
_تعرفي إن أخويا الكبير اتوفى من شهرين؟
بصيتله واتجمعت الدموع في عيوني تاني، فكمل.
_كان أكبر من إنه أخويا، كان صاحبي وسري، فضلت دايمًا ضامن وجوده لحد ما صحيت على أسوأ خبر في حياتي؛ مش ممكن أشوفه تاني، ألمسه، أو حتى أكلمه من بعيد، مش هياخدني في حضنه، ويدعمني زي ما طول عمره بيعمل!
_أنا.. أنا مش عارفة أحكي إيه، بس لوهلة حسيت إن ممكن حد يحس باللي جوايا، فراغ كبيير محدش قادر يمليه، كل حاجة اتجمعت عليا لدرجة إني بقيت مبيفرقش معايا، عاد أي حاجة تحصل أقول عادي مش فارقة، و هيحصل إيه أسوأ، دايمًا متأكدة إن ربنا مخبي لينا الخير، وبحمده والله، بس بيصعب عليا نفسي أوي لما ألاقي نفسي مش فارقة، أسوأ حاجة ممكن يمر بيها الإنسان بتكون بسبب التفاصيل، التفاصيل بترهق القلب، والعقل، وللأسف مهما حاولت مش بتقدر تتخطى وقعها عليك.
_عارفة؟ رغم وجود الكل حواليا، إلا إن شخص واحد كان قادر يفهمني بكل ذرة جوايا، كان كافي أنه يغنيني عن العالم، مش بعترض على قضاء ربنا، بس أنا اتدمرت، بيحصل لي حاجات كتير مش قادر أحكيها، أو أتكلم عنها، ويا ريت كل حاجة بتتحل بالعياط، والندم!
_في أسوأ فترة ممكن تمر في حياتي كنت مستنية شخص معين ألاقيه جمبي، كنت ضامنة وجوده؛ لأنه.. لأنه وعدني،وعدني إنه هيكون جمبي مهما حصل، رغم لإني كنت متأكدة إن كلنا فترات في حياة بعض، و هييجي وقت وكل واحد يعيش حياته، بس ليه يعشمني في وجوده، وهو مش هيوفي بوعده.
_ممكن مش بقصدهم، بس بيجرحونا، ممكن يشوفوا الموضوع تافه، بس هو أكبر من إنه يتوصف بكلمات!
_تعرف لما عاتبت، كان الجواب مرضي إلى حدٍ ما، بس فين الفعل؟ أنا مش شايفاك حاولت إنك تحافظ على وجودي في حياتك، زي مانا كنت دايمًا بعافر. أنا الوحيدة اللي كنت بعافر بكل قوتي في كل علاقات حياتي، مش قادرة أشوف اللي بيحبوني؛ لأني مستنية الحب من ناس مش محتاجين وجودي أصلًا، ويا ريت بتعلم.
_احنا فعلًا عايشين عشان نتعلم، لكن اللي بيقهرك أكتر إنك كل مرة بتغلط نفس الغلطات، وأكبرها أنك بتتعشم بزيادة، طب.. هو الناس اللي عندهم ناس في حياتهم بيبادلوهم المشاعر والأفعال دول، يا ترى حظ وإلا شطارة؟
_لو حظ فممكن في يوم الجرة تيجي عليك، وتلاقي حد يفهمك، ويملي حياتك، لكن لو شطارة، أنا مش هقدر أعمل حاجة؛ لأن كل طاقة عندي اُستنزِفَت لدرجة إن معدتش فارقة.. ممكن في يوم من الأيام حد ييجي بدون ميعاد، ويكون فعلًا عوض من ربنا ليا.
_ممكن.. كل حاجة ممكن تحصل.

_سرحتي في إيه؟
ابتسمت بحنين لذكرى مر عليها على قد ما مر.
_أول مرة شوفتك فيها، وأول مرة ألاقي حد يفهمني.
_كانت ألطف صدفة في حياتي، وكنت هندم عمري كله، لو مشيت بدون ما أحكيلك.
_كنا هنتقابل بطريقة تانية؛ لأن القلوب بتتلاقى ببساطة، تقدر تقول مجرد أرواح، أرواح بتتلاقى.

" روحي إلى روحك سارت ألف طريق، لم تمل، لم تكل؛ لأنها وجدت ذاتها بك؛ فهو مجرد تلاقي أرواح"

_نورهان صبري.