عابر سبيل [ⵄⴰⴱⵉⵔ ⵙⴰⴱⵉⵍ]

Chapter 2

لالة ماما (هزات فيها راسها قافزة ما عرفاتها منين خرجات وبقات كتشوف فيها حتى قربات عندها مسارعة خطواتها)

سارة جودي (بملامح مايلين للفقصة رغم برودها): تُزگا ألالة ماما؟

لالة ماما (ببراءة رغم أنها عارفة شدارت): ايـه

سارة جودي (بنوع من الاستسلام المخلط بالعتب ومع كوثر واقفة عند الباب حشمات تهضر بالشلحة): ياك گلنا البراوات كافين وماباقبيش نستعملو من غيرهم..

لالة ماما (دارت قدامها دايرة يد على يد فحالا مقلقة زعما): وا راه ماكنعرفو دوايات من نهار عقلنا على راسنا وواليدينا كيداويو سم العگرب غير بتُوگا..

سارة جودي (كتحاول تحاورها بالتي هي أحسن ماباغاش تجرحها بالهضرة وتصدق كاعيا عليها فنفس الوقت خافت يطراو ليه مضاعفات حيت البنية الجسمية دناس المدينة ماشي فحال بنيتهم): ولكن ماشي كلشي كتوافقـو..

مزال ماكملاتهاش تگعد بلهلا يطريه ليه بالجهد وخا داتو كتعگروو وتحدر للگدام بلا هواه كيرد أي حاجة بقات فجوفوو من الماكلة، ماوقفاتش على هكاك حيت الهدف الطبيعي من العشبة هو يرجع ويخرج گاع لي فداتو باش تتصفى ولكن تمادى الأمر لأنو يخاطبها دغيا مستنجد بيها كحل أخير قدامو قبل ما يصدق فشي شوهة كثر من هادي لي راكباه من ساسوو لراسو..

تاشفين (حشم من لالة ماما هضر معاها بلغة خرى باش ماتفهمهمش وخا ماعارفهاش واش سارة براسها غتفهموو ولا لا):

I need to go to toilet.. (محتاج نمشي للطواليط)

سارة جودي (شافت فلالة ماما لي غير كدور فعينيها وشارت ليه بيديها زعما ها علاش كندوي بلا ما تشرح.. مالقات مزال مادير من غير أنها تقرب باش تعاونوو وهي كتعيط للقايد قبل ماتفكر بلي ماكاينش.. هزات عليه الملاية دغيا جاب الله هي لي كالات على حوايجو فاش رد وماعمروش.. حيداتها فمرة لاحتها فالأرض وهزات راسها فكوثر): شوفي واش كاين شي حد فالدراري برى..

خرجات دغيا خلاتها معافرة معاه كتعاونو يوقف على الرجل الصحيحة.. بزز حتى ناض حاط يدوو عليها مجبر وهو حادر راسوو من الألم ومزير الدعوة لا تخونوو.. يديع صيتو فالقبيلة ويولي آل خريان بلاصة آل قمعان.. وهو مزال محارب راسوو رجعات زطيونح..

سارة جودي (هزات راسها جيهتها مني سمعات صدى خطاها وفنفس الوقت ماواقفاش بلاصتها مخلياه شاد فدراعها باش يكالي بيها ويتمشاو وخا ماكتحملش شي حد يقيسها)

كوثر (حركات راسها بالنفي): ما كاين حد..

سارة جودي (تمشكلات وتبرزطات وبزز منها صدقات مقربة ليه كثر حتى قدر يحط دراعو على كتفها وتدور يدها ورا ظهروو باش تقضي حاجة)

لالة ماما (هضرات بتردد): غيكونو فالجنان..

كوثر: بلاتي نمشي نشوف..