عابر سبيل [ⵄⴰⴱⵉⵔ ⵙⴰⴱⵉⵍ]

Chapter 13

غـالي (مابغاش يدخل معاها فالشد والرد): شوفي أ كلثوم أنـا مغريبي وبغيت ولا كرهت من عائلة محافظة وخا نبانوليك بهاد الانفتاح، ولي وقع اليوم كان قلة احترام مني أنا للوليدة ديالي ولو أنو بطريقة غير مباشرة.. بيني وبينك ماعنديش مشكيل لي درتيها ندوزها وعادي.. ولكن الوليدين لا.. ماتتسنايش مني نتقبل منك شي حاجة فحال هكدا..

كلثوم (ماعجباتهاش هضرتو): حتى دابا ماوقع والو.. وخا ماقصدتش داكشي لي فهمتي سمح ليا أ سيدي ورتاح حتى حد ماباقي غادي يقلل عليكم الاحترام..

ومع أخر كلمة قطعات عليه وخلاتو غير كيشووف.. ظالمة وقوية.. ماكفاهاش الاحراج لي تسببات ليه فيه مع مو ومرت خوه هو لي نهار عقل على راسو كيحاول ما فجهدو يخلي راسو بعيد على فحال هاد المواقف البايخة لا مع دارهم لا مع الناس لي كيعرف.. ماكلفش راسو يعاود يعيط.. خلى الموضووع هكاك وناض هز ليه كتاب ودخل بلاصتو..

ڭالسة فووق الناموسية بلاصتها، مخدة متكية عليها واخرى حاطاها على رجليها وكتسمع للاوديو دأوراينا بشبه ابتسامة..

أوراينا : " زعما تكون بيناتهم شي حاجة ؟ حتى أنا شكيت مانكذبش عليك ولكن لعنت الشيطان وڭلت مع راسي إن بعض الظن اثم.. "

سارة جودي (كتسجل جوابها): " مانديش ذنوبهم.. هو على حد علمي ورى الزبلة لي دارت ولى يكثر معاها الهضرة وينصحها بالحق ماتوقعتش نهائيا تكون بيناتهم شي حاجة.. "

أوراينا : " حتى أنا صدماتني يمي فاش ڭالتها ليا.. إوا الله يسهل عليهم مني باغيين غير الحلال هادشي لي نقدرو نڭولو.. "

سارة جودي (تلفتات للباب لي تحل وكملات هضرتها): " وايه داكشي لي كاين.. مهم راه جا تـاشفين غنهرب.. تصبحي على خير وبوسي ليا وليداتي.. "

سدات التيليفون وحطاتو فوق الطابل دونوي وعلى ما طفى الضو مخلي غير ديال الفيوزات، جا حط راسو فوق المخدة لي شادة عندها الشي لي خلاها تدير يدها عليه لاعبة بخصلات شعرو بحنان..

سارة جودي : عيتي ؟

تـاشفين : بالجهد..

سارة جودي : تقاد بلاصتك باش ترتاح..

تـاشفين (زاد خشى وجهو فيها ورد بصوت بالكاد ممسموع): مرتاح هكا..

سارة جودي : ياك المرضي ؟

تـاشفين : مممم..

سارة جودي : وماننعسش أنـا؟

تـاشفين : ضروري؟

سارة جودي : غير إلى بغيتي..

تـاشفين (هز فيها راسو): أش بان ليك ندريرو بجوجنا بناقص؟

وماجات فين ترفض ماعرفاتش كي دار زرب عليها حتى ولات متكية على ظهرها وهو مكاليها بثقلو ووجهو مقابل مع وجهها..