عابر سبيل [ⵄⴰⴱⵉⵔ ⵙⴰⴱⵉⵍ]

Chapter 6

إيبرو (تلفت عندها دغيا كردة فعل أولية عاد رجع دورو قدامو مهبط راسو كيشوف وسط رجليه)

أسينات (مزال مبعدة أنظارها عليه باش ماتحسسوش انو فموقف المتهم.. كملات الهضرة مطمناه): عمر الحب كان عيب وماشي حنا لي كنختارو لمن يدق قلبنا.. عـادي..

إيبرو (تنهد بحرقة وبعد صمت نطق أخيرا): واه ولكن..

أسينات (بقات ساكتة كتتسناه يزيد ساعة خاب أملها): ولكن شنو؟ (دارت عندو كتطل عليه) تقدر تيق فيا.. ياك أنا ختيتك..

إيبرو (شاف فيها بدورو مطول عاد زاد بنبرة صوت مكسورة): ولكن شي مرات ماكتحسش حتى كتلقى راسك وسط حوايج.. (سكت تواني ما لاقيش باش يعبر) فشيشكـل..

أسينات (باصغاء): فحال اش.. ؟

إيبرو (هز راسو فالبني والسما بألم): ماخاصش توصل ليهم (شاف فيها) فهمتيلي؟

أسينات (بقات كتشوف فيه بلا حتى كلمة.. بقى فيها)

إيبرو (زاد وخا كيخونوه الكلمات والعربية ديالو مشكوادرية): سارة.. (سكت شوية) راك عارفة بشنو دازت.. اخر حاجة تفكر فيها هي تعطي فرصة لشي حد عاود..

أسينات (تنهدات): وخا هكاك ما يمكنش تحكم على ردة فعلها..

إيبرو : ومايمكنش نغامر..

أسينات (سكتات حيت بصح ختها مستحيل تكون بينها وبين شي حد قدها ولا فيتها غير بأعوام قليلة شي حاجة فما بالك صغر منها)

إيبرو (زاد): راكِ عارفة علاقتي بيها كيفاش.. عارفة بلي أنا وهي كثر من صحاب وشحال مفاهمين.. ما نبغيش نخصرها حتى هي وتولي تتعامل معايا بحدود.. (سكت تاني) عاود شفتي.. الفوق.. (كمل بكلمات متقاطعة باش تفهم راسها)

أسينات (كتضغط على الوتر الحساس): تـاشفين زعما؟

إيبرو (تنهد): واه..

أسينات (بتفكير): زعمـا؟ مانظنش..

إيبرو (دور وجهو جنب وابتاسم ابتسامة جانبية بسخرية): غير ظني..

أسينات (حطات يدها على جبهتها وصباعها فشعرها كتفكر شحال وهي كتشوف فالپيسين.. سكتو بجووج مخلين طياب العنب يهضر مدة طويلة تاني عاد دواو فدقة): وشنو الحل؟

إيبرو (دور وجهو جنب عندها): كي درتي عرفتي؟ (زاد) كيبان بزاف؟

أسينات (هزات عينيها فيه.. ترددات قبل ماتهضر فاللخر گالت مع راسها لي ليها ليها): فاش كتغير.. إلى ركز الواحد مع ردات فعلك..

إيبرو (حط يديه على لحيتو كيدوز عليها صباعو بنوع من الفقصة قالبو وجهو لجيه خرى ماحاملش راسو وكاره عقلو لي سمح لمشاعرو يوصلوه لهاد الماصل)

أسينات (ماقدات مزال تگول والو.. اثر فيها بزاف البلان لي طايح فيه ودارت راسها بلاصتو باش تحس بصعوبة هادشي لي كيدوز منو.. مالقات حتى كلمة تواسيه ولا تقدر تخفف بشاعة الشعور.. مدات يديها حطاتها جيهة ركبتو وحركاتها فحالا كتطبطب عليه زعما)