عابر سبيل [ⵄⴰⴱⵉⵔ ⵙⴰⴱⵉⵍ]

Chapter 7

عمر (بغطرسة وشوفات كيهرسو الحجر.. كيقرب وهو كيشوف فيها.. مامحتاجش يغوت قوة صوتو كافية): جليلة.. جليـلة..

جليلة (جات كتسارع فخطواتها): هانا أمولاي..

عمر (شاف هنا ولهيه فـ الصالة): جمعي الدنيـا..

أوراينا (بلا وعي تجرأت وقاطعاتو معتارضة): ولكنـ.. (شاف فيها شوفة الموت وهي تسد فمها دغيا.. )

عمر (قسم نظراتو بيناتهم وتنهد قبل ما يعاود يهضر بصيغة الأمر كالعادة): تبعوني..

زاد هو اللول وخلاهم وراه فيصل بنظرات كي السكانير فحال ديما وأوراينا كتدور فعينيها تخلطو عليها العرارم وتخلوضو فادها بالخلعة من باها لي شافهم وأكيد سمع هضرتها والحشومة لي گالت وخا ماشي شي حــاجة وليني الاحترام وداك الوقار مخليها تغرق فسروالها بلا ماتبين..

زاد حتال الوسعة لي مگابلة مع الباب ووقف تسناهم حتى وصلو عليه.. شاف حتى عيا ووخا نونوو وكحل عيونو يبرر شي حاجة كيديرها ولا يشرحها لشي حد اضطر يگول اش كاين باش تكمل الأمور كي ما مخطط ليها.. وفالأول والأخير أوراينا مولات العقل ماعندها باش غتضرو ومستحيل يكون ليها دخل فلي طاري.. وخا عارف اش مربي وليني هي بالخصوص يبصم عليها بالعشرة ماتهبط بنفسها على قبل ماديات وخا ماعرت اش يوقع..

سكت شحال كيشوف فيهم.. واخدك كل وقتو وراحتو فالتفكير عاد بدا الهضرة ببطء وهو مركز على بنتو..

عمر (بصوت خاتر من كثرة الرزانة): وصل الوقت تعرفي شي مسائِل.. (مد يدو باسطها جيهة فيصل لي كان كينصل الليكات من يديه) السي فيصل المختار (ثواتي وزاد) عميد إقليمي ورئيس المصلحة المركزية في التشخيص القضائي بقسم الشرطة العلمية والتقنية..

أوراينا (عرفتو فاش كتنزل عليكم شي خبر فحال الساعقة وكيوساعو عينيكم فاش كتسمعوه؛ وساعو ودنيها هي.. تزعزعات بيها الأرض وشدها الكلاكاج فطرافها مع كل كلمة نطق)

عمر (زاد مكمل): عيطت ليه على ود القضية ديال الشفرة..

أوراينا (لا رد.. شاداها اللقوة)

عمر (كيزيدها شوية بشوية وكيقطع هضرتو): وأنـا.. لي سيفطتهم لورزازات باش يقدر يرفع البصمات من الصالة على خاطرو.. بـاش يطابقهم مع البصمات لي خدا من قبل من الحوايج لي هز من بيت كل واحد..

أوراينا (بالعرض البطيء تلفتات فلاخر لي كيتعنطز حداها ورجعات شافت فباها): يــعــنـ..

عمر (زاد بثقة گايلها ليها هو نيت): عارف اش كيوقع فقلب داري..

أوراينا (باقي لسانها ثقيل عليها): و لــكــنـ..

عمر (عاود قاطعها بنفس الطريقة وكأنو كيقرى أش كيدور فبالها): ماشي غلط.. راه فقيد التحقيق؛ كيدير خدمتو أبنتي.. (خدا ثواني كيفكر) هادشي ما فخبار حتى حد من غير لالة فاطمة (لالة ماما) وحنا.. الأمور غادية فسرية تامة باش مول الفعلة ماياخدش احتياطو فحالة مالقيناش شي دليل يبين شكون هو..