عابر سبيل [ⵄⴰⴱⵉⵔ ⵙⴰⴱⵉⵍ]

Chapter 4

و ليشهد اللّه أننا كنا أطيب من أن نؤذي أو نخون أونجرح أو نخيّب ظن وثقة أخد.. لكننا لم ننل شيء و كل شيء نال منا.

شافت قصبتهم فحالا شافت ماعرت أشنو.. كتخبط وتعاود فالباب وتفرع فيه باش يحلو عليها.. گاع داك الجهد لي ماكانش ولا ديك الساعة حتى دخلاتها جليلة وغا وصلات لوسط الدار وهي تطلق حلقها فيقات الدار كاملة.. كتغوت وتضرب فراسها وتندب وتنتف فشعرها على لوحة الكلاب لي لاحوها.. دارت ليهم گنازة وهوما غير كيشوفو فيها ما فاهمين والوو.. حالتها كتشفي العدو.. ضعافت وحناكها دخلو.. الجناب تمصو لدرجة الى دازت من حداك ماتعرفها واش غادية ولا جاية..

هي تبكي ولالة ماما گالسة على ركابيها تبكي حداها ماعرفو اش يسكتوها ولا يخليها تخوي حتى تم جاي مولاي عمار هو اللول صوت عكازو سابقوو رغم غوات سارة جودي..

وقف كيشوف فيها هي لي مولفة ماكتفنفنش حداه من الاحترام والرهبة الأبوية لي زارع فيهم من كبيرهم لصغيرهم ولي مولف ماكيسمع صوتها على غير الى زلق ليها من كثرة الضحك.. كيشوف فيها طايحة على ركابيها مكسورة ومقهورة، لا حول ليها ولا قوة، فقمة ضعفها.. ضرو خاطرو وتشوات كبدتو للمرة التانية.. ملامح وجهو رغم حدتهم وتحكمو فيهم مايلين شوية للاسف وظاهر عليهم التأثر وقبل ما يزيد يضعف عطاهم بظهرو ورجع لبيتو گلس مقابل مع الباب لي كان ربع مردود وهز راسو شوية للفوق بألم كيسمع فصوتها لي بح ومابغا يهدا بلا ماينطق بحتى كلمة..

بزز باش جمعوها من تما وماجات فين تتعاشا العشية حتى غسلو ليها ولبسوها حويجاتها النقين والدافين.. مزال أوراينا كتمشط ليها شعرها وتنشف فيه فبيتها فالسفلي تسمع صوتهم كهضرو مع لالة ماما بنبرة صوت متمادية وبطريقة مستفزة على أساس بنتهم لي هي سارة جودي خرجات من دار راجلها بلا خبارو ولا خبارهم هوما لي مسؤولين عليها وماعرفوها فين زادت.. يالله غتنوي لالة ماما تجاوبهم وگف عليهم شيخ القبيلة وحيت مامقسمينش الدواور حتى هوما تحت عصمتو.. ماطولش معاهم الهضرة خسر عليهم جملة مختاصرة مفادها أنو عارف أش مربي وأنو بنتو راها فين خاصها تكون؛ فدار باها..

باقي ماكملش قاتلهم تخنزير وصل غواتها الهستيري تاني مني سمعات صوتهم.. كتغوت ربي لي خلقها بمابغيتووووش والله ياخد فيكم الحق.. شاف فتودا لي واقفة مور لالة ماما حادرة راسها.. غير نطق سميتها هزات فيه راسها بلا ماتهز عينيها.. شار غير براسو لجيهة بيت سارة باش يسكتوها.. يالله عطاتهم بظهرها كمل أمر باش تحظر ورقتها ويفرتكو الجقلة.. بداو يترعدو ويدخلو ويخرجو فالهضرة ويصبغو فيه ويهدنو.. على اساس ولدهم باغي مرتو وماباغيش يسمح فيها وخا شنو دير على أساس مطيحة ليهم الرواح ومنوضة ليهم الفتنة.. ولاو يزاوگو ويبوسو اليدين ماعرفينش بلي كلمتو ماكتتعاودش.. حاولو يسايسو معاه حتى عياو ووالو من بعد الزابور كامل لي عرضو عليه جاوبهم بالله يعرضكم السلامة وخلاهم باغين يبخو الدم ماكارهينش الأرض تبلعهم..