عابر سبيل [ⵄⴰⴱⵉⵔ ⵙⴰⴱⵉⵍ]

Chapter 3

خديجة (غير كلاتها وتحشو رجليها مابقاش عندها الجهد توقف مزال جملة وحدة لي كانت كتعاود بقهر وبكاها تحول لتنخصيص): عفاك أ أدرار البنات غيفيقوو.. عفاك سمح ليا

أدرار (شد راسو وبعد حتى وصل للحيط لاخر لي مقابل معاها وحط جبهتو عليه)

ياسمين (تسمع صوتها كتبكي وتعيط): مـامـا مـامـــا

خديجة (تلفتات جيهة الباب بهلع كبر وعودات شافت فيه ماقادراش تتزعزع من بلاصتها ولا تفنفن)

أدرار (حاس بشكيوقع وراه وخا عاطي بالظهر.. ثواني وهضر عاطيها الاووك): سيري عندها..

تنادم معاه الحال.. غرغرو عينين وكره راسوو لا قاسها گاع.. ولكن بعد شنوو؟ بعد اش؟ بعد ما طاح الفاس فالراس؟ اش غدير ليه ندامتو؟ ترجع السينتة اللور؟ هاهو گاع ندم أش فايدة الندامة لي تتنسى أول مايطيح الواحد فنفس الموقف مرة أخرى؟ باش من فايدة غترجع عليه الى غيندم دابا ويعاود يمد يديه من بعد باش يندم تاني وهي غاديا حتال شي عام..

جمعات جنابها هازة معاها الكميشة دالكرامة لي بقات ليها بعد ما مرمد الأرض بالشي لاخر.. مسحات وجهها وعينيها لي بداو يطيبوو بطراف كمامها وداكشي لي هابط من شالها عاد بدات تنش عليهم يبردو شوية ومايبانش بزاف فيها باكية عاد دفعات الباب ودخلات.. لحسن حظها كيخليو ليهم الفيوزات شاعلين ومضطراتش تشعل الضو.. غير شافتها ياسمين مدات ليها يديها بجوج وهي گالسة.. دميعاتها نازلين.. مشات دغيا عندها خديجة.. عنقاتها عندها بالجهد وهي أكثر وحدة محتاجة لي يضمها.. كتعطيها الأمان وهي مفتاقراه.. بقات شحال جاراها عندها عاد بعداتها شوية كتمسح ليها حنيكاتها وتقلب فيها لا تكون بيها شي حاجة..

خديجة: مالكـي أماما؟ أش كيضرك؟

ياسمين (كتشوف فيها مزال دميعاتها كيهبطو.. مدات يدها حتى هي لحنك ماماها فحالا حاسة بيها ونطقات بصوت طفولي): نعسي حدايا مامـا عافاكـِ..

خديجة (باست يديها لي على وجهها وجراتها حتى باست ليا راسها تكاتها بلاصتها متكية معاها ومعنقاها)

ياسمين (خشات وجهها فيها وزيرات عليها.. سكتات شوية وزادت): بغيت قُلـآن أ ماما.. (قرآن)

بدات كترتل ليها بالشوية آيات محاولة تخفي تغنغينة صوتها.. كتقرا ليها وعقلها خدام فالويل لي هي فيه ولي وخا فاتو عليه سنين مزال ماتقبلاتوش.. ماتقبلاتوش وماعندها ليه جهد.. ماعندها فين ترجع بجوج بنيات وتفرقهم على عائلتهم ماشي غير باهم.. عائلتهم لي ولات عائلتها ولي دايرينها وحدة منهم وحاسبينها بنتهم وختهم.. ماقادراش تتعايب مع ناس ماشافت منهم غير الخير.. ماطاوعهاش قلبها وماعطاتهاش خاطرها تجابه گاع دوك الحسنات والميزات على قبل حويجة فحال هادي وخا ماساهلاش وحرام تتصغر..