عابر سبيل [ⵄⴰⴱⵉⵔ ⵙⴰⴱⵉⵍ]

Chapter 5

لالة ماما (مادارت حتى شي ردة فعل غير كتشوف)

أسينات (حطات يديها على فمها حشمات بلاصتو من شنو كيگول)

أوراينا (لايحة پينوار واسع وشال على پيجامتها معنقة البنيتة وواقفة محيوزة لواحد الجيه ووخا عارفة راسها ماخاسهاش تهضر ماقدراتش تسكت): أسيد احتارم راسك..

أسيد (تلفت عندها): وفين مشا هاد الذهب..

سارة جودي (مارضاتش خصوصا فاش جبد دار الضيافة وخلط الشكلي فالعكلي حسات بيه مستقصدها ومتاهمها بطريقة غير مباشرة من خلال الناس لي محسوبين عليها وخا ماشي هي لي شداتهم.. حدرات راسها وبتاسمات قبل ماتهزو فيه بكل ثقة وتنطق ضارباها النفس عليهم وبطريقة مستفزة كأنها غير مجمعة معاه الوقت لي كان هو منفاعل فهضرتو): أ سي خويا.. بيتك تقلبك قبل من بيتهم.. الناس (قاصدة الدراري) فضيافة لالة ماما وماكنضنش غتكون ضايفاتهن بلا شوار شيخ القبيلة لي هو فالأصل مول القصبة والري والشوار.. زيادة على أنهم منين دخلو وهوما الفوق ماهبطو حتال العشا وفحضورنا والمضمة مشات من الصالون يعني ماليهم حتى شي علاقة لا فهادشي لا فالذهب لي مشى قبل ولا فالثلاثين مليون دأدرار لي غبرات هادي ربع شهور..

أسيد (كيخنزر فيها): شنو زعما أشـ.. (يالله تحرك جيهتها وغيبدا يسخن الطرح قاطعوو باه)

عمر (ضرب بعكازو وعاود بالجهد فالأرض): أش هاد قلة الترابي.. وليت غير كادر أنا هناهنا كتتناقزو عليا فحال القرود.. مزيان تبارك الله.. (شاف فالدراري بنص عين) جمعو عيالاتكم وخويو ليا من هنا.. (عاد دار للبنات بادي بـ أوراينا بحكم انها متعتابر كبيرة وأم) رجعي عند ولادك.. ونتوما (جمع سارة جودي وأسينات) لي عندها شي بيت توصلو.. فرقو عليا هاد الجوقة..

ما زادوش معاه الهضرة كلهم حدرو راسهم وزادو إلا قاصحة الراس لي بقات واقفة دايرة فيها الدفاع الملكي.. ووخا ماقرباتش لحدى ايبرو، لي هامها فالموضوع وخا حتى لاخر ما هانش عليها يتهان، الا وأنها بقات مقلزة تم حتى تشوف أش غيديرو معاهم.. ومع كان عاطيها بالظهر ترددات وعاودات قبل ماتطلقها فيد الله وتعيط ليه بصوت ناقص احتراما..

سارة جودي: بّـا.. (عاضة على قنوفتها خايفاه يقمعها قدام صفر الجلدة ساعة ماسمعهاش و اضطرات تعاود) أ بّـا..

عمر (تلفت عندها بيديه لي جامع وحدة فوق لخرى ورى ظهرو الشرار كيخرج من عينيه.. فأقصى درجات أعصابو): أش بقى ديري هنا؟

سارة جودي (بهمس شارت بصبعها لفين واقفين): نديهم معايا؟

عمر (وجهو حمار بالعصاب): عندي النزاهة أنا؟ طلعي الله ينعنـ والديك قلة الحيا !!

سارة جودي (يالله غتجاوبو وهي تتفكر الدعوة عامرة وهو شاعل كثر من العادة غيصدق يا مشير عليها ولا مشير بيها ولا طايح ليهم بالطونسيو تم وهي تعوج فحالها دايرة حركة بوجهها لـإيبرو زعما مالقيت كي ندير ليك أخويا)