صوت مراة كبيرة من عزايزنا الجميلات : ضرب العصا ويش دار للقرقاشي هي هي هي ... ضرب العصا ويش دار للقرقاشي هي هي هي .. ضرب العصا ويش دار للقرقاشي هي هي هي .. حبٍ نويته لو يقصوا راسي هي هي هي
قطع غناها رؤيتها لاربع فراشات ان صح الوصف
حفيدات احفادها كانوا تقريبا في نفس العمر و يلعبوا و يضحكوا مع بعض
لمتهم جميع و مع بعض ع عكس اهلهم كانت تفرح فيها و تعطي فيها في امل كبير ان اولادها يرجعوا يجتمعوا ع قلب واحد يوما ما
و بينما هي تتفرج عليهم
: عديهم يا سامية تلقيهم ثمانية
: واحد اثنين
صوت عالي قاطعهم
: منااااااال
: فجر
: فادية
: ريييييمة
ضايق الصوت هذا مش بس الطفلات او الفراشات بل حتى نجمية : لا حول و لا قوة الا بالله ... استاقضوا بيهن
كل وحدة من البنات مشت في اتجاه امها و هي حامقة: ديما هكا في نص اللعبة
: اي تقول متفاهمات
كل ام شدت بنتها من ايدها و تعارك فيها : لو كان يشوفك جدك يوريك
: شن قلنا احني ع الجية هنا و اللعب معاهم عندك بنات عمك لو تبي تلعبي معاهم
: اخر مرة تديرها والا و الله نقولها لجدك
: معش تحلمي بيه الطلوع
ملامح الفرح و المرح اللي كانت ع وجوههم حاليا تبدلت لملامح حزن و كسرة و هما يودعوا في بعض بالنظرات و افترقوا و كل وحدة مشت مع امها
بعد مرور عدة ايام
كانوا الاربعة في ذات الوقت هاربات من حوشهم
كل وحدة بروحها
و رجعوا يلعبوا و يضحكوا
فجر : حيه علينا صوت حد
شافوا من بعيد باب حوش ينفتح
بدو يجروا في الحوازة لعند القو ارواحهم جنب شجرة القرقاشي الكبيرة ولاول مرة يلاحظوا شكلها كيف تحتها زي الحفرة و اغصانها الكبيرة نازلة ع الارض بحيث تخفي اي حد يخش تحتها
نزلوا تحتها و من اليوم هذا قرروا ان القرقاشي ح تكون هي مكانهم السري
ريمة : خلونا نسموها زيتونة سرنا زي الحديقة السرية اللي في الرسوم
فادية : فكرة صح
منال : اي و ما تقولوا عليها لحد
فجر : اي سر بينا احني الاربعة بس كل يوم زي توا نجوا هنا نلعبوا ما يشوفنا حد بعدها
و من هاليوم حافظوا ع عادتهم و سرهم ......
انتظروني في روايتي الجديدة اللي ح تجمعنا مع بعض عقد القرقاشي وهي عن قصة حقيقية و اصحابها ح يتابعوها معاكم
و تحية ليكم مني جميعا عامة و تحية خاصة لاهلنا في الزنتان ❤️❤️❤️❤️
مارية علي الخمسي
