البنات كانوا تقريبا يتكلموا في نفس الوقت ...
منال ايديها في نصها و تفنص فيهم : كيف تجيبوه لمكانا
فادية حتى هي وقت شافتها دارت زيها : قريب متت وقت شفته علاش خليتوه يعرف سرنا
ريمة تبيهم يهدوا : خيركم يا بنات ؟ تي واضح جي بروحه اسكتوا و خلونا نفهموا .. اي يا فجر تكلمي
حكتلهم فجر ان شافها و لحقها
تفهموا الامر و كملوا حكاياتهم و اخبارهم مع بعض
الريمة : و توا لازم نمشوا لحنى لان مرات يسالها حميد حسيته مش مصدق
فجر وقفت : اصلا مستاحشتها ... هيا بنات
طلعوا من تحت الزيتونة و مشو لحوش نجمية القوها برا حكولها ع اللي صار و هي زي عادتها قالت عندي الموضوع
و بعدها كل وحدة فيهم مشت لحوشها
و فجر مشت تدور في عمها الشارف و جدها عبدالحميد لعند القتهم : السلام عليكم
: و عليكم السلام
فجر خذت منهم السطل : نمشوا توا
الشارف : هيااا
كانت تتوسطهم و تهدرز معاهم و تضحك و منسجمة ع الاخر و اول ما وصلوا في اشجار التين
بدت تساعد فيهم و كل مرة تسال ع حاجة
شافهم جدها امحمد من بعيد: قول يا عارف اللي عماهم مش بنتك فجر
حط ايده فوق عيونه ع شأن يركز : اي و الله الا هي ( ضحك) هالمرة معاهم مش معانا يا سيدي
تنهد بحسرة : الله غالب هذا حال الدنيا قبل هي اللي تهدرز و اطير عني في الكساد توا عدتلهم غادي
العارف : اهو نكملوا و نمشوا عندهم نهدرزوا
امحمد نفض ايديه من التراب و عيونه مازالوا عليها : اي خلي يجي شاهين قبل و حتى حمزة الاخر طول
اما صاحب التيوتا كان طالع عنده موعد مع صاحبه احمد لمحها بين الشجر و معاها بوه و جده ... كان متمني يمشيلها و ياخذها من بينهم و يروح بيها بس الحماية قوية و عندها حصانة هالمرة ما فيهاش كيف
ضغط ع السيارة و كمل طريقه
وقتها هي ركزت ع الطريق و شافت السيارة و اكيد عرفت انها سيارته
" و الله ما عرفت كيف ندير معاك يا عبوده"
ضحك الشارف و اشر في اتجاه معين : اهو جي جدك
شافت وين ما يأشر الشارف و كانو بوها و جدها جايين في اتجاههم ابتسمت حطت السطل و مشت بتلاقيهم
