( للاسف بدينا في مسلسل هروب الضي و هذا اللي خلاني تاخرت شوية )
و جي يوم الخميس و هو اليوم اللي بتزور فيه فجر اهلها لبسوها البدلة الصغيرة و طلعت في ابهى طلة و قلبها سابقها للحوش اللي تربت فيه
مدتلها ريمة الكاب : هيا خلاص انا نازلة نلبس و انت البسي هذا بعد يجي عبدالحميد خليه يشوف الزين
في سرها " فرقة حالي " : صحيتي و ان شاء الله نردهولك في فرحك و انت يا سالمة نردهولك في فرح ضغارك يا رب
ردت سالمة بابتسامة: سلمك هيا حتى انا هذاكا هو نلبس
طلعوا الاثنين و هي وقفت قدام المرايا و شادة الكاب في ايدها و قررت تجرب تخليه يشوفها مش لشي و لكن بس ع شان تشوف ردة فعله شافت الزبون اللي ع السرير و كان هديتها ليه لكن بسبب الاحداث اللي صارت ما قدرت تعطيهوله تنهدت وطلعت من الدار
و قعمزت ع الصالون و في ايدها الكاب و عينها ع باب الجناح
ريمة كانت تلبس في عبايتها و طلعت من دارها تلاقت معاه : مازال مش واتي انت
ما ردش عليها و ركب فوق بخطوات سريعة في باله يلبس اي شيء و خلاص ع السريع فتح الباب و كانت هي في مقابل الباب
عبدالحميد اول ما شاف اطلالتها " شن مازال ناوية تدير فيا البنت هذه " : كح كح احم السلام عليكم
وقفت و قدمت منه و قريب توصل فيه حب يشاكسها ع شان يطلع من الجو اللي انحط فيه معاها : شكلك نسيتي موضوع الثلاث خطوات
انحرجت و تذكرت : لا ما نسيت بس نبي نطلب منك طلب
اتكى ع الباب و هو مشبك ايديه في بعض : اي قولي نسمع
بتوتر واضح : احم هذه امي قالت ان من العادات الراجل يلبس هدية مرته في يوم زي هذا
قام حاجبه : هذاكا اللي مرته تجيبله هدية مش زي حالاتي الله غالب
شافتله بربع عين : انت الله غالب عليك انا اللي ربي يكون في عوني حتى هديتي ما خليتني نعطيهالك زي الخلق ع العموم هديتك موجودة داخل ع السرير يا ريت تلبسها لان حتى امي معاي وقت شريناها
قدم ناحية الدار : و لو ما لبستها
في داخلها وجعها خاطرها اكيد : ع راحتك انا قلت نقولك بس
و رجعت لمكانها و قعمزت
تفرج عليها شوية و خش للدار شاف ع السرير زبون لونه كريمي و بعد تفكير..
حست بيه طالع بدت تلبس في الكاب و اول ما لفت انسحرت بطلة ولد عمها بالزبون الكريمي مع لون شعره الاسود و بشرته القمحية المايلة للبياض و ملامحه الجامدة طالع شي خيالي
تصدقوا ان تحشم من نظراتها المعجبة بيه و حب يهرب : هيا انزلي وقت عطلنا ع الناس
و هي في مكانها
