( نزلتها بكري لاني مشغولة ❤️❤️)اصعب شيء وقت الانسان يتمسك بشيء هو اصلا مش مقتنع بيه
صبرية بنبرة فيها نوع من التوسل و الاصرار في ذات الوقت : انت بس سكر راسك يا عبدالحميد و انا معاك و الموضوع مش ح يصير منه قول اي سبب انك ما تبيهاش و عروستك عليا انا ! شني رايك في بنات خالك
عبدالحميد كان داهش لان يتريض طبس و شد ع ركبيه بايديه و خذي نفس عميق : انا يا امي وقت نعطي كلمة ما نولي فيها لو ع موتي يا بال جدي اللي تكلم و خطبلي البنت من يومه علمني ان الكلمة وقت تطلع يعني الموت معناها انت اللي سكري ع الموضوع و بعدين انا الشيء الوحيد اللي مش عاجبني في خطبة بنت عمي حاجتين الاولى اني مش مفكر في موضوع الماخذة بكل و كل همي خدمتي و بس و الحاجة الثانية اني من قبل قايل من العيلة ما نبي ناخذ وانت تقوليلي بنات خالي شنو الفرق يعني ! اقل شي بنت عمي جدي يبيها و اللي يبيها جدي تصير فكينا من المشاكل و خلي الموضوع ماشي زي ما يبي جدي
صبرية عرفت ان ولدها مستحيل يتراجع عن الكلام اللي انقال في صلح امس خشت و هي تغلي منه و من جده و من بوه و اكيد من فاطمة و بنتها
لاقتها الريمة : صباح الخير
صبرية بحدة : وين الخير ؟! اسمعي يا بنت نهارك اسود نلقاك مخلطة ع الفرخة اللي اسمها فجر مش كان هما خطرلهم يتصالحوا توا و يبلوني بيها كنة ننسى كل شي ردي بالك و انا وقضتك خلينا كيف قبل كيف تالي و ان شاء الله ربي يفكني منها نسبة السو هذه
الريمة تشبحلها و مصدومة و خلاص و في خاطرها تضحك و جت بترد عليها و تقوللها اصلا احني ما عمرنا تقاطعنا زيكم بس سكتت خوفا من ردة فعل اهلها و كملت طريقها للمطبخ ع شان توتي الفطور
و بينما هي توتي في الفطور
خش عبدالحميد من برا و قعمز ع الكرسي قدامها داهش : صباح الخير
الريمة: صباح النور
دور ع امه بعيونه مش موجودة: وين امي
الريمة اشرت برا : خشت داخل و شكلها والعة
عبدالحميد عرف سبب غضبها و فات الموضوع بس كان في باله سؤال و يبي يعرفه : قلتلك
الريمة ولعت الغاز ع الشاهي و جت جنبه : نسمع فيك
عبدالحميد ملامحه ما توضح اذا كان عنده فضول او اذا كان الموضوع من الاساس ما يهمه : احم هذه بنت عمي العارف كم عمرها ؟! و شنو تدير تقرا او تخدم
الريمة فرحت بسؤال خوها و قعمزت ع الكرسي و كلها لهفة ع شان تحكيله و نست الاتفاق اللي بينها هي و بنات عمها انهم يحاولوا ينهوا الموضوع : احم هي من عمري و تخدم في مصحة ال### دكتورة تخصصها اشعة بس تخدم حتى ممرضة لان في نقص عندنا اي و اسمها فجر