(ملاحظة بعد التحية ليكم جميعا .. اول شيء القِرْقَاشِي هكي تنطق لان في من سألني كيف تنطق .. ثاني شي انتم عارفين الاسبوعين هذو امتحانات و هذا السبب ان الحلقات مش طويلة زي العادة بالاضافة اني من الاول قلت الرواية مش زي رواياتي السابقات يعني طبيعة الاحداث هكي اخر شي قريت بعض التعليقات اللي تنتقد ان ما في تقدم في حياة باقي الشخصيات .. هو في تقدم بسيط نشيرله كنوع من التذكير لاني مش حابة نضيعكم معاي بكثرة الشخصيات اولا و ثانيا لان القصة حقيقية فالتطور مربوط عندي بوقت معين و بديت نمهدله شوي شوي ... و في النهاية كلمة اخيرة لاهلنا في الزنتان انا دايرة جهدي نكتب بنفس اللكنة متاعكم سامحوني بالله عليكم ع اي تقصير و كل المتابعات اللي تواصلوا معاي و صححولي اخطائي مشكورين و حاولت نعدل في الحلقات الجديدة مع خالص محبتي ليكم جميعا ❤️❤️❤️)
بعد مرور شهور العدة ع نوارة بدون اي احداث جديدة ع العيلة و بالنسبة لعبدالحميد و فجر فمازالوا ع ذات الحال
و ما في اي حد ملاحظ ان زواجهم مش طبيعي حتى ريمة اللي كانت مش بس حماتها و انما صديقتها وان كانت الصداقة هذه في الخفاء .. اكيد كانت حاسة ان في فتور و جفاف في التعامل بين بعضهم بس من وجهة نظرها و ع حسب خبرتها بخوها و طبعه هو متغير و للاحسن و اكيد سبب التغير ما يحتاج اي اثنين يفتوا فيه !! لهذا ما كانت تتوقع ان الامور بينهم بهذا السوء ....
و في يوم كل وحدة منهم نقصد بنات العقد سمعت من خوتها ان الشباب منظمين رحلة او زردة و ح يمشوا للقريات مرة ثانية و شاريين بضاعتهم
و في اجتماعهم المعتاد
ريمة : و حق ربي لو ما مشينا معاهم نهبل
فجر تهز في رجلها و كل تفكيرها ان هو ح يغيب عنها ايام : حق ... و انا اكثر منك
فادية : كل اللي نفكر فيه ان المشية هذه فرصة نتلاقو و حرام تضيع
منال ابتسمت ابتسامة عريضة و لان هي اكثر منهم تبي المشية و لاكثر من سبب : و علاش نضيعوا فيها و الكونغرس معانا
تعالت ضحكاتهم لان فهموا قصدها
و من القرقاشي لعند نجمية طول
و كانوا اثنين ع يمينها و اثنين ع يسارها
ريمة : لو مش ع شانا احني ع شان البنات حرام "بنات نوارة"
منال : و عمتي حتى هي
فجر بتوسل : و انا يا حنى من عرسي ما عاد طلعت
فادية : و بعدين هما بيمشوا بيمشوا لو ما خذونا معاهم توا مستحيل ياخذونا مرة ثانية
نجمية تسمع فيهم و اقتنعت : يعني تبو تمشوا عماهم
في صوت واحد و الاربعة صفقوا : اي
