(Unicode)
ချစ်တေးသွားတွေ ပဲ့တင်ထပ်သွားချိန်မှာ …
နာကျင်စေတဲ့ အပြစ်ကြွေး တွေကတောင် …
" ချယ်ရီ " လို အရသာ ရှိပါတယ် တဲ့ ။
……………
အယ်လ် အိုင် ဗွီ အီး … လစ်ဗ် (LIVE) … ။
ရှင်သန်ခြင်း … ။
အနီရောင်နှင့် ခရမ်းရောင်လွှမ်းမိုးသော တောက်တောက်ပပမီးမောင်းများက ပြေးလွှားလျက်ရှိသည် ။ ဒီဂျေသံများက အမြင့်သံနှင့် အနိမ့်သံရောထွေးကာ မြူးကြွနေသည် ။ အရောင်အသွေးစုံသော အဖျော်ယမကာတို့သည် ရှည်လျားသောနံရံကပ်စင်များတွင် လှပစွာအသုံးတော်ခံလျက်ရှိသည် ။ ပိန်သော ပုသော ဝသော ရှည်သော ပုံစံစုံ အရွယ်စုံ ဟန်ပန်အမူအရာစုံ လူအပေါင်းတို့သည် တောက်တောက်ပပဝတ်စုံများကို ဝတ်ဆင်ထားသည် ။
အီး ဗွီ အိုင် အယ်လ် … အီးဗဲလ် (EVIL) … ။
ဆိုးယုတ်ခြင်း … ။
လူအပေါင်းသည် မီးရောင်အောက် တီးလုံးသံအောက်တွင် ကိုယ့်ကိုကိုယ် မေ့လျော့ထားကြသည် ။ ချိုရှသော ယမကာတခွက်၏ ရီဝေသောအရသာအောက်တွင် မိမိကိုယ်ကိုထုတ်ရောင်းလိုက်ကြသည်။ ရောင်စုံမျက်နှာပေါ်မှ အပြုံးလှလှများက အတုအယောင်သာ ဖြစ်သည် ။
ကြီးမားသော မြေအောက်ကလပ်ကြီးသည် တောက်ပစွာ ရှင်သန်နေသည် ။ တချိန်တည်းမှာပင် ပူလောင်စွာ သေဆုံးနေပြန်သည် ။
ထိုအရာနှစ်ခု၏ ကြားနေရာတွင်တော့ ငယ်ရွယ်သော မိန်းကလေးတစ်ယောက်၏ ခပ်တိုးတိုးအသံတစ်ခုကိုကြားနိုင်သည် ။
" တာကီ ဆက်ကီ တာလာကီ ဂျာ … "
ပြင်ဆင်နေသည် ဟု ဆိုင်းပုဒ်ထောင်ထားသော အမျိုးသမီးသန့်စင်ခန်း၏ ကြမ်းပြင်ပေါ်တွင် ကောင်မလေး ထိုင်နေသည် ။ လက်ထိပ်ဖောင်းဖောင်းလေးများမှ သွေးစက်အချို့သည် အနီရောင် ဖယောင်းတိုင်ကြီး၏ မီးတောက်များပေါ်သို့ တစက်ချင်းကျဆင်းနေသည် ။
" တာကီ ဆက်ကီ တာလာကီ ဂျာ … "
ဖယောင်းတိုင်ကိုင်ထားသော လက်တဖက်နည်းတူ နှုတ်ခမ်းဖူးဖူးများကလည်း တုန်ယင်နေသည် ။ ကောင်မလေး၏ မှေးကျင်းသော မျက်ဝန်းများက ငြိမ်သက်ခြင်းမရှိဘဲ ဘေးဘီဝဲယာသို့ ဝေ့ဝိုက်ကြည့်နေသည်။
YOU ARE READING
C H E R R Y
Mystery / ThrillerEven sins taste like Cherry , in between echos of love songs . (Big warning : Mature Content / Own character )
