C H E R R Y

(7)

(Unicode)

  ချစ်တေးသွားတွေ ပဲ့တင်ထပ်သွားချိန်မှာ …
နာကျင်စေတဲ့ အပြစ်ကြွေး တွေကတောင် …
       " ချယ်ရီ " လို အရသာ ရှိပါတယ် တဲ့ ။

…………

ထို့နောက်တွင်……… ။

ကျောချမ်းလောက်သည်အထိ အေးစက်သော ရယ်သံများ ကို သူ ကြားနေရသည် ။ ပတ္တမြားခဲများလို တောက်ပနေသော အနီရောင်မျက်ဝန်းတစ်စုံ ကို သူ မြင်နေရသည် ။

တံခါးခေါက်သံ တဒေါက်ဒေါက်ကို ကြားလိုက်ရသည် ။

- ပါမောက္ခကြီး … ကျနော့်ကို ခေါ်တယ်ဆိုလို့ပါ… -

ရှည်သွယ်သောကိုယ်လုံးတစ်ခု က သူ့ရုံးခန်းထဲသို့ ဝင်လာသည်။

- အိုကေ…  မစ်စ် ရှိုင်သန်းန် … အဲ့တာ ဘာအဓိပ္ပာယ်လဲ … -

သူ့ကို စိုက်ကြည့်သော သူမ၏ မျက်ဝန်းများက နီရဲလျက်ရှိသည် ။

- ငါ ဒီမြေကြီးပေါ်မှာ နှစ်ပေါင်းထောင်နဲ့ချီပြီး လျောက်ခဲ့တာ … -

ဂျွတ်ကနဲ ဂျွတ်ကနဲ အသံများနှင့်အတူ အပိုင်းပိုင်းကျိုးကြေနေသော သူမ၏ ကိုယ်က အကောင်းပတိပြန်ဖြစ်သွားသည် ။

- မှတ်ထား…  အဓိပ္ပာယ်က - နတ်ဆိုး - တဲ့……  -

သွေးတတောက်တောက်ကျနေသော လက်ကို သူမ မြှောက်ပြလာသည် ။ သူ့ဘေးသို့ ကျလာသော သွေးရွဲရွဲ အသားတစ် နှစ်ခု… ။

ကျောချမ်းလောက်သည်အထိ အေးစက်သော ရယ်သံများ… ပတ္တမြားခဲများလို တောက်ပနေသော အနီရောင်မျက်ဝန်းတစ်စုံ … ။

ထို့နောက်တွင် …… ။

………

တတီတီ မြည်နေသော စက်သံများကို သူကြားနေရသည် ။ မျက်လုံးတို့ကို ဖြေးဖြေးချင်းဖွင့်ကြည့်လိုက်တော့ အဖြူရောင်မျက်နှာကျက်ကို သူ မြင်နေရသည် ။

လက်တစ်ဖက်ကို မြှောက်ကြည့်ဖို့ သူ ကြိုးစားသည် ။ သံကိုသံချင်းခတ်မိသော တောင်ကနဲ အသံနှင့်အတူ အေးစက်သော တစုံတခုကို ခံစားလိုက်မိသည် ။ ခေါင်းကိုဖြေးဖြေးချင်းစောင်းငဲ့ကာ ကြည့်လိုက်တော့ လက်ကို ချုပ်နှောင်ထားသော ငွေရောင်လက်ထိပ်တစ်ခုကို မြင်လိုက်ရသည် ။