ရင်ခွင်ထဲမှချစ်ရသူ-၂

အပိုင်း(၂၁၂) မယားငယ်က ဘယ်မှာလဲ

Unicode

ကျော်ဝ်ဖန်ရွေ့က အဆက်အသွယ်ကောင်းတယ်။ သူ့ရဲ့လက်ရှိရာထူးနဲ့ မိသားစုကြောင်းပေါ့။ ဒါပေမဲ့ ကျားမကြီးကျော်ဝ်ကလဲ သူမရဲ့ကိုယ်ပိုင်သူငယ်ချင်း အဆက်အသွယ်တွေ မိတ်ဆွေတွေက မနည်းပါဘူး။ သူမက ချက်ချင်းဆိုသလိုပဲ မယားငယ်ရဲ့အခုလက်ရှိတည်နေရာကို ရှာတွေ့သွားတော့တယ်။ ပြီးတော့ အချိန်ဖြုန်းမနေတော့ဘဲ ရှောင်းရုံရုံ ဇာတ်ကားရိုက်နေတဲ့ရိုက်ကွင်းနေရာကို သွားဖို့အတွက် လေယာဥ်လက်မှတ်ဖြတ်လိုက်တော့တယ်။ သူမက ကျော်ဝ်ဖန်ရွေ့ သေသေရှင်ရှင် ဂရုမစိုက်တော့ဘဲ သူ့ကိုဆေးရုံမှာ ပစ်ထားခဲ့တော့တယ်။ သူမက အခု အဲ့ဒီရွံစရာကောင်းတဲ့ မြေခွေးမကို သွားပြီး လက်စားချေဖို့ စိတ်ကကြီးစိုးနေပြီလေ။ သူမက ရှောင်းရုံရုံက အရှက်မရှိတဲ့မိန်းမပျက်ဖြစ်တဲ့အကြောင်းကို သွားပြီးဖော်ထုတ်ရမယ်လို့ လုံးဝသူမနာမည်နဲ့ကို တိုင်တည်ပြီး ကျိန်ဆိုထားတယ်လေ။

ကျားမကြီးကျော်ဝ်က ဘာသွားလုပ်မယ်ဆိုတာ လုရိသိတယ်။ ဒါပေမဲ့ သူက ဂရုမစိုက်ဘူး။ သူက ကျော်ဝ်ဖန်ရွေ့ကို စွဲချက်တင်မှာပဲ။ တစ်ခြားဟာတွေက သူနဲ့မဆိုင်ဘူးလေ။ သူက ကျော်ဝ်ဖန်ရွေ့ကို စစ်ဆေးခဲ့တာက ကျော်ဝ်ဖန်ရွေ့ကို ယန်ဟွမ့်ကို ဘန်းဖို့ ကြိုးစားခဲ့လို့လေ။ ပြီးတော့ လုရိစစ်ဆေးလိုက်တာနဲ့ ကျော်ဝ်ဖန်ရွေ့က အာဏာကိုအလွဲသုံးစားလုပ်ပြီး ဥပဒေကို အကြိမ်ပေါင်းများစွာ ချိုးဖောက်ခဲ့တယ်ဆိုတာ တွေ့လိုက်ရတော့ အင်းးးးးးး ကျော်ဝ်ဖန်ရွေ့အတွက် သူ့အပြစ်ကြွေးတွေကို ဆပ်ဖို့ အချိန်ကျပြီပေါ့။

အဲ့အချိန်မှာပဲ လီချန်းချင်က သူခုနလေးက ရလာတဲ့ အစီရင်ခံစာကိုဖတ်နေခဲ့တယ်။ သူက ယန်ဟွမ့်အတွက်စီစဥ်ထားတဲ့ သရုပ်ဆောင်အလုပ်တွေ အားလုံးကို cancel လုပ်ပြီး သူမနေရာမှာ တစ်ခြားမင်းသမီးတွေကို အစားထိုးပေးရမှာလေ။ ပြီးတော့ ယန်ဟွမ့်ကိုကမ်းလှမ်းထားတဲ့ အလားအလာရှိတဲ့ ဇာတ်ညွှန်းတွေကိုလဲ ယန်ဟွမ်က မအားလို့ပါ ဆိုတဲ့ အကြောင်းပြချက်နဲ့ အကုန်လုံးကို ငြင်းပေးရဦးမှာ။ သူ စီစဥ်စရာတွေ စီစဥ်ပြီးသွားတော့ စိတ်ရောကိုယ်ရော ပင်ပန်းသွားတယ်။