سمراء

الفصل(7)

مسائكم ورد ورداتي 🌷

حياتي مرت كالفصول
لكنها استقرت بك ياربيع عمري

نادية

دخلت للبيت اني وسامي وفجاءة ما حسينة غير اختة الجبيرة ام احمد داخلة وياهة اولادها وبنتها ،اولادهة كلهم اكبار ماعدة كاظم عمرة تسع سنوات ،جان تتلكاهة امها وكالت شبيج شكو كالت ابوهم طردهم من البيت يريد يتزوج تالي عمرة ،
يمة راح نكعد عدكم مؤقت على ما يدورنة احمد بيت هنا ،رحبت بيها امها وسحبني سامي للغرفة ،جانت الغرفة اتخبل عرفت هي من ترتيبة وما مخلي احد يلعب بيها
جانت الجرباية عليها فراش مطرز بالورد وعلى جانب مكتبة كتب صغيرة واوراق ولوحات ،اتقدمت فتحت الكنتور وجان اشوف ثياب من كل الالوان ويمهن قوطة معلكهن ،كعد على الجرباية واني كعدت بصفة لزم ايدي وكال
شوفي هذا بيتنا امي اخواتي يأذنج تجين تكليلي واني اخذلج حقج منهن
هزيت راسي بأي وكمت علكت العباية ورجعت اتمددت يمة على الجرباية

للظهر اندكت الباب طلعت امة علمود الغدة ،طلعنة اني وياه وجان البيت هوسة وكرايبهم كلها ملتمة كعدت بصفة واشوف اختة تخوزر بية حتى ماعرفت اكل من الناس
كملنة استحيت اظل كاعدة فكمت وياهن اشيل السفرة وبين ما جنت اشيل جان اسمعها تكول لاختها حظوظ اني رجلي ياخذ علية مرة وهاي تزوج اولاد تجار وتسحول بالزلم وراها

صفنت عليها اني لساني مو قليل بس ماحبيت اسوي مشكلة اول مرة عفتها وطلعت رحت بصف سامي ،جابن الجاي جانت بنتهة الي توزع الاستكاين وبس وصلت يمي عبرتني وراحت

كام سامي انطاني استكانة واخذ واحد من الصنية عفتهن براحتهن مادام سامي وياي

المهم مر اول يوم على خير ثاني يوم اخذني سامي اسلم على خالتة خطية مرة مقعدة وماتكدر تطلع
رحبت بية وحطت محبس ذهب بيدي

رجعنة للبيت جانت خالتي موجودة وامي واختي جايات فرحت بيهن وبجيتهن جانن جايبات وياهن دهين واني اموت علية ضميت منة لليل
للعصر بعد ماطلعن اخذني سامي للبستان للمكان السري كعدنة هناك وكعد يقراي قصائد واني اضحك علية

ماجنت اريد هالايام تخلص من كثر ما حلوة

مرت الايام وصار 12يوم متزوجة جاوبلي بنتي استغربت اول مرة من الوضع والهوسة الي عدهم لكن اتأقلمت بس همة مو كلش حبوها بس سامي مدللهة دلال لان بنتي

وبيوم جنت بي اسوي الغدة وجان اسمع صياح بنتي عفت الي بأيدي ورحت ركض الهة وجان اشوفها وكعة على وجهة ومفرفحة
ركضت عليها شلتها ونكثت التراب الي بوجهة
جان تحضني وتصيح ماما اخذني منهم كتلة منو ياج ماما
كالت داظم دربني وتب (كاظم ضربني وطب)
اخذتهة من ايدهة ورحت علية كتلة عمة ليش وية الطفلة مو انت جبير وعاقل شسوتلك

جان يكول بعين صلفة عمة العمت عيونج اعرفج تعرفيني حتى تكليلي عمة

فتحت حكلي على قلة التربية العندة تكول لسان ابن شوراع