سمراء

الفصل(3)

مسائكم جوري ورداتي 🌷🌷

الفصل الثالث
من رواية سمراء
تأليف
نور الأسدي
ا(G.N)

اختنكت من سمعت كلامة وماعرفت شسوي وما حسيت غير اني كدامة ولازم ارضخ للي راح يصير ،ماعندي اي عذر وكل الي اجة بالي سمعة اهلي بين الناس رضيت بواقعي ومصيري .

ذات صباح :

كعدت وانا جسمي كلة مكسر واحس نار وشاعلة بي اتذكرت الي صار امس ودموعي نزلت لان خلاص هسة صرت مرتة شرعا وقانونا وتمت العلاقة بينة ،جمعت كل قوتي وكمت للحمام وصرت اتحرك بلا احساس شفت الانجانة متروسة مي صرت اشيل واحط على راسي بلا وعي
فجاءة سمعت الهلاهل جوة ،خلصت ولبست وطب هو ،كالي،تعاي،انزلي امي تريدج مشطت شعوري بمشط الخشب جان هدية من ابوي ،ابوي الي اختار الي بدون ما يسألني المهم نزلت والكل استقبلني وسلم علية وامة حطت محبس ذهب بيدي وكالت يارب اشوف جهالكم تارسة البيت عن قريب ،هو جان فرحان ويضحك بس اني ما حسيت بفرح ابد كالت اليوم سبعتج وبالليل هشام ياخذج لاهلج تشوفيهم مافرحت لان شنو فايدة اروح لاهلي واعرف هو زوجني علمود خلاف لا يمي ولا الي شغل بي
المهم كمنلة غدة وكال يلا نروح لبست عباتي وشلت جنطي وطلعت وياه جان راكن السيارة البرازيلي بالباب  ركبت وشغل السيارة ،طول الطريق محد حجة وية الثاني الى ان وصلنة البستان لمحت النخلة من بعيد

كتلة بگلبي هاينخلة بعدج على العهد لو نسيتي ،

وصلنة بيت اهلي وسلمنة جانت حنان لسة موجودة واخوي وزوجتة هم موجودين افتقدت وجود اخوي مهدي كتلهم وين كالوا التحق وية زوج حنان لشوية اجة ابوي سلم علية وانطاني علبة ماعرفت شبيهة وكال هاي هدية صبحتج ماكدرت اجي لان عمج وكع بضيچ ،كتلة ياعم منهم ؟

كال عمج ابو سامي مو اجة واعتذر بعد عرسج بيوم واني سامحتة لان مهما يكون بينا عشرة عمر

طاحت العلبة من ايدي،وباوعت على امي ماكدرت اصرخ واحجي،واكللهم ليش بعد ما خربتو حياتي وحياة سامي وحرمتونة

مشيت بدون ما احجي وكعدت بصف هشام ،كتلة يلا نروح عمتي اليوم وحدها
هم هو ماكال شي استئذن وطلع واني طول الطريق احس جسمي نمل وشعل نار

كالي شبيج كتلة ماادري اظن سخنت
كال شي طبيعي كل مرة بعد العلاقة يصير بيها هيج
اومئت بأي وسكتت الى ان وصلنة سلمت على عمتي وصعدت بدون ما اكلة نمت

قررت من يومها بعد ماروح لاهلي واستمرت حياتي باردة وية هشام ماشعرت بيوم بمشاعر اتجاهة لان هو ما كان يهتم او ينطيني فرصة ابدي حياة جديدة واحبة المهم مرت اربع اشهر على زواجي

واتعودت علي امة وصارت اقرب من امي الي وبيوم اني كاعدة اطبخ كالعادة ،حسيت بألم اسفل ظهري التفت لعمتي وكتلهة صفنت علية وكالت كومي حبيبة نروح للطبيبة لمياء هاي وينها براس الشارع اني هم ماعاندت وكمت وياها بدون مااعرف ليش وشبية
لبست عباتي وطلعت وياها وبس وصلنة دخلت لان تعرف الدكتورة
حجت هي وكالت دكتورة اليوم بدل ما اجيبلج بنتي جبتلج جنتي وهي هم مثل بنتي وماكو فرق بينهن