كشرت ملامحها من ضو الشمس الداخل من البلكونة..فتحت عيونها واخدت وقت حتى صحصحت..رفعت تلفونها المجدوع في السرير جنبها عشان تشوف الساعة كم..لقتها 9:14 ص..اتأفأفت لأنو الصبح فاتها..وقفت واتجهت علي الحمام..اتسوكت واتوضت صلت..وقفت قدام المراية شقت شعرها نصين وضفرتهم عملت ليهم باندات صُفر ونزلت..
وطاااط علي المطبخ لأنها جعانة.."امبارح م اتعشت سمح بسبب محمود😂😂😂"..
سمعت صوت مازن بضحك ولمن دخلت لقتو قاعد فوق تربيزة الصفرة وشيرين قاعدة في كرسي جنب التربيزة..وريتا واقفة جنبهم..شكلها بتحكي ليهم في شي وهم ميتييين من الضحك..
ابتسمت:صباح الضحك
مازن عاين ليها:صباحو اصفر ي حلو انت
قعدت في الكرسي الجنب شيرين وقالت:فطرتو؟!
مازن:لا صحينا هسي
شيرين:اتكلم عن نفسك ي ممتحن..انا صحيت بدري بس م رضيت افطر اخليكم
سمر:م قعد تصحي جعانة انتي؟!
شيرين:تؤ تؤ
سمر عاينت لمازن:انسانة غريبة صح؟!..انت بتصحى جعان ولا انا الغريبة؟!
مازن ضحك:الاتنين
ضربتو في كتفو وضحكت
مازن:رايكم شنو نفطر في الجنينة الورا؟!
سمر:طوااالي
شيرين:بتكون بقت شمس
مازن:نتفح المظلة ي شيري
نزل من التربيزة واتحرك علي برا..
سمر اتلفتت علي ريتا:جيبي لينا الفطور برا
وجرت شيرين من يدها وطلعت..لقو مازن فرا المظلة قعدو..والجو كان بدايات شتا كدا..زاابت
سمر:وين بابا؟!
شيرين:شكلو طلع لأنو عربيتو مف برا
سمر لوت خشمها نظام..اممم
شيرين وقفت:انا ماشة اجيب تلفوني
ومشت..
مازن وقف علي حيلو
سمر:اها ماشي وين انت كمان؟!
مازن:اشوف البسيني واجي
سمر:داير بيهو شنو في البرد دا؟!
مازن:ياخ مشتهى اسبح عديل كدا
ضحكت:في ايامك دي بتشتهى اي شي
مازن:الله يحلنا من تالتة دي بس
سمر:قربتو م فضل ليكم كتير..بعدها تسبح وتنطط وتعمل اي شي
مازن ضحك:وادردق وابكى بالانجليزي اي شي بعملو..اصبري بس خليني انتهي
ضحكت وهو مشا..
"طبعا الكلب ماشي يشرب سجارة🐸👋🏻 "..
اتنهدت وهي بتعاين ليهو..يحليلو يااخ ربنا يوفقو وينجحو..
في اقل من ثانية لقت محمود قاعد قدامها..
"طبعا فلان دا م بتشوفو لمن جاي بس بتلاقو في وشك"
قلبت عيونها بزهج
جا لقدام وهو بهز في رجلو:صباح الخير ي وجه الخير
اتأفأفت وقالت:بابا ومحمد طلعو
عاين ليها مسااافة..
رجع ضهرو لورا وقال:عارف
حركت ليهو راسها:اها وانت راجي شنو؟!
محمود حرك راسو نفس حركتها:ومنو قال ليك انا طالع؟!
اتنهدت بضيق وقالت:ياا مثبت العقل والدين
ضيق عيونو وهو مثبت نظرو عليها..اتلفتت علي جهة مازن مشا بعد مساااافة عاينت ليهو لقتو لسه بعاين ليها..عاينت لرجلو البهزها ورجعت تعاين بجهة البسيني...
شيرين عقدت حواجبها وهي شايفاهو قاعد مع سمر..وصلتهم وريتا وراها شايلة الفطور..
سمر:مااااززززن
محمود كورك:مااااازززننن
مازن جا عليهم:اي اي جاي..او حفتر صباح الخير
محمود:تعال اكل
مازن قعد وبدو ياكلو ومحمود بعاين لسمر وهي متضايقة منو...
بعد شوية كوركت:ريتاااااا..زفتة
جاتها ريتا
سمر:انا مش قلتا ليك جيبي العصير..وينو؟!
ريتا:ماما انت م قلتا انا جيب عسير
سمر وقفت علي حيلها وكوركت:انتي غبية؟!حتي لو م قلتا ليك..في زول بفطر من غير عصير؟!
"نحنا😿👋🏻"
ريتا نزلت راسها
شيرين:سمر اهدي..اتلفت علي ريتا..خلاص امشي جيبي عصير ليمون
ريتا مشت وسمر ركت نفسها في الكرسي بزههج
محمود خاتي سبابتو تحت خشمو وبعاين ليها..مازن عاين لشيرين ورفع حواجبو الاتنين..كان ظاهر انها زهجانة من وجود محمود واتفشتو في ريتا المسكينة..
مازن عشان يفك الجو:البرومودا طلعت قدرك؟!
محمود م ردا ليهو وشغال يعاين لسمر ساااي...
سمر اتوترت من نظرات محمود..اخدت نفس وطلعتو عشان تنظم انفاسها..رجعت ضهرها لورا ومحمود لسا بعاين ليها..
"خوافة هي🐸👋🏻"
ريتا جات وهي شايلة صينية مستطيلة فيها كبابي العصير..
محمود فتت وقف علي حيلو
مازن وشيرين عاينو ليهو
وقالو في نفس الوقت:طالع..اشرب العصير
محمود عاين ليهم:م عايز..وم تنداح قوم اقرا
مازن ببلاهة:طيب
محمود ادا سمر نظرة اخيرة ومشا..كانت مدنقرة راسها..رفعت راسها وشالت كباية العصير بمزاااج
شيرين:دا شنو العملتيهو دا ي سمر؟!
سمر:عملتا شنو؟!
شيرين:م تتغابي..ع فكرة حركتك ظاهرة لأنو العصير دا م موضوع تكوركي فيهو كدا
سمر اتأفأفت:هو منو القال ليهو تعال افطر معانا؟!
شيرين:اها يعني يقعد جعان عشان حضرة سيادتك م تتضايقي؟!
سمر عاينت لمازن البعاين ليهم في سكات وقالت:شيرين يخ خلاص
شيرين:بقيتي فظيعة انتي
مازن: علي فكرة محمود فهمها
سمر:خليهو يفهم..ح يعمل لي شنو يعني؟!
كانت كأنها بتقول الكلام دا عشان تقوي بيهو روحها
شيرين:ما دي المشكلة هنا..انو بحبك وم قعد يعمل شي
سمر اتذكرت لمن حضنها بالغصب:دا بعرف يحب هو؟!
مازن:م عرف الحب الا بيك وليك
عاينت ليهو وبلعت ريقها...
ختت العصير وقامت بزهج دخلت جوا..
مازن:اابت دي عجيبة خلاص
شيرين:مصيرها تحبو..ح تمشي وين من حفتر يعني؟!
مازن:المشكلو في انو هو حفتر
شيرين:الله يكون في العون
مازن بخبث:ويكون في عون محمد برضو
شيرين:محمد؟!محمد دخلو شنو؟!
مازن وقف:لا لا ولا شي بس الله يعينهم يعني. يلا انا ماشي اقرا
ومشا خلاها
شيرين:اوكيه
احتارت طبعا..معقولة مازن يكون عارف بالحركات البعملها ليها محمد؟! طيب حتي لو عارف ليه يقول الله يكون في عونو الله يكون في عوني انا...
