بعد مرور يومين..
قصر حفتر..
في غرفتها بتتكلم بالتلفون..
اتنهدت وهي سامعاهو بقول ليها:سمر م ينفع تعملي فيني كد
سمر:ولا ينفع اعمل في اهلي كد..عمر انا في بيت قايم علي اكتافي..م بقدر اعمل كد في اولاد عمتي
عمر:ي سمر اديني بس فرصة..زي ما اديتيهو فرصة..عشتي معاهو شهور وم حبيتيهو..خليهو بس
اتنهدت وم ردت..
عمر:علي العموم انا لازم اشوفك ف اليومين الجايات ديل
سمر:عمر اسمعني
عمر:اسمعيني انتي..انا مستحيل اضيعك من يدي تاني
اتنهدت:باي
وقفلت الخط..
ختت التلفون وسرحت..فكرة انها تهرب تخلي بيتها دي مستحيلة عديل..
بس كمان م بقدر تفصلا من عمر..
مساءً..
اول ما محمود جا داخل الغرفة..
شالت تلفونها ودار تقوم من السرير كد..
رما ليها العلبة في كرعينها..
عاينت ليهو بخلعة..
ابتسم:قايلاني م ح القاها يعني؟!
قرب وشو منها:قايلاني ح اعيش تحت رحمتك كتير؟!
عقدت حواجبها باستغراب..
رجع لورا واتلفت منها وهو بقول:كنتي مستمتعة بي منظر ضعفي قدامك صح؟!
عاين ليها:قدرتي تمسكي حفتر من يدو البتوجعو
وقفت علي حيلها:م كنتا مستمتعة بي منظر ضعفك..لأنك اصلا طلعتو فيني..واساسا م دسيتها عشان امسكك من يدك البتوجعك ولا اي كلام من البتقول فيهو د
م ردا ليها..
وقفت قدامو وقالت:دسيتها لأني وحدة متزوجة عرفت انو راجلها بتعاطي..دسيتها عشان بيتي م يتخرب
عاين ليها:وانتي شايفاهو كد م اتخرب؟!
سمر:دسيتها دليل علي اني م راضية علي البتعملو د..م ح اسمح ليك تدمر نفسك وتدمر مستقبلي معاك
ابتسم:خايفة تترملي وانتي لسه شابة؟!
رمشت مرتين من كلامو..هي بتقول في شنو وهو بفكر في شنو..
سمر:ليه شايفني كد؟!
محمود:لأنك اصلا كد..ولو ناسية بذكرك بي تاريخ علاقتنا..جا عليها..صعب اشوف بي حبك بعد ما شفتا كرهك سنيين
بعلت ريقها وهي بتوزع نظرها بين عيونو:الاصعب انك تتغير ياا حفتر
ومشت خلتو..
الليلة اول مرة تقول ليهو حفتر..
لأنها بالجد حست بيهو حفتر..
قاسي وعدواني وقلبو متحجر..
م شاف حبها ليهو لسه؟!..شاف الكره والمقت وم شاف الحب؟!
هه..كلاً يرى بعين طبعه'ه..
صباح اليوم التالي..
قاعدة بتفطر مع مازن..
مازن:وينو حوته؟!
سمر بعدم اهتمام:طلع من بدري
مازن:طلعاتو كترت شديد الايام دي
سمر من غير ما ترفع عينها من الصحن:بكون مشغول
مازن عاين ليها وم اتكلم..
ليهو كم يوم مُلاحظ الجو مكهرب..
اتنهد..احسن يخليهم علي راحتهم يمكن متشاكلين في حاجة..
مساءً..
جات داخلة غرفة مازن لقتو بتكلم بي تلفونو..
اشرت لي نظام خلاص بجيك بعدين..
بس هو وقف علي حيلو ومسك يدها..
وقال:طيب بحبك
سمر ابتسمت..
مازن وهو لسه ماسك يد سمر..
ضحك وقال:سكتنا خلاص
عاين لي سمر:تمام يلاا
وقفل الخط وهو مبتسم..
جرا سمر وهو بقول:تعال ي حلوو
قعدت وقعد جنبها..
قالت:قايلاك لسه نايم..جيت اصحيك للعشا
مازن:لا لا صحيت قبل شوية وصليتو
سمر:حرما
مازن:جمعا..محمود لسه م جا؟!
سمر:لسه
مازن:من طلعة الصباح؟!
سمر:جا العصر غير وطلع
مازن:ايواا
عاينت ليهو:قعد تقول ليها بحبك كتير؟!
ضحك وهو بحرك راسو:كل يوم
ابتسمت..
مازن:بحبها لأنها م زي باقي البنات..م بتقعد تتحكنش وتتخجل اليوم كلو..ترندك معاي كداا لمن بحس بيها واحد صحبي..وبعد د محافظة علي انوثتها
ميلت راسها وهي بتتنهد..
مازن:شايفها صحبتي قبل تكون حبيبتي
شالت نفسها وختتو..
محظوظة شفق بي مازن..مازن رغم ضحكو وهظارو برضو زوقو صعب وم اي شي بلفت انتباهو..ف كونها شفق لفتت انتباهو د براهو انجاز..
طيب وهي؟!..المفروض انجازها يكون اكبر من انجاز شفق..
لأنها لفتت انتباه واحد م منتبه مع الدنيا اصلا..
مازن:الاخت وصلت وين؟!
ضحكت:ولا حتة معاك
مازن:م معاي نهاي..اليومين ديل م ياكي
عاينت ليهو:كيف م ياني؟!
مازن وهو مركز في عيونها:مشتتة كد..بتحاولي تكوني عادية بس عيونك فاضحاك
اتنهد..مازن ترجم حالتها..هه وهي قايلاهو م مركز معاها..
مازن:محمود عمل ليك شنو؟!
عاينت ليهو:محمود م عندو دخل
رفع حاجبو:اها منو العندو دخل؟!
اتنهد:انا براي بفكر في حاجات برا برا
استعدل قعدتو:زي شنو؟!
سمر عاينت ليهو مسااافة:يعني..بفكر اني من حقي اطلع مع حبيبي واخلط وامسك يدو ويسمعني كلام حلو..بس تاني بتذكر انو "حفتر"
وعملت بي اصبعها علامتي التنصيص..
مازن رمش مرة وقال:دي كلها شكليات انتو م محتاجين ليها
سمر اتنهدت وهي بتحرك راسها نظام اي..
مازن:بعدين محمود زاتو م بعرف لي امور المراهقين دي..م بعرف يحنك زي اخوهو
ضحكت:خلينا ليك الحنك
ضحك:اي خلو لي
