شغفها_حُبًا
ح 11
نوكوميس"فتاة القمر" .
28 من الشهر، في ساعه 11:33 دقيقه بضبط طلعت ساجده من غرفة العمليات بعد ما ستغرقت العمليه 4 ساعات، وأخيراً اليوم ساجده قدرت تتخطى كل الصعاب في حياتها، مش كل الصعاب جزء منها الانه مزال في صعاب أكثر مش معروف لو ح تقدر تتخطاهم او لا!
وأخيرا فتحت عيونها بتعب وألم من أثر المسكن وبسرعه شافت لي عمتها اللي كانت راقده ع الكنبه بعمق واضح عليها التعب ف ما حبتش تنوضها؛ حطت يدها على بشرتها تتحسس فيها وفي نفسها تقول ياترى كيف بدي شكلي؟ هيا نفسي أني ساجده اللي كنت قبل! نفس بشرتي البيضاء الناصعه !
وفي لحظتها فاقت فاديه من نومها وتكسلت ف قالت بنبره ناعسه: الحمد لله ع السلامه .
ساجده ابتسمت: الله يسلمك ، عمتي جيبيلي مرايه خلي نشوف وجهي
فاديه مدتلها مراية صغيره كانت مجهزتها:وأخيراً رجعتي كيف ما إنتي.
شافت ساجده لي وجها وكانت مش زي ما كانت قبل مش مُبالغه لكن مستحيل تقدر تجرع كيف ما كانت شيء يخلقه ربي مش زي شيء يديره العبد!
ساجده ابتسمت: اي وأخيرا
فاديه: حاسه بشيء ولا باهي
ساجده: لالا كويسه ؛بس راسي يوجع فيا ممكن من المخدر
فاديه: خلي نكلم دكتور يجي يمر عليك
استوقفتها ساجده اللي كانت تشوف لي يدها اليمين؛ ويدي ؟
فاديه تنهدت : مش كل شيء يجي زي مانبو الحمد لله انهم حصلوا جلد لي بشرتك لكن يدك ما قدروش يحصلولها ؛ وتبي وقت
سكتت ساجده وسمعت لي كلام عمتها..
************************************
نوريه: هيا عاد لينا مشحطين الناس قريب اسبوع قولي يا اي يا لا .
روان: لا
نوريه: آخر قرار!
روان: اي
نوريه: باهي كيف ما تبي؛ لكن خليك متفكره ديما انه اني مش دايمتلك وعمامك مستحيل نضمن حتى لو بعد ما نموت يخلولكم الحوش هما توا وبياكلونا عليه
روان: مش مهم اني بشهادتي ومكمله قرايتي ونخدم ونسوق ومستريحه في حياتي
نوريه: ديري اللي يريحك
روان هزت راسها: وهوا هكي
طلعت نوريه وسكرت الباب بقوه ف شافت روان لي مرام اللي واقفه ع المرايه تساوي في نفسها
روان: شن ماتبيش تعطي نصايح يا رضوى الشربيني!
مرام: وأني مالياش بيك أي علاقه ترفضي من ترفضي؛ نوضي وصليني ع الكليه عندي امتحان
***************************************
حس مُراد بيد نحطت على كتفه وغيرتله الجرح ف قال بصوت رجولي
مراد: شن اللي مخليك تهتمي فيا بدرجه هاذي !
نصيب: زيك زي أي مريض عندي
بعد مراد من عليها ولبس تشيرته : كل المرضى تمشيلهم في حياشهم!
نصيب بجرأه: على حسب مكانة المريض في قلبي.
مراد شدها من حنكها بقوه وضغط عليها: مانبيش نلمح وجهك أهني نهائيا مرة تانيه ماتخلينيش نتصرف تصرف تاني تندمي عليه
نصيب بخوف: بتقتلني زي ما قتلت بنت عمي!
مراد دفها ع الحيط وفتح الباب متع الحوش وأشرلها بمعنى أطلعي:توقعي أي شيء مني.
خدت نصيب شنطتها في يدها وقفت قدامه: زي ماسعدت في يوم نورطك ماعنديش مشكله.
مراد: أطلعي ماتخلينيش نغلط معاك .
دارت نصيب ضهرها وامشت من جنبه، بينما خش مُراد وخدي هاتفه رن على ساجده اللي كان متعارك معاها من يومين ومن وقتها معاش ترد عليه ولا على رسائله ؛ ف خدي جاكتيه وكالعاده السلاح ع خصره وطلع
