#شغفها_حُبًا
ح16
نوكوميس"فتاة القمر".
بينما كانت ساجده واقفه جنب الباب ، تحاول تسمع الكلام من أمها ،حطت يدها على فمها لما سمعت أمها وهيا تقول ،
نوريه: أنتِ عارفه انه ولد سلفي هوا اللي، أغتصب بنتك!
ساميه عقدت حواجبها: كيف شن تقولي انتِ ومن وين تعرفي هذا كله!
نوريه: إلياس يكون ولد سلفي وهوا نفسه اللي إعتدى على بنت
ساميه ببرود: وكان يعني؟ شن علاقه ساجده ومراد بولد سلفك !؟
نوريه تنهدت: يعني خلاص مصره؟
ساميه: مش اني اللي مصره مراد مُصر وانتي تعرفي مُراد كان صكر راسه.
نوريه:اي لا نعرفه .
ساميه: تمام ،معناها خلي نحددو موعد نجوكم فيه!
نوريه : انشاء الله الخميس انسب شيء لينا .
ساميه ابتسمت: انشاء الله،إحني في الأخير ره بنولو عيله وحده ماهو الياس بياخد بنتي ولا ماعندكش علم.
نوريه: في أمان الله.
وصكرت الخط ، ف خشت ساجده حتى تقول باندفاع :مش ملاحظه كلامك! وتصرفاتك كيف موليه! امي انتِ ما كنتيش هكي تغيريتي.
نوريه :وانتِ كُنتِ تتصنتي فيا ولا كيف!
ساجده:ماتغيريش الموضوع، بعدين كيف تقولي للمراه هكي! كيف تقوليلها انه بنتكم تعدى عليها ولد سلفي عاجبك يعني ولا متشمته؛افترضي انه واحده منا يصيرلها هكي!
نوريه: اعوذ بالله من الشيطان الرجيم.
ساجده: كويس امالا اللي ماترضيشي ع بناتك ماترضيشي على بنات الناس...
سكتت نوريه بينما خدت ساجده هاتفها اللي كان يشحن، وجت طالعه ..
نوريه: وين ماشيه؟؟
ساجده: مش قتلك اليوم بنبدا نداوم في المستشفى ؛! بترفعني روان
نوريه:ردي بالك على روحك .
خدت ساجده نفس عميق ف كونها مش قادره تقسم مشاعرها ومش قادره تشغل حتى عقلها أمر مُرهق ومُتعب للنفس.
*********************************
قعمز مُراد بتعب جنب أمه ف قال: ها شن صار !
ساميه: طلع ولد عمها اللي مغتصب اختك.
مراد: اي نعرف
ساميه: مانبيش نوقف في طريقك يكفي ما صارلك من قبل وفقدت ولدك ومرتك ، لكن هالمره لا اني ولا بوك ولا اي حد فينا مسؤول ع اللي ح يصير.
مراد بتجاهل لي كلام امه: ع المهم توا شن قالتلك امها.
ساميه: هيا الواضح انه ماخطرهاش فينا بكل، لكن حددنا موعد ع الخميس .
مراد: مش مهم امها خاطرها ولالا اهم شيء هيا البنت يعني.
ساميه: عادي تقدر تقول اسمها جنبي امك اني.
مراد خدي مفاتيحه: توصي ع الشيء!
ساميه: وين ماشي قاعده نبيك في كذا موضوع
مراد قعمز وعقد حواجبه: خير إنشاء الله!
ساميه: توا هذا بيجي يخطب أختك ولا شني!مانبوش الموضوع يكبر ويسمعوا عمامك وتصير قصه
مراد: يُمه ؛ احني وين وعمامي وين! مابعدهم علينا توا من وين بيسمعوا اولا تانيًا حتى لو سمعوا ماليهمش علاقه فينا أو في حياتنا ، ما تخافيش وخلي الموضوع عليا.
ساميه: وبوك !
مراد: خيره بوي!؟
ساميه: معاش تجاوبني بسوؤال، بوك امتى بترجع وتكلمه؟؟ بوك هذا مش عدوك، مهما دار يقعد اسمه بوك وفي نهايه خاطره مندم عليه هلبا
مراد هز راسه ومسح ع لحيته: ساهل كله ينحل.
أنهى كلامه؛وطلع .
