#شغفها_حُبًا
ح19 ماقبل الأخيره .
نوكوميس"فتاة القمر".
***********************************
شاف مُراد لي عيونها حتى يقول بجديات: انتِ غبيه يابنت ولا تستغبي!.كيف ناخدك هكي شن مُراهقين احني..نديرو اللي يرضي ربي .
ساجده: الضغط اللي اني فيه يقولي اقتليي روحك ماتراجيش ثاانيه
مراد: حوليلي هالأفكار الغبيه من راسك،واللي رفع السماء وبسط والأرض ، مانبدا راجل كان مقعدش اسمي واسمك في كُتيب واحد .
ساجده هزت راسها ومسحت دمعه شارفت على نزول من عينها:انشاء الله.
مراد: هي اني بنمشي ماتبي شيء!؟
ساجده شدت في معصم يده: وكبوطك!؟
مراد ابتسم :خليه عندك .
سحب يده من يدها وطلع بسرعة البرق ؛ وهيا تقوله دير بالك على نفسك وسوق كويس؛ وهوا كان فاهم قداش ساجده تعاني من فوبيا الفقد..وعندها خوف لا يوصف من الشيء هذا .
سقداته لعند الباب ورجعت لي الداخل ، أول ما خشت للدار حضنت كبوطه ولمت نفسها فيه كويس ، ريحة عطره المُميزه المختلطه بريحة الدخان ، مافيش حد يضاهي ريحة الشخص اللي نحبوه لو حطيت فرنسا كلها في شيشة عطر"
************************************
سكرت نوريه السيتاره من بعد ما كانت تراقب فيهم بصمت ،طفت ضيء دارها واتكت ع السرير وهيا تفكر لو وافقت شن اللي ح يصير ولو ماوفقتش برضو شن مُمكن يصير؛ كُل شيء كان ملخبط بنسبه لي نوريه ،محتاره بين حقيقة مراد وضايعه ؛ خوفًا انها تكون اعطت بنتها للشخص الغلط اللي ممكن يخليها تندم ع الساعه اللي تعرفت فيها عليه،لكن معقوله ح يخليها تندم وهوا اللي كسر كُل الحواجز بينهم؟! يخليها تندم وهوا اللي قصر المسافات بينهم ع شان يوصللها ؟ تندم وهوا اللي قام الحرب بس على خاطر تكون ليه!؟.
*******************************
حست ساجده باسترخاء لا يوصف وهيا طالعه من الدوش ولافه على نفسها الديشمبر؛ لبست حوايجها بسرعه وجففت شعرها، حطت آخر شيء لمساتها البسيطه وتأكدت من جمالها وطُلعت من دارها مُتجها للمطبخ وين ماريحة الشاهي فايحه منه والبيض وزيت الزيتون القهوه العربيه خدت حته من قلب ساجده .
ساجده بابتسامه واسعه: صباح الخير يا أحسن وأفضل ام في العالم يانبع الحنان ونبع التشحييط.
نوريه: صباح الورد .
ساجده تصب في القهوه: مانضتش روان؟ نبيها توصلني.
نوريه : على خير وين تبي؟
ساجده: اول شيء بنمشي للخياطه اللي اتفقت معاها باش ديرلي كاب التخرج وبعدين تفوتني ع المستشفى.
روان ثاوبت: شوفيره عندك اني!... صباح الخير
نوريه:ناضت مرام عندها امتحان .
روان فتحت الثلاجه:مزال امتحانها مش توا .
ساجده بعتت مسج لي مراد وحطت هاتفها وشافت لي روان: هي حبيبي سقدي روحك عندي ماندير .
روان بملل: أُووكيييي .
نوريه قعمزت ع الطاوله جنب ساجده: مسألتينيش شن قالي مراد وعلاش جي اصلا .
ساجده: ولو سألتك شن ح يتغير ماما لو انتِ مُصره على رأيك!؟
نوريه: كويس انك عارفه أصلاً انتي الواضح انك بديتي تستوعبي واخترتي قرايتك صح
ساجده خدت نفس عميق: اني بنقعمز في السياره قولي لي روان .
طلعت ساجده بسرعه من جنب امها مُتجنبه النقاش معاها،وفي بالها تقول معقوله بعد هذا كله ماما مش موافقه!؟
وبينما كانت هيا تفكر .. قاطع تفكيرها صوت مسج من مراد مكتوب فيه"صباح الخيرات ❤،وصلت و الله وحالي كويس " .
ابتسمت ساجده من وسط الضيق اللي كانت فيه نوعًا ما!.حطت على رقمه وكيف بترفع التليفون على وذنها حتى ترن عليه . طق الشباك مرتين ف نزلت بدورها الهاتف حتى يقابلها إلياس. ..صكرت الخط
ساجده بدون مسايره؛ شني فيه؟
إلياس : ولا شيء قلت نسلم عليك بنت عمي وعشرت عمر احني.
ساجده ؛اوكي سللمت عليا وله خلاص برا على حالك.
إلياس بنبرة تهديد: قولي للتكلمي فيه ،جايك نهار تندم فيه
ساجده:تصدق وله! انت أوقح انسان شفته في حياتي كنت نقول معقوله فيه ناس عايشه بلا شرف!؟ طلعت انت عايشش من غير ذرة شرف.
إلياس بهزوه: حلو والله حتى كلامك بدي زيه ..!
ف تجالهت ساجده وجوده وصكرت الشباك بينما أعطاها هوا نضرة شر باينه حتى في ملامح وجها ..
وما هيا إلا ثواني حتى طلعت روان وركبت سيارتها البسيطه ومشت بيها .
